कलाः पय्नः वंबलय्

पुष्परत्न ताम्रकार स्वीटहर्ट

जि पाकः ख्वाः वया नं माकः थें च्वंम्ह दतंफतं याकः भाःतयात थौं व स्वये हे च्वलेचा ख्वाः वयाः नं आमलि चुचुप्याना ख्वाः वम्ह स्वःसा सँन्यापति थें च्वना नं फू यायेबलय् ग्वारा तू वनी थें च्वंम्ह दतंफतं व हे छम्ह, यःसां मयःसां वाक्कु छिनाःसां सह यानाः ह्वना वयाच्वनाम्ह याकः कलाः, आकाझाकां थौं सुयाकें छसः धकाः मन्यंसे सुतुक्क पय्नः वनी धकाः सुनां छु स्यू ?

थथे याकः भाःतयात त्वःता मेपिं सुं नापं थथे याकःचा जुइक पय्नः वनी धकाः सुयां कुन्हु मतिइ वनीला ? व नं बांलाम्ह जूसां छगू धायेका, स्वये हे च्वलेचा ख्वाः वःम्ह । सुं कुन्हु पत्याः जुइला अज्याम्ह मिसा पय्नः वन धयागु खँय्, तर थौं पत्याः हे जुइ मायेकाबिल व जाग्वारा मिसां । दं दं मयायेक छपाः लासाय् बच्छि बच्छि यानाः कात्तुमत्तु काक्क म्हुतुम्हुतु ल्वाक्क सनां सने हे मजिइक अलकत्रा प्यपुं थें प्यपुनाः गःपः हे स्वतिक्क घय्पुनाः द्यना वयाच्वनाम्ह याकः कलाःया पाकः ख्वाः वयाः नं माकः थें च्वंम्ह जि वया छम्हयां छम्ह जक याकः भाःत ला पत्याः मजू धासा मेपिं गथे पत्याः जुइ ले ? तर…तर…थौं सत्य सत्य ग्वारा ग्वाराचिंपिं सि स्याना हत्या, चि नःम्ह खा थें भुग्लुं च्वनाः छ्यनं चुयासां क्वपसं पुयाःसां, पुलिं चुयाःसां जिमि घाँय् घाँय् बाज्या साछि तयाः विश्वास यासें पत्याः याना च्वनेमाल । छु याये कर्म खोता जुलकि नाप्पं छपाः लासाय् द्यनावयाच्वनाम्ह कलातं तकं विश्वासघात याकाः ध्वंलाका: च्वनेमालीगु जुयाच्वन । धात्थें थ्व मिसातय् भाः मदुखनी । सृष्टिकर्ता ब्रम्हांतक्कं थमिगु चरित्रया बारे मस्यू धइगु खँयात थौं व च्वलेचा ख्वाःवःम्ह मिसां प्रमाणित यानाः पेंय्न वनाः थःगु चरितार्थ न्हाय्कनं थें छर्लंग यानाबिल नि ।



मखु धया, जि ला तसकं हे अजू चाः । पय्नः हे वने मायेक जिं वयात छु याना बियागु दु ? वं धाःधाःगु इलय् धाःधाःथें च्वनाः फुसां मफुसां त्यानु मधासें उसि मचासें याना वं वया हे च्वनागु दु । अझ उलिजक ला तुति इसुसे च्वन धाइबलय् तुति तिइका च्वनागु हे दु । छाति स्यात धाइबलय् निपा ल्हातं छाति तियाच्वनागु दु । आःला वयात गःपः स्यात धाइबलय् गःपःजक तिइ ल्यं दनिका । अबलय् वं अथे धाइगु खःसा अथे हे याना बिइगु खः तर, वं गबले अथे मधाः । पाःगु थन थुलि हे जक खः । न जिं वयात ख्यानागु दु, नं दायागु दु, न छकः धकाः तसलं हालागु दु । बरु म्हाइपुइबलय् थितुंमतुं थिइक च्वनाः ख्याः यानाः याक्व प्वालय्, जँय्, पालि तःलय् कुचुकुचु जक नकाबियागु दु ।

मखुगु खँ जिं छु ल्हाये ? चन्द्र सूर्य साच्छि दु । अले वं धाःधाःगु ला पुरय् हे याना बियागु दु । उकिया दसुला सी दयेक थ्व हे जाग्वारा प्यम्ह प्यम्ह मचाखाचात ला ख:नि । अय्नं मस्यु वयात छु खँय् चित्त बुझय् मजुयाः थथे सुइकें छस: धकाः मन्यंसे पेंय्न वना ब्यूगु । अय्नं जिं वयात छुं याना बिइ धयाः याना जकं मबियाला धकाः पुलिंचुया ग्वालिं चुयाः क्वपसां पुयाः अचार ननं बिचार याना । जिमि मांया काय्सा घौ निघौलिं मयायेक बिचार यायां याये हे मफुत । गुलि लुमंकेत स्वया । लुमंके हे मफुत । छुं हे लुमना मवः ।



