स्वंगू भाषं दाफा महोत्सवया सफू पिकायेगु तयारी

११३८ अनलाथ्व एकादशी/यल

नेपाःया संगितया ख्यलय् हे ज्वःमदुगु कथं क्वचाःगु नेपालमण्डल दाफा खलःया इतिहास, दाफा खलःया कलाकार, इमिसं प्रस्तूत याःगु ज्याझ्वःयात दुथ्याका आः याकनं हे नेपालभाषा, खस भाषा व अंग्रेजीभाषां सफू पिकाइगु जूगु दु ।

म्हिगः नेपालमण्डल दाफा महोत्सव निर्देशन समितिया मुँज्यां थ्व खँ निर्णय याःगु दु ।

नेपालमण्डल दाफा महोत्सवया सफू पिकायेगु, नेवाः अर्केष्टाया भिडियो नापं स्वरलिपि पिकायेगु, दाफा संस्कृतिया विज्ञतय्गु गोष्ठि यायेगु ज्या याकनं हे जुइ धकाः निर्देशन समितिया छ्याञ्जे श्रीकृष्ण महर्जनं कनादीगु दु ।

नेपालमण्डल टेलिभिजन व ललितपुर मलया ग्वसालय् नेपालमण्डल दाफा महोत्सवया तत्वावधानय् वंगु २०७३ कार्तिक १२ गते निसें न्ह्यानाः चैत्र ३० गते समापन जूगु खः । उगु नेपालमण्डल दाफा महोत्सवय् १५३ दाफा खलकं थ्यंमथ्यं न्याद्धःम्ह कलाकारपिंपाखें थःथःगु त्वाःया दाफा प्रस्तूति याःगु खः ।

नेपालमण्डल दाफा महोत्सवपाखें दाफा संस्कृतिया इतिहासय् हे मिसापिन्सं जक दाफा थाःगु, यक्व दाफा खलः छगू हे थासय् वया न्ह्यब्वःगु, नीन्यादँ क्वय्यापिन्सं जक दाफा थाःगु नापं यक्व हे न्हून्हूगु कीर्तिमान कायम याःगु जूगुलिं थ्व ऐतिहासिक पलयात सदां जीवन्त यानातयेगु आज्जु कथं समितिं थुकथं निर्णय याःगु खँ छ्याञ्जे महर्जनं कनादीगु दु ।

म्हिगः जूूगु मुँज्याय् नेपाल मण्डल दाफा महोत्सव निर्देशन समितिः नायः वाडमय सताब्दी पुरुष सत्यमोहन जोशी, न्वकू नेपाल डंगोल व भाइकाजि महर्जन, छ्याञ्जे श्रीकृष्ण महर्जन, दुजःपिं प्रा. सुवर्ण शाक्यया लिसें अन्य दुजःपिनिगु नं उपस्थिति दूगु खः ।

बुखँ व किपाः श्रीकृष्ण महर्जनं

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.