स्थिर सरकार गठन यायेत बाम–गठवन्धन जूगु घोषणा

११३८ कछलाथ्व १४ शुक्रबाः
येँ÷नेपालय् स्थिर सरकार मदुबलय् गुगु नं सरकारं बांलाःगु व पाय्छि ज्या याये मफूगु अले जनताया दथुइ निराशा ब्वलनाच्वंगु अवस्था दु । उगु अवस्थायात न्हंकाछ्वयेगु लिसें स्थिर अले निश्चित स्थायी सरकार गठन यायेगु लागिं नं न्ह्यःने वयाच्वंगु प्रतिनिधिसभा अले प्रदेशसभा दुजः निर्वाचनय् बाम गठवन्धन जूगु खुलासा जूगु दु ।
नेकपा एमालेया प्रभावशाली नेता अले काठमाडौ क्षेत्र नंबर ९ प्रतिनिधिसभा दुजःया बाम गठबन्धनपाखेंयाम्ह उम्मेदवार कृष्णगोपाल श्रेष्ठं थुगु खँ धासें स्थायी सरकार व जनचाहना कथंया ज्या बाम गठवन्धनपाखें जक जुइगु विज्ञतय्गु सल्लाह अले अभ्यासं नेकपा एमाले व माओवादी केन्द्र दथुइ बाम गठवन्धन जूगु धयादीगु खः । नेता श्रेष्ठं प्रतिनिधिसभा अले प्रदेशसभा दुजःया निर्वाचन धुंकाः नेकपा एमाले व माओवादी केन्द्र दथुइ एकता जुइगु जिकिर नं यानादिल । येँय् जूगु पत्रकार सम्मेलनय् नेता श्रेष्ठं थुगु घोषणा यानादीगु खः ।
उगु हे ज्याझ्वलय् नेकपा एमालेपाखें येँ क्षेत्र नंबर ९ ‘क’या प्रदेशसभा दुजःया उम्मेदवार जूम्ह बौद्धिक व्यक्तित्व डाक्टर अजयक्रान्ति शाक्यं येँया जनताया ख्वालय् न्ह्याथे यानाः जूसां लसता खनेदयेकेगु थःपिनिगु मूल एजेन्डा खःगु व उकिया लागिं क्रियाशील जुयाः प्रदेश सरकार मार्फत ज्या यायेत थम्हं उम्मेदवारी बियागु धयादिल ।
अथे हे, नेकपा एमालेपाखें हे येँ क्षेत्र नंबर ६ ‘क’ या प्रदेशसभा दुजःया उम्मेदवार जुयादीम्ह येँ महानगरपालिकाा पूर्वमेयर केशव स्थापितं मुक्कं येँया विकासया लागिं थःपिं दत्तचित्त जुयाः न्ह्याःवनेगु प्रतिबद्धता प्वंकादिल ।
ज्याझ्वलय् नेकपा एमालेपाखें येँ क्षेत्र नंबर ७ या प्रतिनिधिसभा दुजलय् उम्मेदवारी बियादीम्ह नेता रामवीर मानन्धर अले येँ क्षेत्र नंबर ८ या प्रदेशसभा दुजः राजेश शाक्यया नं उपस्थिति दुगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.