स्वीडेनया न्ह्यःने स्विट्जरल्यान्ड, इङ्गल्यान्डयात कोलम्बियाया चुनौती

 

११३८ तछला गाः पंचमी

थौं राउन्ड अफ १६ या अन्तिम कासा कथं स्वीडेन विरुद्ध स्वीजरल्याण्ड ७ः४५ ताःइलय् व कोलम्बिया विरुद्ध इंग्ल्याण्ड ११ः४५ ताःइलय जुइ ।

स्वीडेनया न्ह्यःने स्विट्जरल्यान्ड
विश्वकप फुटबल कासाय् ज्लाटन इब्राहिमोभिच विना नं स्वीडेनं बांलाक प्रदर्शन यानाच्वंगु दु । स्वयम स्टार स्ट्राइकर इब्राहिमोचिं थुकीयात स्वीकार याःगु दु । स्वीडेनविरुद्ध म्हितेत दक्वसितं थाकुइगु जुइ  आः – एलए ग्यालेक्सीइ आवद्ध इब्राहिमोभिचं धाल ।

किपा गुगल

यान एन्डरसनया टिम स्वीडेन क्वाटरफाइनलय् थ्यन धाःसा व खुगूगु वरीयताप्राप्त स्विट्जरल्यान्डया पलेसा जुइ । युरोपया निगू म्हो कथं कयातःगु फुटबल राष्ट्र दथुइ थौं मङ्गलबार सेन्ट पिटर्सवर्गय् प्रिक्वाटरफाइनल जुइत्यंगु दु । निगुलिं टिम यक्वः लिपा क्वाटरफाइनलय् थ्यंकेगु दाउलय् दु ।

स्विट्जरल्यान्ड न्हापाया इलय् सन् १९५४ स विश्वकपया क्वाटरफाइनलय् थ्यंगु खः । अथेहे, सन् १९९४ स अमेरिकाय् जुगु विश्वकपय् लियांल्यू लाये धुंकाः स्वीडेनं प्रिक्वाटरफाइनल कासा त्याके फुगु मदुनि ।

स्विट्जरल्यान्ड कठिन यात्रासहित नकआउटय् थ्यंगु खः । न्हापांगु कासाय् रक्षात्मक कासा म्हिता ब्राजिलयात १–१ गोलं बराबरीइ दिपा काःगु स्विट्जरल्यान्डं अनलिपा लिउने लाना नं सर्वियायात २–१ गोलं बुकुगु खः । सर्वियाविरुद्ध गोल याये धुंकाः जर्दान सकिरी व ग्रानिट जाकां गोलया लसताय् राजनीतिं अभिप्रेरित हाउभाउ क्यंगु खः ।

गुकिं स्विट्जरल्यान्डया तच्वकं आलोचना जुल । अनलिपा समूह चरणया लिपांगु कासाय् कोस्टारिकालिसे २–२ गोलं बराबरीइ म्हिता स्विटेजरल्यान्डं नकआउट चरणय् थाय् दयेकल ।

यद्यपि थुगु यात्राय् स्विट्जरल्यान्डय् निम्ह प्रमुख डिफन्डर कप्तान स्टेफन लिख्स्टाइनर व फाबिया शायर कारवाहीलय् लाःगु दु । निगू म्हासुगु कार्ड काये धुंकाः थुपिं निम्हसिन स्वीडेनविरुद्ध कासा म्हिते मखनिगु जुगु दु । थुपिं निम्हसिगु पलेसा काइकल लङ व जोन जोराउं काइगु अप्वः सम्भावना दु । स्वीडेन नं सेवेस्यिन लार्सन बिना हे म्हितिगु जुइ । लार्सन नं निक्वः म्हासुगु कार्डया कारवाहीलय् लाःगु दु ।

स्वीडेनं नकआउट चरणया यात्राया सुरुवात दक्षिण कोरियायात तसकं चिधंगु अन्तरं बुकाः याःगु खः । निक्वःगु कासाय् अग्रता दयेका नं जर्मनीलिसे इन्जुरी इलय् गोल नयाः पराजित जुगु इलय् स्वीडेनया ढुकढुकी अप्वःगु खः । यद्यपि स्वीडेनं समूह चरणया अन्तिम कासाय् बांलागु टिम कथं कयातःगु मेक्सिकोविरुद्ध ३–० गोलया जितसहित थःत समूह विजेतारुपय् थंगु खः ।

किपा गुगल

युरो २०१६ स निराशाजनक प्रदर्शन लिपा इब्राहिमाभिचं अन्तर्राष्ट्रिय फुटबलपाखें सन्यास काःगु इलय् स्वीडेनया टिम कमजोर जुइगु अनुमान याःगु खः । विश्वया सर्वश्रेष्ठ स्ट्राइकरमध्ये छम्ह इब्राहिमाभिचया गोलसङ्ख्या स्वीडेनया जर्सीइ ११६ कासाय् ६२ गोल दु । तर वयागु अनुपस्थितिइ स्वीडेनं रुसय् जक मखु विश्वकपया छनोट प्रतियोगिताय् नं शानदार प्रदर्शन यात । गन स्वीडेनं निगू लेगया प्लेअफय् इटालीयात बुकुगु खः ।

