पहिचान विरोधीयात भोट बियाः नेवाः राज्य हयेमाःपिं झी

राजमाया पुतवार

चुनाव जुल । लिच्वः खना हे च्वना । मिखा तिसिनाः स्वःसां छ्यातां छितां खनेदइ । आः नेवाःतय्त गुलि पहिचान माः धइगु निभाः द्यःथें यच्चुक खनेदयाच्वंगु दु ।

म्हपुजाबलय् प्रधानमन्त्रीया तुतिभागियानाः बसन्तपुलिइ सःतेवं नेवाःतय्गु नामय् इन्कलाब यानागु धकाः धयाजुइपिन्सं अले रंगशालाय् छकः मनूत मुंकाः भासन यायेवं नेवाःराज्य वल धकाः धयाजुइपिन्सं आः थःगु ख्वाः खन जुइ । भासन यायेबलय् उमि थः अनथ्यं थनथ्यं मदुसां उमिसं नेवाःतय्त पहिचानया महत्व गुलि थुइकेफत धइगु हानं छकः खनेदयावल, थ्व चुनावय् मत कुरकातःगु बाकस जक चायेकेवं ।



जुलुस वनेबलय् नेवाः राज्य मदयेक मगाः धायेगु, नेवाः पहिचान माः धायेगु । अले भोट कुरके त्ययेकाः व हे पहिचान बिरोधी पार्टीत व नेतातय्त भोट बिइगु । थ्व हे मखुला झीगु म्हसिका? सुयात भोट बिल व त्याइ धकाः मसियाः अले उपिं त्यातकि नेवाः म्हसिकायात त्वाकलय् तयाः त्यात्या याइ धकाः मसिउ धकाः नं गथे धाये । तर थपाय् नेवाः सभ्यताया केन्द्र धयातयागु थाय्, थन निद्वः दँ न्ह्यःनिसेंया धर्म संस्कृतिया रक्षा यानाच्वंपिन्सं आखिरय् त्याकीगु धइगु म्ह्याय् नं मदु छेँ नं मदु जुइक म्ह्याय् ब्वयेका यंकीपिं, छिमिगु भासं ब्वंकेबिइमखु धकाः म्हुतिइ पत्ति तिकीपिं अले जिमिगु मोटर ब्वाकेत थाय् मन्त धकाः अादिबासी नेवाःतय्गु छेँ थुनीपिन्त हे खः । छाय् छाय् नेवाःतय्त नेवाः यइमखु, गाइमखु । छु दु जुइ उमिके अपाय्सकं, छु बिइगु जुइ उमिसं गुगु नेवालंं बिइमखु । वाह झी नेवाः ।

नेवाः त्याकेमाः धकाः हालाच्वनागु दँदँ दयेधुंकल । दक्वस्यां थू पहिचान माः, दक्वस्यां सिउ गुगु गुगु पार्टी त्यानावल धायेवं झीत माःगु दइ, अले सु सु त्यानावलकि झी झी जुयाः म्वायेखनी धकाः । तर नं झीगु ल्हाः उमिगु हे पार्टीया चिनय् छाप तयेत उलिउलि सनाच्वनी । थ्व गज्याःगु सम्मोहन? थ्व गज्याःगु अन्धभक्त?

त्वाःत्वालय् अज्याःगु पार्टीया ज्याकू चायेकीपिं, ज्याकुथिइ च्वनाः उमिगु पार्टीया बारे कनाच्वनीपिं अले व हे च्वामुचातय्गु न्हिपं ज्वनाः इरुथिरु जुइपिं झी हे नेवाःत जुयाच्वनी । अझ लाःसा उमि नेतां देय्या निंतिं वयात थ्व यात, व याइ थ्व याइ धकाः भाषण नं बिउवयाच्वनी । उलि यायेत हे उमिसं झी तता, तःमां यंकातःगु जुयाच्वनी, अले झी धाःसा छेँ थुनाबिउसां जिमि जिलाजनं थुनाबिउगु ला खःनि म्वाल का धकाः ह्ययेकाच्वनी । थ्व हे मखुला झीगु पहिचान?



