२४ क्वःगु महानगर दिवस तःजिक न्ह्यात

https://www.facebook.com/rajendra.manandhar.7906

ने सं ११३९ थिंलाथ्व नवमी । येँ

झीगु सम्वाददाता

येँ महानगरपालिकां  महानगरपालिका स्थापनाया  २४ क्वःगु महानगर दिवस म्हिगः तःजिक हनेगु नितिं विधिवत उलेज्या यात । स्वन्हू यंकं तसकं न्ह्याइपुक व  उत्साहपूर्वक महानगर दिवसयात छगू न्ह्याइपु महानगर महोत्सवया रुपय् सर्वसाधारणयात तकं दुथ्याका हनेगु उहः कथ‌ं म्हिगः मंसीरया  २९ गते शनिवाः  महानगर दिवसया लिसें महोत्सवयात हंगु खः ।

येँ महानगरपालिकाया मेयर विद्यासुन्दर शाक्यया नायःसुइ न्हापांगु दिंया ज्याझ्वःया उलेज्या  उप–प्रधानमन्त्री तथा रक्षा मन्त्री ईश्वर पोखरेलजुं यानादिगु खः । वय्कलं त्वाः देवाय् मत च्याकाः ज्याझ्वःया विधिवत उलेज्या यानादिगु खः । अथेहे  येँ महानगरपालिकाया उपमेयर हरिप्रभा श्रेष्ठ खड्गीजुं लसकुस न्वचु ब्यूसें सकलसिया न्ह्यःने थःगु बिचाः प्वंकादिल ।

किपाः नृपेन्द्र श्रेष्ठ

उगु हे झ्वलय् येँ महानगरया अमूर्त सम्पदा कथं कयातःगु  परम्परागत माैलिक संस्कृति बाजंया संरक्षण याय्गु ताःतुनां  मुक्क‌ं सच्छिव नीछम्ह बाद्य गुरुपिन्त म्हतिं  नीन्याद्वः तका  नगद नाप हना पौ बिया सम्मान न यागु खः ।

अथेहे हे   १०  संचाकःमि  (नागरिक दैनिक – खिलक बुढाथोकी, कान्तिपुर दैनिक – दीपेन्द्रबहादुर बिष्ट, अन्नपूर्ण पोष्ट दैनिक – छेटु शेर्पा, नयाँ पत्रिका दैनिक- पुष्प ढुङ्गाना, अनलाइन खवर- रविन्द्र घिमिरे, १२ खरी अनलाइन- सुरञ्जन घिमिरे, एभिन्युज टेलिभिजन- रामशुभक महतो, उज्यालो एफ. एम. –  सिल्भिया राजोपाध्याय, संस्थागत रुपं नेवाः एफ. एम. – नविन महर्जन व  सम्यक साप्ताहिक- सुगतरत्न सिन्धुराकार)  पिन्त ५० द्धः तका नगद नाप “महानगर शुशासन प्रवर्धन पुरस्कार २०७५” न बिइगु लःल्हाःगु खः ।

किपाः नृपेन्द्र श्रेष्ठ

उगु हे ज्याझ्वलय् येँया न्हापाम्ह मेयर जनकमान श्रेष्ठ नापं बहाल करपाखें वडा २६ या दयाकुमारी पाण्डे व लक्ष्मी चपलिया पाण्डेयात व व्यवसाय करपाखें वडा २२ या मार्ट बटु व वडा ११ या पि एशोशिएसनयात करदातायत  सम्मान याःगु खः । नापनापं महानगरया २५ दँ तक सेवायाम्ह निर्देशक शिवराज अधिकारी, नायब सुब्बा सुरेन्द्र शाक्य व मेकानिक विकास गुरुङ्यात दीर्घ सेवा पदक लःल्हागु खः ।

थौंया ज्याझ्वलय् महानगर दुनेया ब्बनेकुथि “उत्कृष्ट विद्यालय पुरस्कार” सामुदायिक विद्यालयपाखें जनजागृति ज्ञानरश्मी माद्यमिक बिद्यालय, बालाजयात १ लख ५० द्धः नगद न्हाप ( गीतामाता माद्यमिक बिद्यालय), बिजेश्वरीयात ल्यू व श्रम राष्ट्रिय माद्यमिक बिद्यालय, चाबहीयात लियांल्यू सिरपाः कथं  ७५ द्धः व ५० द्धः तका लःल्हागु खः । अथेहे संस्थागतपाखे नयाँ बानेश्वरया भ्याली भ्यू ब्वनेकुथि न्हाप, केएमसि स्कूल, बुद्धनगर ल्यू व द एक्सेल्सियर स्कूल, स्वयम्भूयात लियांल्यू कथं हंगु खः ।

येँ महानगर दिवसया लसताय्  स्वन्हु यकं काठमाडौं महोत्सव न्ह्याकेगु ग्वसाः कथं म्हिगःनिसें पाैष २ गते महाेत्सव नं न्ह्याःगु दु । काष्ठमण्डप, यट्खा बहाः, न्यत, टेगः, क्षत्रपाटी, थँबहि, ज्याठा, थँहिटी, ध्वाकाबहाः, असं, न्हायकंत्वाः बाँगेमुढा, भ्याचाद्यः जनबहाः , किलाघः, इटुम्बहाः, वंघः, मखं, हनुमानध्वाका, बसन्तू, ओम बहाः, लगं, ब्रम्हत्वाः, जैशी देवल, कोहिटी, भिंद्यःत्वालय् थुगु महोत्सवया लसताय् थी थी नसात्वंसाया स्टल तःसें म्हिगः निसें महाेत्सव नं  न्ह्यानाच्वंगु दु ।

म्हिगःया  ज्याझ्वलय् प्रदेश न. ३ या मुख्यमन्त्री बिशेष पाँहा कथं झायादीगु खःसा प्रतिनिधि सभाया सांसदपिं जीवनराम श्रेष्ठ, रामबीर मानन्धर पुलाम्ह मेयर नाप प्रदेश सभाया सांसद केशब स्थापित पाँहा कथ झायादीगु खःसा नापनापं महानगरलिसें सम्बन्धित वडाया अध्यक्षपिंलिसें अन्यगन्यमान्य व्यक्तित्वपिनिगु सहभागिता दूगु खः ।

किपाः नृपेन्द्र श्रेष्ठ

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.