१६ वडाया युवा तथा स्वयम् सेवक भेला कार्यक्रम सम्पन्न

झीगु संवाददाता 

११३८ तछला गाः दितीया

यल महानगरपालिका वडा नं १६ या ग्वसालय् म्हिगः युवा तथा स्वयम् सेवक भेला ज्याझ्वः सम्पन्न जुल ।

ज्याझ्वःया मू पाहाँ यल महानगरपालिका वडा नं १६ या अध्यक्ष निर्मल रत्न शाक्यं महानगरपालिकाया विपद् व्यवस्थापन ज्याझ्वलय् सक्रिय सहभागिता क्य‌ंपिं युवातय्त सुभाय् देछाया दिल । लिसें वइगु दिनय् नं युवापिनिगु सक्रिय सहभागिताया अपेक्षा यासें युवा सहभागितापाखें हे सामाजिक विकास, आर्थिक विकास सम्भव जुगुलिं युवातय्गु हरेक ज्याखँय् गुहालि यायेत नगरपालिका न्ह्याबलें तयार दुगु खँ धयादिल ।

किपाः रेखा शाक्य

वडाया जिम्मेवार पदय् च्वना ज्या यायेबलय् वइगु अनेक कठीनार्इ व चुनौति वावजुद नं थःगु त्वालय् वा वडाय् वइगु हरेक कथंया समस्यायात ज्यंकेगु हे मू ज्या खः धाःसें थज्यागु ज्याय् विशेष याना युवा वर्गयात नापं यंके फतधाःसा मू वंगु सुझावया लिसें ज्यां निरन्तरता नं काइगु व सफलता नं चूलाइगु खँ कुलादिल ।

१६ वडाया सल्लाहार संयोजक दिलिप जोशीं थःगु नुगः खँ तयेगु झ्वलय् समुदायया दायित्व धइगु हे समुदायया विकास यायेगु खः , समुदायया कुतलं हे समुदायया उन्नति जुइगु खः धयादिल । यलय् दिपा काये धुंकुगु गँप्याख‌ंयात समुदायया कुतलं हे न्ह्याकेगु ज्या जुगु व यलया हे ऐतिहासिक प्याखं कार्तिक नाचयात नं  निरन्तर रुपं न्ह्याके फयाच्वंगु धइगु नं सकल युवा समुदायया हे प्रयासं संभव जुगु खः उकिं थःगु वडायात हलिमय् सम्पन्न व सुव्यवस्थित यायेगु ज्या धइगु युवात सक्रिय जुसा जक हे जुइगु खँय् बः बियादिल ।

किपाः रेखा शाक्य

१६ वडाया युवातय्त सक्रिय रुपं न्ह्यःज्यायेत विज्ञ अनिल चित्रकारजुं थी थी खँयात दसूया रुपय् न्ह्यःब्वसें दकलय् न्हापां थः बने जुइमाल अले थःगु वडायात दयेकेमाः धयादिल । जब तक थःम्हं यानागु ज्यां थःगु तुतिइ धिसिलाक चुइफइमखु अबलय् तक यायेगु ज्यां पूर्ण रुप मकाइगु धाःसें यदि थःगु वडायात सबल यायेगु खःसा वडाया ज्याखँय् थःम्ह गुकथं तिवः बिइफइ अले वडा पाखें नं थःपिन्त गुकथं गुहालियाइ धइगु नितां खँयात व्यवस्थित याना पलाः न्ह्याकेमाःगु हे थौंया आवश्यकता खः धयादिल ।

किपाः रेखा शाक्य

म्हिगःया युवा भेलां वडाया नितिं गुकथं ज्या यायेगु व युवात थुकिइ गुकथं सक्रिय जुइगु धइगु बारे सहलह ब्याकाः ठोस निर्णय नं
काइगु जुगु दु ।

किपाः रेखा शाक्य

नापनापं ज्याझ्वःया संयोजक विजय महर्जन, दिपक पोखरल, कृष्ण महर्जन, दिलिप जोशीं नं युवातय् दायित्व व युवा परिचालन सम्बन्धय् थःथःगु नुगः खँ तयादीगु खः ।

ज्याझ्वलय् थी थी वडाया अध्यक्षपिंया लिसें आपालं युवात व स्थानीयवासीपिनिगु ब्वति दुगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.