अँ…बल्ल बल्लं लुमन । धात्थें खँ लुमन छता खँ । निलाति न्ह्यः नापं च्वनाः कुचुकुचु नकाः ख्याः याना च्वनाबलय् वयात नं थौंकन्हेया ल्यासेतय्सं थें लाखे लसिंया सँ थें ह्याउँके माल धाःगुलिं ह्याउँकेगु हलंज्वलंला न्ह्योने हे तक्रेयाना बियागु खः । अले वं तिसा वसःनिसें कयाः धायेज्यूगु नं धाल, धाये मज्युगु नं धाल, व नं पुरय् यानाबिया । अझ उलि जक ला थौं कन्हेयापिं ल्यासेतय्सं ब्वहलय् ह्वः खनातःगु लं, ब्वहलं हे कुहाँवइथें च्वंगु लं, छाति ह्वातां चालीगु, त्यपुचा खनेदइगु, चिचीपाःगु लं फिनाः फेशन याना जुइमाल धाःगुलिं व नं तक्रे याना बिया । वं धाःधाःथें छु जक पुरय् याना मबिया जिं ।

उफ्…हे परेमेश्वर दशां ल्यूपिन्त खिचां नं लिइ यः धाःगु थौं धात्थें जितः जुयाबिल । छेँ ज्याय् नं लः कायेगुयालिसें जा थुइगु, हिजा हिइगु, पेटिकोट, पेन्टि, ब्रा तक्कं हिइगु यासें चःबि तक्कं सफा याना बियागु दु । थुलिमछिं सहुलियत बिया नं थौं थुलि याकः भाःतयात घाः लाका वनी धकाः सत्य म्हगसय् तकं मखनाका जिं …। यदि वने हे माःसा मेमेबलय् गनं पिहंवने त्यनीबलय् थें जि फलानाम्हलिसे पय्नः वने त्यनाका न्हां…, धकाः न्यना वंसाला जि हे ज्यू नि । सुनां वयात पना तइ ? माःसांम्वाःसां सुखू धन्दा कया जुइ मायेक । आखिरय् थन गुज्यागुज्यापिं ला ह्यह्य कुने धुंकूपिं ला पय्नः वनाच्वंगु इलय् वं नं न्यना हे वंसा छु पाइ ? छाय् सुइकें मन्यंसे पेंय्न वने माःगु दु ? न्यना पेंय्न वंसा ला थुज्यागु थिकेगु इलय् छम्ह सां पाः जुया हाइ सञ्चो जुइगु खःनि बरु थ्व जाग्वारा घाघः मचाखाचातय्त नं नापं हे यंकूसा ज्यूगु खः नि । बरु जिं थथे धन्दा मकासे म्वाल छ प्ंय्न वनेसा थुलि खँ न्यना हुँ वंथाय् तक छं सुखी जुइमाः धकाः म्ये हाहां सुवाः बिइनि ।



धात्थें धायेगु हे खःसा थथे पय्नः वनी धकाः गथे विश्वास यायेगु ? गथे पत्याः यायेगु ? न्हापा न्हापा जूसा गनं छकः वनेमाःसां थः छेँय् छधू जक वनेमाःसां न्यना वनीम्ह । न्ह्याथे हे लिबाःसां दुहाँ वइम्ह । गुबलें गुबलें थः छेँय् चाःहिले मालीगु अवस्थाय् लात धाःसा तुरुन्त हे फोनं जि थौं लिहां वये मखुत, फ्वंग घयेपुनाः धं दियादिसँ धकाः धयाहइम्ह, उकुन्हु ला अथे थथे छुं हे धया महः बा …। आः वइला, अले वइला धाधां लुखा खलुइ लुखा पिवाः जक जुया वाकाः वाकाः वयेक पिया च्वंच्वं मांच्वसा व हे मवः व हे मवः । व जाग्वारा मचाखाचातय्त क्वथाय् तुं थ्यनाः थः जक चच्छि लुखाखलुइ च्वना न्ह्यः छले यायेत पियाच्वना छन्त जिं गुबले तक थ्व मिखाय् छंगु ख्वाः लुया मवःतले धकाः म्ये हाला च्वना । म्ये हाः हां चच्छि बित नं व हे मवःगुलिं जिगु मनय् धिमे थाना हयाच्वन ।

व च्वलेचा ख्वाः वम्हेसित पिप्युंपिप्युं हे मवःगुलिं थुलि तंया मि ब्वालाकाकां वयाच्वन कि अहो ह…ह… धयां ब्यागु हे मखु । अले गन सुया थाय् सुनाप पय्नः वन जुइ धकाः खुब बिचाः यानाच्वना । सुं जि खिचा थें ग्वाः ग्वाःदुपिं पासापि  पासापिन्थाय् जकं पेंयेन मवंला धइगु मतिइ लुया वयेसाथं फोन दुपिन्थाय् तक्कं फोन यानाः न्यना । फोन मदुपिन्थाय् व भचा सती सतीथाय् छेँय् छेँय् वनाः जिमि च्वलेचा ख्वाः वम्ह कलाः थन पय्नः वयाच्वंगु दु ला ? धकाः नं जुया । तर छम्हेसिनं नं अहँ, जि थाय् पय्नः वःगु दु धकाः धयामहः । अले जितः निरास जुइगु भाय्प्वः मेगु छुं हे मजुल । पेंय्न वंम्ह कलाःयात त्वःते मफयाः वयागु लुमन्तिइ झन जक मायां क्यन रे पासा व पय्नः वंम्ह कलाःयात माः वनेनु धकाः म्ये हाहां मिखां ख्वबि धाः हायेकाः न्हासं न्हि वल्याहां वयेकाः व जाग्वारा मचाखाचातय्त छकःपतिं मिखा फुतिफुति यानाः स्वयाच्वना ।


Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.