सेनाया शिविर चीकेत माग यासें धर्ना

११३८ चिल्लागा चौथी/ख्वना

ख्वनाया खुदोय् सेनां तःगु शिविर चीकेत माग यासें थौं ख्वनाय् स्थानीयं धर्ना ब्यूगु दु ।

स्थानीय नेवालं भोगचलन याना वयाच्वंगु जग्गाय् सेनां जबरजस्ती शिविर दयेकूगु धासें ख्वना, बुंगलिसें जःखःया स्थानीयपिन्सं शिविर चीकेत माग यासें धर्ना ब्यूगु खः । धर्नाय् येँ व यलं नं ब्वति काःवःगु दुगु खः ।

नेपाली सेनां शिविर दयेकूगु थाय् अनया हे स्थानीय नेवाःयागु खःगु स्थानीय मनूतय्‌सं धाःगु दु । तर नेपाली सेनां धाःसा उगु जग्गा नेपाली सेनाया पारा डम्पिङया नामय् दुगु धाःगु खः ।

धर्नाय् ख्वनाया स्थानीय अशोक महर्जन, ज्यापु समाज ख्वनाया प्रतिनिधि, सेभ नेपाः भाय्‌लिया सुरज महर्जन व नेपाल डंगोलं स्थानीयया अनुमति बिना राज्यं छुं नं योजना लागू याये मदुगु धाःगु खः । छुं नं कथंया योजनाया कार्यान्वयनय् स्थानीय जनताया सहभागीता दयेमाःगु माग वय्‌कःपिन्सं यानादिल ।

ख्वनापाखें दयेकेगु धयाच्वंगु फास्ट ट्राय्‌क नं स्थानीयलिसे सहलह मयाःसे दयेके मदइगु माग वय्‌कःपिन्सं न्ह्यःने तयादिल ।

धर्ना धुंकाः प्रदर्शनकारीपिन्सं ख्वना व बुंगया वडा ज्याकुथिइ तालं ग्वःवंगु खः । स्थानीययात जूवःगु समस्याय् स्थानीय जनप्रतिनिधि व स्थानीय तह सुम्क च्वनेमज्यूगु प्रदर्शनकारीपिन्सं धाःगु खः ।

ख्वनाया खुदो लागाया जग्गा न्हापा हे पारा डम्पिङया लागिं धकाः नेपाली सेनां कायेगु धाःगु खःसां बुँथुवाःपिन्त मुआब्जा वा क्षतिपुर्ति छुं नं उपलब्ध याकूगु मदुनि स्थानीयया धापू दु ।

धर्ना लिपा स्थानीय व नेपाली सेना दथुइ सहलह नं जूगु खः । सहलहस फास्ट ट्राय्‌कया लँ गनं गुकथं यंकेगु धइगु खँ स्थानीयलिसे सहलह यानाः जक यायेगु, सिकाली लगायतया स्थानीय ऐतिहासिक पुरातात्विक सम्पदायात बांमलाःगु लिच्वः लाइगु कथं ज्या मयायेगु निष्कर्षय् थ्यंगु सहलहया ब्वतिमिं झीगु.कमयात जानकारी ब्यूगु दु ।

आः खुदोय् सेनां तःगु शिविर चीकेगु निर्णय धाःसा मजूगु जानकारी नं श्रोतं ब्यूगु दु ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.