का आः सुनां छु छु पार्टीयात भोट बियादिया उमिसं थःथःगु पार्टीया त्यानावःम्ह नेतां नेवाः पहिचानया लागि ज्या याःगु खः व क्यनाबिइमाल । उलि यायेफत धाःसा धाये । मेगु छु धाये ।

One thought on “पहिचान विरोधीयात भोट बियाः नेवाः राज्य हयेमाःपिं झी

  • December 9, 2017 at 9:45 pm
    Permalink

    छिं धैदीगुखं सछिया सछिहे पायछि खः।नपनापं खायुगु सत्य छुनंखःधासां थो झीनेवाःतयत जक कःगु ल्वोय मखु,नेपाःया दक्को जनजातितहे थो ल्वोचं ग्रस्त।अझ धायगुखःसा थो global virus खः।थुकिया नं कारणत दु,(छि) न्ह्याम्हेस्यां छें जः दै, जः यात माःगु फुक्कं नंसा त्वोंसा लासा तोपुसा ब्वोसा कासा अले न्ह्योने वनेगु लँ (न मो बा गि) दक्को म्वायत मदेक मगागु ज्वोलँ।वो दक्कोया भाला छेंया हामा यागु कपाले वै अले थो फुक्कं पुवङ्केत व छु फु व यानाः पुवङ्केगु वैगु भाला।समाजे म्वायत समाजया थो धेंधेंबल्लाखे ब्वोतीला कायहे माल।थःगु लजगा बाँलाःपिन्तला थोखं छूं पाइमखु, तर धेबादुतुकेगु छुं क्वात्तुगु लजगा मदुपिनिगु लागि छगु बिकल्प धैगु पार्टीया दुजः जुया अनं वैगु धेवाँहे थःगु फुक्क चाः मचाः पुवङ्काचोपीं छथोः दु।(नछि) अले मेगु छगु पुचः नयत त्वोनेत गापीं भचा बाँलाःगु पुने साःगु नय् न्हूगु छें दनाः चोने या म्हगस दुपीं भचा भचा सःस्यूपीं तर लजगा याना नय् मसःपीं, अजोपिनिगु लागींधासा पार्टी मप्युसे वालय्गु बूं।(स्वो)छूंहेमदुम्ह, भचा भचा दुम्ह, वा न्ह्याक्को दसाँमगाःम्ह, धेबाया लागिं स्यायतनं सीतनं लिमचीलीम्ह, पार्टी या बिचौलिया जुया गुन्दागर्दियाना नाँ नं दाँ नं दुतिनीम्ह(दन),उमिगु लागींधाःसा पार्टी
    तस्कं उर्बरा भूमी। (प्ये) लीपाँगु वर्ग धैगु पाँय् पाँय् धेवादुपीं पुस्तौं पुस्ता देनाः नयत गापीं… इमित मेगु छूनंम्वाँ, खाली नाँ छगुदःसा गाः।नाँयालागीं उमिसं थःगु सम्पत्ति या बाच्कं चखंछि पाय्तनं लिफमस्वोइपीं,अजोपिनिगु लागी छगुया छगुजक सस्था धैगु पार्टी हे ख।
    तर पार्टी धैगुनं निताजिगु दु। छताजि दुहावने सात्किहे फल वैगु आदेस पालना याना दाँ व नाँ कमाययाय् फैगु व ल्हापँ पुलाः नाँ कमायायदैगु अले नैतिक रुपं इमिगु दास जुयगु।
    मेगु बिचार सिधान्त नैतिक दाइत्वो व थःगु पुर्खा व सन्तति या गौरव या लागीं थःत पायगु।अन छुं कायगु मखु छुं बीगु जक जुइ।छायधास बीगुलागीं वोइके बिचार बाहेक मेगु छूंहे दैमखु।थजोगु पार्टी धनेनं जनेनं कङाल जुइगुला स्वोभाविक हे जुल।धन मदुपिनी म्वायगु तन्ता, मन दुपिङ्के धन मदु, धन दुपिङ्के मन।धन नं दु मन नं दुपिङ्के चेतना मदु।
    हः थोहे गन्जागोल यात ब्यबस्थित याय् मफया झी नेवा व जनजाति त ल्यूने लानाच्वोन।

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.