इतिहासयात स्वयेगु खःसा थुपिं निगू टिम दथुइ २८ पटक भिडन्त जुइधुंकुगु दु । गुकि मध्येय् स्विट्जरल्यान्डं ११ व स्वीडेनं १० गू कासा त्याके धुंकुगु दु । ७ गू कासा बराबरीइ क्वाचाःगु खः । उकिं तुलना यायेबलय् थुपिं निगू टिम दथुइ खास हे अन्तर मदु । यद्यपि थुपिं निगू टिमं सन् २००२ मार्च धुंकाः छम्हं मेम्हविरुद्ध म्हितुगु मदुनि । न्हापाया कासा १–१ गोलया बराबरीइ क्वचाःगु खः ।

इङ्गल्यान्डयात कोलम्बियाया चुनौती

समूह चरणया अन्तिम कासाय् बेल्जियमनाप बुसां इङ्गल्यान्ड दुःखी मजु । गथेभनं धाःसा थ्व बुइ धुंकाः इङ्गल्यान्ड नकआउट चरणय् तुलनात्मकरुपय् अपूगु ड्रलय् लाःगु दु ।

अथेखसां इङ्गल्यान्डं सिउकि विश्वकप थें जाःगु तःधंगु कासाय् छुं नं ड्र अपुगु जुइ मखु । २दँ न्ह्यः फ्रान्सय् क्वचाःगु युरो २०१६ नं इङ्गल्यान्ड तुलनात्मक रुपय् कमजोर भापिया तम्ह आइसल्यान्डनाप स्तब्ध जुगु खः ।

किपा गुगल

इङ्गल्यान्डयात बुकाः समूह विजेता जुम्ह बेल्जियम प्रिक्वाटरफाइनलय् जापानयात प्रतिद्वन्द्वीया रुपय् बुकाः वःगु खः । यद्यपि व धुंकाः या कासाया यात्राय् वं ब्राजिल, फ्रान्स, उरुग्वेनाप ल्वाये मालेफु । इङ्गल्यान्डया नितिं प्रिक्वाटरफाइनलय् कोलम्बियाया बल्लाम्ह विपक्षी खः । यदी कोलम्बियायात बुकल धासा इङ्गल्यान्डं रुस, क्रोएसिया, स्वीेडेन व स्विट्जरल्यान्ड नाप म्हिते मालेफु । उकिं इङ्गल्यान्ड समूह विजेता मजुगुलिं खुशी दु । अथे खसां इतिहास स्वयबलय् सन् २००६ धुंकाः इङ्गल्यान्डं आः तक नकआउट कासा त्याके फुगु मदुनि । उकि‌ सुरुइ इङ्गल्यान्डयात सशक्त कोलम्बियाया चुनौती पार यायेगु हे तधंगु खँ जुइ ।

इङ्गल्यान्डविरुद्धया कासाय् कोलम्बियाया स्टार हामेस रोड्रिगेज दइगुलि शंका दु । सेनेगलविरुद्धया कासा धुंकाः थुगु विश्वकपया सर्वाधिक गोलकर्ता रोड्रिगेज घाइते जुगु खः । कोलम्बियाया फुटबल संघं रोड्रिगजयो चोट गम्भीर मजुगु धाःगु दु । कोलम्बियां रोड्रिगेज विना म्हिते माःसा युभेन्टस विन्गर हुँवा क्वाडाड्रो व हुँवा क्विन्टरोयात अतिरीक्त बोझ थप जुइगु जुइ ।

किपा गुगल

थुगु कासाय् सकसियां मिखा इङ्गल्यान्डया फरवार्ड व कप्तान हेरी केनय् जुइ । समूह चरण सिधयका केनं निगु कासाय् ५गू गोल यानाः सर्वाधिक गोकलर्ता जुयाच्वंगु दु । अथेखसां व‌ याःगु गोल तुलनात्मकरुपं  कमजोर प्रतिद्वन्द्वीपिं ट्युनिसिया व पनामाविरुद्ध याःगु खः ।

अथेजुगुलिं वं आः हे गोल्डेन बुट त्याकेगु म्हगस खंकाच्वंगु दु । उकिं केन गोल यायेगु ताकय् दइ । केनयात पनेगु जिम्मा टोटेनहाम हस्परसं म्हितिम्ह सेन्टर ब्याक डेभिन्स साञ्चेजं याइ ।

कोलम्बियां सेट पिसया फाइदा कयाः इङ्गल्यान्डयात पनेगु योजना पक्का हे दयेकी । इङ्गल्यान्डं आःतक याःगु ८गु गोल मध्ये ६गु गोल सेट पिसय् जुगु खः । अथे जुगुलिं केनं नं ४गू गोल फ्रिकिक, कर्नर वा पेनाल्टीं पाखें याःगु खः।

इङ्गल्यान्डं नकआउट चरणया कासाय् पेनाल्टी सुटआउटया खँ नं पिहाँ वयेफु । न्हापाया ३गू विश्वकपय् इङ्गल्यान्ड टाइब्रेकरय् बुना निराश जुगु खः । गु गु किर्तिमान नं खः । अथेहे युरो च्याम्पियन्सीपय् नं स्वक्वः तक पेनाल्टी सुटआउटय् बुगु खः ।

सन् १९९६ या युरो च्यामिपयन्सीपया सेमिफाइनलय् इङ्गल्यान्ड बुगु या मुख्य कारण प्रशिक्षक साउथगेटया निर्णायक पेनाल्टी सितिकं वंगु खः । अथेजुगुलिं इङ्गल्यान्डं थुपालय् पेनाल्टीया अभ्यास बांलाक याःगु खँ दु ।

इङ्गल्यान्ड व कोलम्बिया दथुइ विश्वकपय् छगू यां छगू जक कासा जुगु दु । सन् १९९८ या विश्वकपय् इङ्गल्यान्डं कोलम्बियायात २–० गोलं बुकुगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.