हिउपाः बाखंया समीक्षा पूर्णकाजी पाखें

११३८ चाैलाथ्व षष्ठी/यल

समाजय् जुयाच्वंगु महिला हिंसा न्हंकेत व लैङ्गिक समानताया नितिं नारीवर्ग सबल व सचेत जुयाः न्ह्यज्यायेत, न्ह्यज्यांवनेत प्रेरित यानातःगु कथाबस्तुइ केन्द्रीत जूगुलिं सफूया नां ‘ह्यूपाः’ पाय्छि जूगु खँ थाैं जूगु हिउपाः बाखंयात कयाः समीक्षा यायेगु झ्वलय् समीक्षक पूर्णकाजी ताम्राकारजुं खुलस्त यानादिल ।

झीगु समाजय् ब्वलनाच्वंगु सामाजिक कुरिति, पारिवारिक रितिरिवाज, झीत वयाच्वंगु अव्यवस्थित परिस्थितियात बाखंया विषयवस्तु दयेका तःगु समय सापेक्ष जूगुलिं नं हिउपाः हे बाखं सफूया नां तसकं उचित जूगु खँ धयादिल ।

नारी समस्यायात कयाः च्वयातःगु भवानी तुलाधरया बाखं वंगु छुं ला न्ह्यः पिहाँवःगु खः । व हे सफूयात कयाः थाैं नेपालभाषा परिषदया ग्वसालय् छगू ज्याझ्वः यासें बाखंया  विषयवस्तुयात कयाः समीक्षात्मक दुवाला जूगु खः ।

‘ह्यूपाः’ बाखं मुना सफुतिं झीगु समाजय् पिल्हुयाच्वंगु विकृति, विसंगती, कुरिति, महिला हिंसा आदि घटनायात कयाः न्हाय्कं थें यथार्थ चित्रण यानाब्यूगु खँ  ज्याझ्वःया नायः  प्रा. सुर्वण शाक्यजुं नुगः खँ तयेगु झ्वलय् धयादिल ।

ज्याझ्वलय् नविन चित्रकारया लिसें अन्य भाषासेवी व साहित्यह्यमिपिनिगु उपस्थिति दुगु खःसा  श्रीराम श्रेष्ठ, बंशीधर बज्राचार्य, दिब्या ताम्राकार, महेश मान डंगोल ‘लँजुवाः’ पाखें सफुतिइ दुथ्याःगु बाखं व समीक्षायात कयाः थःथःगु प्रतिकृया नापं न्ह्यसः नं तयादीगु खः । वय्कःपिनिगु न्ह्यसःयात च्वमि मय्जु तुलाधरं लिसः नं बियादीगु खः ।

 

बुखँ नेवाः सूचना केन्द्र
किपा राजेन्द्र रञ्जित