नारायण गोपाल लुमंकाः

मुंम्ह : श्याम कुमार मानन्धर

नेपाःया हे ज्वः मदुम्ह गायक नारायण गोपाल गुरुवाचार्यया थौं २७क्वःगु लुमन्ति दिं । छु बुराबुरि, छु ल्याय्म्हल्यासे, न्ह्याथज्याःम्ह मनूया नं नुगलय् थाय् कायेफुम्ह छम्ह हे जक अज्याःम्ह गायक जुइ वय्कः गुम्हस्यां नेपालय् गायकीयात प्रतिष्ठाया विषय दयेकाबिल, म्ये न्यनेगु धइगु नं साधना धायेकाबिल । थौं वय्कःयात लुमंकेगु दिं नं जुल ।



बिसं १९९६ असोजय् येँया किलागः त्वालय् बूम्ह नारायणगोपालं २०४७ साल मंसिर १९ गते थःगु नश्वर शरीर त्वःतादिल । जीवनलिसे संघर्ष यायां संगीतया साधना यायां अले थःयःम्हलिसे समाजया विरोधया बाबजुद नं.सफल जीवन हनाः वय्कलं नेवाः समाजया दुने छगू गनं स्वयेमदइगु नमुना जुयादिल । वय्कःया लुमन्तिइ थन वय्कःया जीवनय् जूगु छुं छुं अविस्मरणीय घटनात झ्वःछुनाच्वना ।
थः अबु आशागोपाल गुरुवाचार्यया हे प्रेरणां वय्कलं संगीत सयेकादिल तर वय्कःया म्ये हाले पह वयेकःया हे अबुयात मयेल । थुकथं वय्कःया जीवन संघर्षं जाल । न्ह्यागु न्ह्याथे यानाः नं वय्कलं नेपाली संगीतया ख्यलय् न्यासः स्वयाः यक्व म्येय् सः बियादिल अले स्वसः स्वयाः यक्व म्येय् संगीत बियादिल । थःगु ५१दँ जक तःहाकःगु जीवनय् वय्कलं थज्याःगु ततःधंगु उपलब्धि नं घय्पुना दिल अले तःकः निराश नं जुयादिल ।



नारायणगोपालयात धायेत ला स्वरसम्राट धाइ तर वय्कः न्हापां संगीत बिधाका लागि पुरस्कृत जुयादिल । २०२३ सालय् दकलय् न्हापां वय्कःयात रेडियो नेपालें सर्बोतम संगीतकारया पुरस्कार बिउगु खः ।

नारायण गोपालं न्हापा कुस्ती म्हितेगु नं सयेका दिइगु खः । अथे हे. वय्कः  ईतिहासया नं तसकं बांलाःम्ह विद्यार्थी खः ।
नारायणगोपालया नयेगु साप शौख यायेमाः । वय्कःया थम्हं हे नयेगु ज्वरे तकं यायेगु बानी दु ।

नारायण गोपालं पत्रकारिता नं यायेगु कुतः यानादिल । २०२८ सालपाखे “बागिना” नांगु पत्रिकाया सम्पादक जुयाः ज्या यानादिल तर व पत्रिका धाःसा ३ ल्याः स्वयाः यक्व मन्ह्यात ।

 

दकलय् न्हापां नारायणगोपालयात २०२८ सालय् कवि भुपी शेरचनं “स्वरसम्राट” धइगु नां बिउगु खः । लिपा थ्व उपाधि धाथेंया हे उपाधि जुयावन ।

प्रेमध्वज प्रधानं धयातःकथं वय्कः न्हापा न्हापा म्ये हालेगु धालकि साप मछाः अले न्ह्याबले थायेगु ज्याय् जक तक्यनाच्वनादी । लिपा पासापिनिगु हे करं जक रेडियो नेपालय् हालेगु पाखे झाल ।

वय्कलं छकः पूर्व पश्चिम राजमार्ग दयेकाच्वंबलय् हेटौंडाय् वनाः कुल्लिया ज्या तकं यानादिइगु धकाः अनच्वंम्ह गीतकार भीम बिरागं धयादीगु दु ।

छकः वय्कःया म्ये रेडियो नेपालय् थुलि थ्वल कि वय्कः थः हे अन वनाः थःगु म्ये यक्व महायेकेत अनुरोध याःझायेमाल धकाः वया पासापिन्सं कनातःगु दु ।

वय्कःया प्रेम दार्जिलिङया पेमाला लामालिसे जुल । न्हापां नापलाःबलय् वय्कःयात पेमालां नापालाःगु ई लुमंकाः म्ये हालादीत चुनौति बिल, वय्कलं स्वीकार नं यानादिल । अले वय्कलं नगेन्द्र थापायात म्ये च्वकाः हालाः पेमालायात उपहार हे छ्वादिल । थज्यागु का वय्कःया मतिना ।



Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.