fbpx

हाइकु मुना ‘बुंगाःचा’ सफू बजारय्

झीगु सम्वाददाता ११३९ चौलाथ्व १५

साहित्यिक विधाया तःगु विधा मध्य हाइकु स्वझ्वःया चिनाखँया छगु साहित्यक विधा खः । हाइकु जापानी खँग्व खः । हाइ+कु=नर+अभिव्यक्ति अर्थात् मानव अभिव्यक्तिया छगु स्वतन्त्र माध्यम खः । सहज अनुभुति व सहज अभिव्यक्तिया माध्यम हाइकु खः । म्हो खँग्वलं यक्व खँ कनाच्वनिगु काव्यिक सृजना हाइकु खः । खँग्वलं मधागु खँ नं लुयावइगु चिन्तन खः हाइकु । थुकिइ हे दुबिना छगू दशक निसें साहित्य सिर्जनाय् थःत पानावयाच्वम्ह साहित्यकार धर्म राज राजकर्णिकारया न्हापांगु हाइकु मुना सफु ‘बुंगाःचा’ वंगु शुक्रबा यलया साटोआकी भवनय् उलेज्या जूगु दु । नापं हाइकु म्ये नं पितब्युगु दु ।

फोटो – शरण ज्यापु हरि

अन्तर्राष्ट्रिय हाइकु दिवसया लसताय् जुगु थुगु ज्याझ्वलय् मूपाहाँ शताब्दीपुरुष सत्यमोहन जोशीं पिनें वःगु साहित्य काये हे मज्यू धयागु मखु बांलाःगु न्ह्यागु देय् यागु जूसां ज्यू तर थःगु ख्वाः बुलुया मवनीगु, थःपिनिगु पहिचान मतनीगु कथं कायेमा धैदिसें हाइकुयात कम्पोज याना लसय्हना म्ये दयेकादिगुयात सुभाय् नं देछानादिल ।

समालोचक इन्द्र मालीं हाइकुया इतिहासया खँ न्ह्यथसें हाइकुलय् धयातःगु खँ स्वयां धयामतःगु खँ अप्वः दयाच्वनीगु व विरोधाभास खँ त दयेमागु बिचाः प्वंकादिल ।

फोटो – शरण ज्यापु हरि

फोटो – शरण ज्यापु हरि

मुक्कं ५६पु हाइकु दुथ्यागु हाइकु मुना सफु ‘बुंगाःचा’ देगः म्हिचा सफूपाखें पितब्युगु खःसा थुकिया मू ७५।– तका दु ।

 

Leave a Reply

Your email address will not be published. Required fields are marked *