नेवाःत राजनीतिक रुपं सक्रिय मजुल धाःसा नेवाःतय्गु पहिचान न्हनावनी : मल्ल

झीगु संवाददाता
येँ, ११३८ थिलाथ्व सप्तमि । नेवाः न्ह्यलुवा मल्ल के सुन्दरं नेवाः दक्व नेवाः मुद्दाय् संगठित मजुसे नेवाःतय्‌गु मुद्दा संवेदनशील मजूगु पार्टीया लिउलिउ जूगुलिं हे पार्टीतय्सं नेवाःतय्त राजनीतिक रुपं न्ह्यः वयेकेमबिउगु धयादिल ।

 

नेपाल संबत ११३८ न्हूगु दँया लसताय् भिंतुना कालबिलया लिसें देय्या थौंया राजनीतिक बिषययत कयाः जूगु ज्याझ्वलय् नवासें मल्लं थुलिमछि राजनीतिक परिवर्तन वल नं झीसं पुलागु करं झी मस्तय्सं थःगु मांभासं आखः तकं ब्वनेमखंगुलिइ असन्तोष प्वंकादिल ।

 

“नेवाःतय्सं थौं तक नं थ्व जनतां च्वःगु धाःगु संविधानय् थःगु पहिचान मालाच्वनतिनि तर थौंया शीर्षस्थ नेतात धाःपिन्सं आः राजनीतिक आन्दोलन सिधल धकाः उमित जक जिउगु व्यवस्थाय् झीत म्वायेत बाध्य यानाच्वन तिनि,” वय्कलं धयादिल ।
झी एमाले जुया कांग्रेस जुया वा माओबादी जुया — वय्कःया बिचाः कथं झी दलया दास जुयाः जक बिचाः यानाच्वना, झी झी गबलें मजुया, थथे जुयाः हे झी न्ह्याःवनेमफुगु खः ।

 

“झीसं राजनीतिक दलतय्त झीके दक्व फुक्कं बिइधुन, व दलतय्सं झीत छु बिल? समस्या थुथाय् लाक्क हे दु” वय्कलंधयादिल ।

राजनीतिक बिष्लेशक सीके लालं नेवाःत सलंसः दँनिसें नेवाःत राजनीतिक अधिकारं बंचित जूगु व आःतक नं थःगु अधिकार लितकायेत सघर्षशील मजूगुलिं आः भविष्यय् नेवाःत धइपिं हे छू मन्तर जुइगु खःला धकाः शंका तकं ब्वयादिल ।

वय्कलं धयादिल, “झी भत्तिइ वनाः राजनीति मखुपिनिगु ल्हातिइ लाःगु खँ ला ल्हाः वनाच्वना, तर थासय् वनाः बिरोध याःमवना, अले राजनीतिइ सक्रिय जुयाः नं न्ह्याः मवना । उकिं उमिसं झीगु सः मन्यंगु खः ।”

च्वमि स्नेह सायमिं नेवाःत थःगु आदिभूमिइ हे विस्थापित जुइमाःगु अवस्था वःगुया कारण आःया राजनीतिक व्यवस्थाय् नेवाःतय्सं थःगु उपस्थिति क्यनेमफुगुलिं खः धकाः धयादिल । वय्कलं नेवाःत राजनीतिक रुपं निष्क्रिय जूगुलिं हे सतक बिस्तारया लगायतया थीथी समस्या वयाच्वंगु धयादिल ।

“बिउबिउँ थःगु धन सम्पत्ति जक मखु म्ह्याय् मचा तकं नेताजूवःपिन्त बिया अथे नं उमिं नीति निर्माणया तहलय् थ्यनीबलय् नेवाःतय्त हे स्यंकेगु जक नीति दयेका वनी । थन झीगु थःगु हे व्यवस्था मवयेकं आः झी म्वाये तकं फइमखुगु अवस्था वयेधुंकल,” वय्कलं धयादिल ।

पत्रकार विश्लेषक युग पाठकं नेपाः बहुजाति व बहुसंस्कृतिक देश खः धासें नेवाःतय्सं हे नेपाःयात साँस्कृतिक म्हसिका बिउगुलिं नेवाःतय्गु साँस्कृति अधिकार थन सुनिश्चित जुइमाः धयादिल ।

 

उगु ज्याझ्वः १३ वडा ग्वाहालि पुचःया नायः दिल बहादुर मानन्धरया सभापतित्वय् कालिमातिया तक्ति टकेश्वरय् जुगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.