अाः मांया दुरुया ब्यापार

रेवती गुरुङ
अमृतया नं मू दइ ला? दइथें ला मच्वं, तर थ्व आधुनिक संसारय् न्याइपिं व मिइपिं दतकि न्हयागु बस्तुया नं मू दु । खः आः मांया दुरुया नं ब्यापार जू ।

अष्ट्रेलियाय् थौं कन्हय् अनया हाकु बजारय् मांया ताजा दुरुया ब्यापक ब्यापार जुयाच्वंगु दु ।
अन आः मांपिनि मस्तय्त दुरु त्वंकेम्हाःगु वा मलाःगु अले थः मस्तय्त व अमृत पाखें बंचित याये मजिउ धइगु धारणा ब्वलंगुलिं अन उपाय्सकं मनूया दुरुया ब्यापार जुया वःगु खः ।

आः तिनि अन छगू लिटर या १,००० डलरं इन्टरनेट मार्फत मिइगु जुयाच्वन धइगु खँ सार्वजनिक जूगु खः ।

मांया दुरुइ छगू किसिमया एन्टीबडी दइ गुकिं मस्तय्त ल्वय्तपाखें बचेयानातइ अले व विषेशयानाः मत्यवं बूपिं मस्तय्गु लागि ला मदयेक मगाः ।

अनया छम्ह मामं इन्टरनेटय् मांया दुरुया भाः तकसं थिकेगु खनाः गोल्डकोस्टय् च्वंगु मांया दुरु बैंकय् धाथें मांया दुरुया गुलि तुइ धकाः न्यंबलय् अन जुयाच्वंगु थ्व हाकु बजाःया खँ सिइदूगु खः ।

अनच्वंगु मदर्स मिल्क बैंक धइगु गैरनाफा मूलक संस्थां १.२ लिटरया ५० डलर कयाः मांया दुरुया ब्यबस्था यानावयाच्वंगु दु धकाः अनया निर्देशक मारिया र्यानं धाःगु दु । वं कुरियार मेल धइगु पत्रिकायात धाल, “जिं स्वये आः मनूत मांया दुरुया महत्वया बारे सियावःलिसे थुकिया माग अप्वयावयाच्वंगु दु ।”

वं अथेसां हाकु बजारय् न्यानाहयेगु दुरु भाइरस व ब्याक्टेरियाया टेस्ट यानामतइगु जुयाः थ्व हानिकारक जुइफु धकाः नं धाःगु दु ।

देशय् राष्ट्रिय रुपं दुरु बैंकया अभाव जूगुलिं अन मिस्त मछिंगु अवस्थाय् लानाच्वंगु खः अले उपिं देशया ब्यवस्था स्वयाः पिने मालेत बाध्य नं जुयाच्वंगु खः । उकिं वं देय्या हरेक अस्पतालय् दुरु बैंकया ब्यवस्था यायेत जोड नं बिउगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: