नेपाल लिपि छ्यलेगु एप्स वल !

शेयर यानादिसँ


झीगु संवाददाता

येँ, थिंलागाः त्रयोदसि, ११३८ । स्वंगू दशक न्ह्यः ल्हातं च्वयाः लिथो चानाः पौभा पत्रिका मार्फत नेपाल लिपा जनस्तरय् थ्यंकेत सनाजूगु संस्था नेपाल लिपि गुथि थौं व हे लिपि मोबाइलय् थः यथे टाइप यानाः संसारय् न्ह्याम्हसितं हिसिचा दयेक छायेपियाः क्यने दइगु जुल — ईब्यःया खँ ।

नेपाल लिपियात एण्ड्रोइड अपरेटिङ सिस्टमया स्मार्टफोनय् च्वयाः उकियात किपा दयेकाः छाय्पियाः फेसबुक थज्याःगु सामाजिक सञ्जायलय् छ्यलय् जिइक दयेकातःगु एप्स थौं सार्वजनिक जूगु दु । गुथिया नायः निरंजन ताम्राकारं थ्व एप्सया जानकारी गुथिया फेसबुक पेजय् शेयर यानाः सार्वजनिक यानादिल ।

“झी ईलिसे न्ह्यायेमाःगु दु । न्हूगु पुस्ता दक्वं हे डिजिटल यूगय् वनेधुंकूगु अवस्था दु । आःया पुस्तायात नेपाल लिपिया बारे स्यनेगु उमित छ्य्केत ग्वहालि यायेगु खःसा एप्स दयेकेगु थज्याःगु बांलाःगु मेगु लँपु दइमखु । थ्व ज्याय् झी न्हयायेधुनागु दु । नेपाल लिपि आः झीगु न्हूगु पुस्ताया ल्हातय् ल्हातय् दइ,” वय्कलं धयादिल ।



गुथिया वरिष्ठ उपाध्यक्ष अनिल स्थापितं आः हे नं नेपाल लिपि स्यनेगु इत्यादि मेमेगु एप्सत डेभलोप जुयावयाच्वंगु खँ कनादिल ।

थुगु एप्सयात डेभेलोप पवन राज महर्जनं यानादीगु खःसा उकियालिसें आनन्द कुमार महर्जन, विज्ञान महर्जन व विकेश महर्जन पिनिगु नं ग्वहालि दूगु खँ आयोजकं धाःगु दु ।

नेवाः देय् दबूया नायः नरेश ताम्राकारं थुकियात देसय् दक्व नेवाःतय्सं छ्यलीगु एप्स दयेकेमाःगु व पिनेपिने च्वंपिं नेवाःतय्सं तकं नेपाल लिपि छ्यलेत ग्वहालि याइ धयादिल ।

ज्याझ्वलय् नवासें ईल्वहँ प्रकाशनया नरेशवीर शाक्यं थज्याःगु एप्स धइगु न्हापा न्हापा ल्हातं च्वयाः नेपाललिपि सयेकूगु पुस्ताया लागि नं गौरवया खँ जूगु कनादिल ।

ज्याझ्वलय् सुनिता डंगोलं थ्व एप्स गय् यानाः डाउनलोड यायेगु अले गय् यानाः छय्लेगु धइगु जानकारी नं बियादीगु खः ।



थ्व एप्स एण्ड्रोइड मोबाइलय् तयेत प्लेस्टोरय् वनाः “nepal lipi – type newa” टाइप यानाः उकियात इन्स्टल यायेमाः । थथे यानाः थःगु मोबाइलय् थ्व इन्स्टल याये धुनेवं थुकिया मार्फत देवनागरी लिपिं च्वःगु आखः नेपाल लिपिं खनेदइ अले उकिया रंग हिलेगु बाय्कग्राउण्डयारंग हिलेगु किपाया बाय्कग्राउण्ड तयेगु, एलाइनमेन्ट मिलेयायेगु लिसें झीत यःगु मैचा व बौचा, बौचा व मैचा इत्यादि फिगर तयाः मेसेज, मेम, स्टीकर दयेकाः फेसबुकय्, भाइबरय्, इन्टाग्रामय् पोस्ट यायेफइ, अथवा मेसेन्जरय् खँ ल्हायेबलय् इमोजीया रुपय् छ्वयेफइ । थुकिइ बौचा मैचा, योम्ह भाजु, भाजुमय्जु, मैचा व बौचा, इन्टुमिन्टु अले नेवा स्टीकरया स्टीकर सम्मिलित जुयाच्वंगु दु ।

किपा ग्वहालि नरेशवीर शाक्य

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.