४०० दँ न्ह्यःया कार्तिक प्याखँ हुलां निसें आधुनिक साल्सा प्याखं हुला छगू हे दबुलिइ -स्वजन रघुवंशी

११३८ तछला थ्व पष्ठी /येँ

झीगु संवाददाता

“विश्वया दकलय् पुलांगु वियोगान्त प्याखं हुला कथं गिनिज बुकय् ग्रीकया ट्रयाजिक डान्स फर्मयात कयातःगु दु तर व प्याखं हुला लोप जुइधुंकल । नेपाःया कार्तिक प्याखं नं व हे फर्मय् ला गुगु झी नेवाःतय्सं अझं म्वाकातःगु दनि । थ्व सम्पूर्ण नेवाः जातिया नितिं गर्व याये बहःगु खँ खः” – थ्व धापू शताब्दि पुरुष संस्कृतविद सत्यमोहन जोशीजुं धयादिल ।

किपाः रेखा शाक्य

वय्कःया थ्व धापू वंगु आइतबाः येँया राष्ट्रिय नाचघर जमलय् व हे कार्तिक प्याखंया छम्ह तसकं लोकंह्वाम्ह नर्तकीया रुपय् प्याखं हुलामि स्वजन रघुवंशीया याक सनिल -२०७५ य् थःगु नुगः खँ तयेगु झ्वलय् मन्तब्य प्वंकादीगु खः ।

नेपालय् हे दकलय् न्हापांगु खुसिइ लाइभ वाद्यवादनया लिसें म्येया नापनापं थी थी ७ गू बिधाय् स्वजन रघुवंशी याकः सनिलया नामं जूगु ज्याझ्वलय् थःगु प्याखं न्ह्यब्वःगु खः । ज्वजलपा प्याखनं न्ह्याःगु वय्कः प्रस्तुति लोक प्याखं, कत्थक, भरतनाट्यामया ज्वजलपा व कार्तिक प्याखंया द्यः ल्हायेगु धुंकाः दँय्दसं कार्तिकं मंगलबजाःया दबुलिइ जक क्यनीगु प्याखं अन्तर्गत उषाहरणलीलाया कुमार प्याखंया ब्वः न्ह्यःब्वःगु खः ।

किपाः अाकाश राजाेपाध्याय

 

प्याखं हुलेगु झ्वलय् हे चर्या प्याखंया दुनेलाःगु पंचकपाल प्याखं बौद्ध परम्पराया दुने नं महायान सम्प्रदाय दुनेया प्याखं नं दकलय् न्हापांगु खुसिइ सार्वजनिक रुपं न्ह्यःब्वःगु खः । कत्थक प्याखनय् गोल्डमेडलिस्ट रघुवंशी भरतनाट्यमया धुंकाः आधुनिक प्याखं साल्सा डान्स कृपा बज्राचार्यया लिसें हुलादीगु खः । दकलय् लिपा सकलें मांपिन्त श्रद्धायाना मां प्याखं हुलाः याकः सनिलया समापन जुल ।

किपाः अाकाश राजाेपाध्याय

वाङमय शताब्दि पुरुष संस्कृतिविद् डा. सत्यमोहन जोशी व नृत्य विधाय् नेपाःया न्हापांम्ह मिसा प्राध्यापक हनी श्रेष्ठपाखें नाटेश्वरया मूर्तिइ पुजा यासें नापं त्वाः देवाय् म‌ंकाः कथं मत च्याकाः ज्याझ्वःया विधिवत शुरुवात याःगु खः । ज्याझ्वलय् कलाकार स्वजन रघुवंशीया परीचयात्मक भिडियो नं क्यंगु खः ।

किपाः अाकाश राजाेपाध्याय

उगु ज्याझ्वः नृत्य निर्देशक संघ नेपाल, ललितपुर शाखा व सांस्कृतिक संस्थानया मंका ग्वसालय् जुगु खः ।

किपाः अाकाश राजाेपाध्याय

One thought on “४०० दँ न्ह्यःया कार्तिक प्याखँ हुलां निसें आधुनिक साल्सा प्याखं हुला छगू हे दबुलिइ -स्वजन रघुवंशी

  • June 19, 2018 at 3:43 pm
    Permalink

    नेपाल र नेवार समुदायको गौरव । संस्कृतिले समृद्ध नेवार समुदायको संस्कृति जोगाऔं । विश्वमा नेपालको गौरव सगौरब प्रस्तुत गरौं । नेवार समुदायले गल्ली गल्ली चोक चोक सडक सडकमा सार्वजनिक रूपमा मानव कल्याणका खातिर हरेक घडी मौसम र समय समय सापेक्ष सुसंस्कृत गरेका छन् । त्यसैले नेवार जोगाऔं समृद्ध संस्कृत जोगाऔं र नेपालको परिचय जोगाऔं । अरूलाई पनि जानकारी गराऔं ।

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.