fbpx

स्वस्थ जुइत ल्यापटप पाखें तापाक च्वने

डेस्कटपया पलेसा ल्यापटप चलेयाइपिनि ल्याः न्हियान्हिथं अप्वया वनाच्वंगु दु । नोटबुक आकारयागु कम्प्युटर डेक्सटप सिवें अप्वः सुविधाजनक जूसां,यक्व चले यानाच्वन धाःसा उलि हे बांमलाःगु प्रभाव लाये यः ।

डेस्कटपया पलेसा ल्यापटप छ्यलीपिं क्यान्सर, नपुंसक, नशा खुम्चे जुइगु थेंज्याःगु ल्वय्या सिकार जुइ यः । काइनेल युनिभर्सिटिया निर्देशक एलन हेजया धापू कथं डेस्कटपया पलेसा ताःईतक ल्यापटपय् ज्या याइपिंत शारीरिक व मानसिक रुपं बांमलाःगु लिच्वः लायेफु ।

ल्यापटपय् स्क्रिन व किबोर्ड यक्व हे न्ह्यःने दइ । गुकिं यानाः शरीरय् तःगू कथंया समस्या ब्वलंकाबी । ल्यापटपय् ज्या याइबलय् ल्हातय् माक्व आराम जुइ मखु । थुकी लगातार टाइप यायेबलय् पतिंचाय् ‘कारपल टनल सिंड्रोम’ जुइ । गुकिं यानाः पतिंचा स्याइगु, खाइगु व कय्कुनिगु जुइ । पतिंचा कमजोर जुलकि छुं बस्तु बांलाक ज्वने फइमखु, च्वये थाकुइगु थेंज्याःगु समस्या जुइ ।

ल्यापटपय् किबोर्ड चिधं जुइ, लिसें पतिंचा बांलाक तये ज्याछिनी मखु । गुकिं यानाः पतिंचाया लिसें नाडिइ नं तन्के जुइ । अले नाडि निसें कयाः जँ, ककुतकं तन्के जूवनेफु । गुकिं तःगू कथंया समस्या ब्वलंकी ।

ल्यापटपय् ज्या यायेबलय् गःपः क्वछुके मालि । गुकिं गःपः स्याइगु, गःपः तन्के जुइगु, नशा तन्केजुइगु थेंज्याःगु समस्या ब्वलंकि । अथेहे ल्यापटपया स्क्रिन नं चिधं जुइ । गुकिं यानाः ज्या यायेबलय् मिखाय् यक्व हे दबाब लाइ, अले मिखाय् हिइसे च्वनीगु, चासुइगु , लः जायावइगु थेंज्याःगु समस्या वइ । थुकियात कम्प्युटर भिजन सिन्ड्रोम धायेगु याः ।

ल्यापटपय् ज्या यायेबलय् गलत आसनय् च्वने मालि । थथे च्वनीबलय् गःपः, जँय् समस्या वइ । यात्राया इलय् नं ल्यापटप ब्याग कुबिया वनेबलय् गःपः, ल्हाः व जँया मांसपेशीत स्याइगु, नसा तन्के जुइगु जुइ यः । मानसिक रोग विशेषज्ञतय्गु धापु कथं ल्यापटपय् ताः ई तक ज्या याइपिंके मानसिक समस्या नं खने दयाच्वंगु दु । छ्यं स्याइगु, नुगःचुया गति अप्वइगु, न्ह्यः मवइगु, तं पिहां वइगु, ल्वसे जुइगु, तनाव अप्वइगु थेंज्याःगु थीथी कथंया समस्या वइ ।

अप्वसिनं ल्यापटप मुलय् तयाः चले याइ । गुकिं उमित प्रजननसम्बन्धी समस्या वयेफु । ल्यापटप चले यायेगु इलय् थुकिं पिहां वइगु क्वाःगु फय् व चुम्बकीय विकिरणं यानाः मिजंत नपुंसक व मिस्त बाँझ जुइफु । ल्यापटपं इलेक्ट्रोनिक तरंग नं पिहां वइ गुकिं यानाः योनाङ्गया कार्यक्षमता म्हो जुइ । ल्याय्म्हत शीघ्रपतन व नपुंशकया शिकार जुइ ।

ल्यापटप मिखाया निंतिं नं तसकं खतरनाक जू । ल्यापटपयात मुलय् तयाः ज्या यायेबलय् मिखाया कोण म्हो जुया वनी, अले मिखां कमजोर जुइगु जुइ । अथेहे मिखाया कार्यक्षमताय् नं लिच्वः लाकि । अमेरिकाय् जूगु छगू अध्ययनं थ्व खँ लुइकूगुु दु कि डेक्सटपया तुलनाय् ल्यापटपं अप्वः क्वाःगु फय् वांछ्वइ । मुलय् तयाः ल्यापटप चले याइबलय् अन्डकोषया तापमान २.६ निसें २.८ डिग्री तक बढे जुइ । गुकिं स्पर्म म्हो ल्याखय् जक बने जुइ । अथेहे मिस्त नं बाँझ जुइ ।

थ्वः खँ ध्यानय् तयादिसँ

  • ल्यापटपयात मुलय तया चले यानादीमते
  • स्क्रिनयात गलत एंगलय् तयाः ज्या यानादीमते
  • टेक्स्ट साइज तग्वः यानाः ज्या यानादिसँ
  • ताःईतक क्वथिइक स्वयाः ज्या यानादीमते

Leave a Reply

Your email address will not be published. Required fields are marked *