कोलोराडोय् यःमरि पुन्हीया ज्याझ्वः जुल

झीगु संवाददाता

येँ, थिंलागा दुतिया, ११३८ । हलिमय् च्वंपिं दक्व नेवाःतय्गु छगू तःजिगु नखः यःमरि पुन्हीया लसताय् संयुक्त राज्य अमेरिकाया कोलोराडोय् च्वनाच्वंपिं नेवाःतय्ंसं आइतबार छगू ज्याझ्व तयाः यःमरि पुन्ही हन ।

नेवा खःल कोलोराडों आयोजना याःगु उगु ज्याझ्वलय् थी थी थाय् यापिं नेवाः व्यक्तित्वपिं वयाः ब्वति कयाः थःगु भाय्, जाति व साँस्कृतिक पहिचानया बारे थःथःगु बिचाः तःगु खँ बिआरटी नेपाल डटकमय् धयातःगु दु ।

आयोजक संस्था नेःवा खलःया सचिव मोहन श्रेष्ठं दक्वसित लसकुस यात अले श्याम श्रेष्ठं नेवाः समाजय् यःमरिया महत्व व उकिया इतिहास कनादिल ।

ज्याझ्वलय् नेपाली घरया पूर्व अध्यक्ष नारायण श्रेष्ठ, ओर्ड नेवा अर्गनाईजेसन माउन्टेण्ड साइया उपाध्यक्ष भुवन श्रेष्ठ, लायन्स क्लबया चेयर पर्शन जोशन श्रेष्ठ, बल्ड डोनर्स अफ अमेरिकाया केन्द्रीय सदस्य भुषणलाल श्रेष्ठ, लङ्गमण्ट हिमालयज् लायन्स क्लबया अध्यक्ष प्रमोद श्रेष्ठ, लगायतया बक्तातय्सं थःगु नुगःखँ कनेगु झ्वलय् नेवाः संस्कृति व परम्परा विशाल दु अले थुकिं नेपालयात हलिं दथुइ म्हसिइकेत सफल जूगु धारणा न्ह्यब्वसें थुकियात संरक्षण यायेत दक्वसिगु उतिकं जिम्मेवारी दूगु खँ न्ह्यथनादिल ।




ज्याझ्वलय् सहभागीपिन्त नेवाः जुयाया म्हसिका बिइकथं मनोज तुलाधरं नेवाः म्ये न्यंकादिल अले मोहन श्रेष्ठ व प्रमोद श्रेष्ठं नेवाः संस्कृतिया म्हसिका बिइगु धिमय् व धाः बाजं थानाः दक्वसित पलखया मनोरञ्जन नं बियादिल । अथे हे व हे संस्थां नेपाल संवत् ११३८या लसताय् न्हूगु नगुमां वा क्यालेण्डर नं पिथन । उकिया निंतिं ग्वहालि कथं विज्ञापन उपलब्ध यानादीपिं दातातय्त वयोवृद्ध बिष्णुभक्त श्रेष्ठं क्यालेण्डर लःल्हानादिल ।

विशेष यानाः कोलोराडोय् च्वंगु नेवाः संघसंस्थातय् प्रतिनिधि, अनया सामाजिक संस्थाया प्रतिनिधिया लिसें गैर नेवाः नेपालीत न्हापं दूगु उगु ज्याझ्वलं नेपाःया म्हसिका नेपालं पिने ल्यंकातयेत नेवाःतय्गु संस्कृतिया संबर्धन यायेमाःगु खँ जुल ।



Share this...
Share on Facebook
Facebook
Tweet about this on Twitter
Twitter

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.