हेरामोति

शेयर यानादिसँ

रेखा शाक्य

मोहनीया ई । सचूकुचु यायेगु ई । क्वथा छगुलिं सफू चातुवानाच्वंगु । नुगः गरखेसे च्वं मस्यू छाय् ? सफू धुलं गयाः च्वंगु खनाः । झ्यातुगु नुगः थातं तयाः ल्हाः न्हयाका । छपाः सफू कयाः फरररं पुइका । दथुइ कानाच्वंगु छपाः भ्वं । जितः स्वया ल्हाः ब्वयेकाच्वंगु खना । तीजक कया । लथ्यानाः पुइं चिने धुंकूगु व भ्वँतं जिगु नुगः चिंक मिंकाबिल ।

ल्हाः थरथर खात । मिखाय् मचायंक ख्वबि लँय्पुगु वाः चाल । मिखा छकः न्याक तिस्सिना । व भ्वंतं जितः झिदँ न्ह्यःया ई लुमंका बिल । वाक्कु छिनाः मिखाया ख्वबि धाःयात पनेगु कुतः जिगु । तर जि असफल । जिगु मिखां ख्वबि हायाः व हे भ्वंतय् च्वयातःगु आखः ग्वलय् तिकिनन ।



हिरामोति थें जाःगु जिगु व ख्वबि चिसवाः लःया रुप कयाः आखः ग्वलय् लायेवं भ्वंतय् सुनावन । आखः बुलुसे च्वन । गःपः थपाय्पु जूगु थें सासः हःहः पनाः दिपा काइथें जुल । न्यतालय् ख्वबिं चुंइक पुकाः जितः होशय् थनाबिल । अले हाकनं स्वचालित जिगु मिखा व भ्वंया आगं स्वयेत आयबुल ।

जि यःम्ह बा मां,
दकलय् न्हापां क्षमा फ्वना च्वना । जि, छिमिगु विश्वासया पात्र जुइमफुगुलिं ।
थौं तसकं निराश जुया थ्व पौ च्वयेत बाध्य जुल । जिं यानागु जिगु कर्मक्षेत्रया पलाखय् मस्यू गन व गथे जुया ध्याचलं कित अले खतं नल । जिं थुइका बिइगु लाख कुतः यात न्हायपनं न्यना मबिइवं अले थुइका भलसा मबिइवं जि हाःनाः मदुम्ह जुइत बाध्य जुल ।

उकिं जि छिपिं पाखें …

जिं ब्वना तुं यंका । उकिइ च्वंगु छगः छगः खँग्वलं जितः अतितय् साला यंकल । जिगु न्ह्यःने छगू धुंकाः मेगु दृश्य संकिपाया लू जुया हिस्यावल । जिं ब्वने मफुत । जिगु म्हगः क्वालखं लूगु थें जुल । जितः उकुसमुकुस जुल । जि हाकनं छक चिच्याय्दनाः ख्वये मास्तिवल । काचाक्क भ्वं ग्वारा चिना ।

तितिपापा याना तयागु व भ्वं नं जितः थौं मयल । जिं व इलय् नयागु हरेक अपमान, दुख, मानसिक तनाव अले जीवन पाखें वितृष्णा जूगुया आगंया धकिं उलाः खँग्वलं कियातयागु दस्तावेज खत व भ्वं ।



जिं उबलय् थःत चिइ मफुगु खःसा थ्व भ्वंतय् च्वंगु आखलं सार्थकता काये धुंकूगु खइ । तर थः थःम्हं हाकनं छकः याकः हे दनेगु कुतःया लिच्वः हे खः थ्व भ्वं सफूया दथुइ कानाच्वंगु । थ्व दथुइ जिगु मिखां हाःगु ख्वबि नं त हिरा जुइफत न त मोति हे । तर थौं जिं जीवनया न्हूगु लँपु लुइके धुनागु ई ।

निराशा मखु आत्मसम्मानयात ढाल दयेका म्वायेमाः धकाः तिब बिइम्ह पासाया नितिं म्वानाच्वनागु ई । जिगु मिखाया व बेमौसम बाः वइगु ख्वबिया मू थुइका बिउम्ह पासाया ख्वाः लुमन । वयागु हपाः व तिबः लुमन अले लुमन व ई गुबले जिगु मिखां ख्वबि हाःगु इलय् बँय् लाइभनं थःगु ल्हातिइ फयाकाःगु खः ।

अले धाःगु खः थ्व ख्वबि मखु जिगु नितिं हिरामोति खः । छंगू थ्व ख्वबि दुखय् मखु सुखय् हाःगु स्वये यः जितः ।
न्हाचः तक दुखया किचलं लँय्पूगु ख्वबि वया लुमन्तिं मचायकं हिरामोतिया चमक ज्वना मिखाय् टिलपिल जूगु वाः चाल । वयागु क्वातुगु तिबः लुमन ।

वयागु भलसा लुमन अले लुमन वयागु जि प्रतिया च्यूताः ।

ल्हातय् ग्वाराचिना च्वंगु भ्वं झ्यातुया वल । झ्यालं स्वया पपुइक वांछ्वया बिया । मिखा सिचुल । नुगः याउँसे च्वन ।


Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.