fbpx

सुवालया बौद्ध म्येचाः व सफू विमोचन

ने सं ११३९ बछला थ्वः अष्टमी । येँ

येँया  १२ वडाय् च्वंगु महिला बौद्ध समूहया नायः श्रीमिला सुवालं च्वयादीगु बौद्ध म्येया सीडीचाः ‘शरणागत प्रभु’ व सफू ‘सजिलो बुद्ध पूजा विधि’ म्हिगः छगू ज्याझ्वःया दथुइ विमोचन जूगु दु ।  भिक्षु ज्ञानेन्द्र स्थविरया मूपाहाँसुइ जूगु समूहया २७ क्वःगु वार्षिकोत्सवलिसें २५६३ क्वःगु बुद्ध जयन्तीया लसताय् जूगु विशेष ज्याझ्वलय् थुकथं सीडी व सफू विमोचन जूगु खः ।

ज्याझ्वलय् विशेष पाहाँकथं झायादीपिं येँ महानगरपालिकाया मेयर विद्यासुन्दर शाक्य, उपमेयर हरिप्रभा खड्गी, बौद्धविद्वान् प्रा. सुवर्ण शाक्यलिसेंया व्यक्तित्वपिसं मंकाःकथं उगु उलेज्या यानादीगु खः ।

ज्याझ्वलय् पिहाँवःगु सफूया समीक्षा यानादिसें प्रा. शाक्यं बौद्ध जगतय् थेरवादी परम्पराकथं बुद्ध पुजायात सरलीकत ढंगं न्ह्यब्वःगुलिं जनसाधारणं थुइकेत अःपुइगु बिचाः तयादिल । वय्कलं सीडी दुथ्यानाच्वंगु म्येयात कयाः नं समीक्षा यानादीगु खः ।


ज्याझ्वलय् नुगःखँ तयादिसें मेयर शाक्यं सफू सकसिनं ब्वने मफइगु जूगुलिं थुकियात अडियो सीडीया रुपय् विकास याय्त इनाप यानादिल । वय्कलं सांस्कृतिक, धार्मिक क्षेत्रया विकासया निंतिं ग्वाहालि याय्त थः न्ह्याबलें तयार दुगु खँ नं न्ह्यथनादिल ।


थथे हे उपमेयर खड्गीं मिसात न्ह्यचिल धाःसा समाज भिंके फइगु जूगुलिं छेँ ज्याय् जक लिमकुँसे राजनीति व सामाजिक ज्याय् नं मिसात न्ह्यचिले माः धयादिल ।

ज्याझ्वलय् सीडी व सफू तयार याय्त ग्वाहालि यानादीपिन्त सुभाय् देछाकथं मतिनाया चिं लःल्हाःगु खःसा सीडीया संगीतकार अनिल तुलाधरयात विशेष सम्मान याःगु खः ।

नायः सुवालया नायःसुइ जूगु मुँज्याय् न्वकु तारा शाक्यं लसकुस यानादीगु खःसा दांभरिं रिना सिंहं ग्वाहालि यानादीपिनि नां न्ह्यथनादिसें सुभाय् देछानादीगु खः ।  ज्याझ्वः समूहया छ्याञ्जे सुनिता महर्जनं न्ह्याकादीगु खः ।

नेवाः सूचना केन्द्र

 

Leave a Reply

Your email address will not be published. Required fields are marked *