स्वीडेन व इंग्ल्याण्ड क्वाटरफाइनलय्

११३८ तछला गाः षष्ठी

विश्वकप २०१८ अन्तर्गत म्हिगः राउण्ड अफ १६ या अन्तिम दिंया कासा स्वीडेन व इंग्ल्याण्ड क्वाटरफाइनलय् थ्यंगु दु ।

किपाः रियुटर्स

म्हिगः क्वचाःगु न्हापांगु कासाय् स्वीडेनं स्वीट्जरल्याण्डयात १–० गोलं बुकुगु दु । दिपा तक बराबरी जुगु कासाय् दिपा लिपा ६६ औं मिनेटय् स्वीडेनं गोल याःगु खः । स्वीडेनया इमिल फोर्सबर्ग थ्वाःगु बल स्वीट्जरल्याण्डया कासामीया तुतिइ लाना डिफ्लेक्ट जुसें गोल जुगु खः । कासाया अन्तिम इलय् स्वीट्जरल्याण्डया कासामि माइकल ल्याङं ह्याउँगु कार्ड नःगु दु, गुगु थुगु विश्वकपया प्यंगूगु ह्याउँगु कार्ड खः ।

किपाः रियुटर्स

अथेहें म्हिगः हें क्वचाःगु मेगु कासाय् इंग्ल्याण्डं कोलम्बियायात पेनाल्टी सुट आउटय् १(४)–१(३) गोलं बुकुगु दु । दिपा तक बराबर म्हितुगु खसां दिपा लिपा ५७ औं मिनेटय् इंग्ल्याण्डया नितिं पेनाल्टी मार्फत गोल याःगु खः । कासाया इन्जुरी टाइमय् कोलम्बियाया येरि मिनां बराबरी गोल यासें कासा थप ईया दुने वंगु खः । थप ई दुने नं बराबर जुसेलिं कासा पेनाल्टी सुट आउट पाखे न्ह्याःगु खः । गुकिइ इंग्ल्याण्डं त्याकाः क्वाटरफाइनलय् थ्यंम्ह अन्तिम टिम जुगु दु । इंग्ल्याण्ड छुं नं तःधंगु कासाय् पेनाल्टी सुट आउटय् त्याःगु थ्व निक्वःगू खुसिइ खःसा सन् २००६ लिपा विश्वकपया क्वाटरफाइनलय् थ्यंगु दु ।

क्वाटर फाइनल कासा शुक्रबाः व शनिबाः जुइ । शुक्रबाः उरुग्वे विरुद्ध फ्रान्स ७ः४५ ताःइलय् व ब्राजिल विरुद्ध बेल्जियम ११ः४५ ताःइलय जुइ । अथेहे शनिबाःस्वीडेन विरुद्ध इंग्ल्याण्ड ७ः४५ ताःइलय व रसिया विरुद्ध क्रोयसिया ११ः४५ ताःइलय् जुइ ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.