११.५७ बजेया साइतय् चीर धस्वाकिगु

११३८ चिल्लाथ्व अष्टमी/येँ

झीगु संवाददाता

 

थौं चिलाथ्व अष्टमीया दिनस नेपाःया पञ्चांग निर्णयक समितिं ब्यूगु साइत कथं येँया हनुमानढोका दरबार परिसरया दक्षिण पटांगिनीया गद्दी बैठक बसन्पुरय् सायमितय्गु धालसिक्व सनाः गुथियार पाखें सुथसिया ११.५७ बजेया साइतय् चीर धस्वाकिगु जूगु दु ।

विधिवत रुपं साइतय् चीर धस्वाकूगु गुरुजु पल्टन साक्षाी तया । किपा रेखा शाक्य

गुरुजु पल्टनया सलामिलिसें तोप तयाः चीर धस्वाकेवं विधिवत रुपं थुगु दँया होली पर्व शुरु जुइ । थुकथं हे हनुमानढोकाया दरबार दुनेया हनुमान द्यःगः जगन्नाथया लिसें कालीदमन चुक, नासः चुक, मोहनकाली चुक व दाख चुकय् नं परम्परा कथं हे उगु हे साइतय् चीर धस्वाकी ।

धालसिक्वः गुथिया साय्मिपिं । किपा रेखा शाक्य

थुगु दिंयात धकाः चीर धस्वाकेत गुहेश्वरीया जंगलं मयल जातया पं हइगु व कचाः हइगु खःसा थुगु पंथय् थी थी उँया कापः कौषीतोष खानां तइगु खः । अले थुगु गुठीयात धकाः छुं छुं बजेट नं बियातःगु दु ।

थुगु चीर धस्वाकेगु पंया हाकः ३२ फुट दइसा पंया च्वय् स्वंगु तकि जुइकथं चाकलाःगु आकारया गोलाकार दयेकी । गुगुया ब्याः ५, ६ व ७ इन्चया गोलाकार जुइ । उकिइ थी थी रंगीचंगी कापत पंथय् घाकाः सुयातःगु दइ । कापः थुलि हे ताः जिया वा थ्वकू हे दयेमाः धैगु मदुसां अन्दाजी १७ निसें २० रंगया कापः मुक्कं ७५ निसें ८० टुक्रा कापःत दइ । थौंया विधिवत रुपं चीर धस्वाकूगु स्वयेत आपालं जनमानसया नं उपस्थिति दइ ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.