हलिं नेवाः मुनाया लसताय् एकेडेमीया सफू ब्वज्या जुइगु

 

११३८ चाैलाथ्व दशमी/येँ 

 

वर्ल्ड नेवाः अर्गनाइजेशनया ग्वसालय् थ्वहे मार्चया ३० व ३१ (चौलाथ्व चतुर्दशी व पुन्हि) तारीख निन्हु यंकं येँ जुइत्यंगु हलिं नेवाः मुनाया लसताय् नेपालभाषा एकेडेमीया ग्वसालय् छगू तःजिक सफू ब्वज्या जुइगु जूगु दु ।

 

थूगु सफू ब्वज्या तालाकेया निंतिं एकेडेमीया प्राज्ञ दुजःपिं विजयरत्न असंबरे व प्रा. प्रेमशान्ति तुलाधरया कजिसुइ छगू उप समिति निस्वंगु खँ एकेडेमीया सदस्य सचिव मल्ल के सुन्दरं जानकारी बियादीगु दु ।

 

नेपालभाषाया साहित्य व वाङमययात हलिंमय् न्यंकभनं च्वना वया च्वंपिं नेवाःत दथुइ थ्यंकेगु ताःतया ग्वसाः ग्वःगु थ्व सफू ब्वज्याय् नेपालभाषा एकेडेमीया पिथनाया नापनापं आपालं मेमेपिं सफू पिथनामिनिगु नं स्टल दइगु खँया जानकारी ब्वज्याः समितिया कजि असंबरें जानकारी बिया दिइगु दु ।

वर्ल्ड नेवाः अर्गनाइजेशनया ग्वसालय् जुइत्यंगु हलिं नेवाः मुनाया लसताय् नेपालभाषा एकेडेमीया ग्वसालय् स्वन्हु यंकं जुइत्यंगु सफू ब्वज्याय् थुकथं उत्साहित जुया आपालं पिकाकःपिन्सं ब्वति कायेगु बचं ब्यूगु खँयात कया एकेडेमीया चान्सलर चित्तरञ्जन नेपालीं छगू च्वछाय् बहःगु खँ खः धका लसता प्वंका दिइगु दु ।

बुखँ विजय रत्न असंबरे

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.