सांस्कृतिक हमला थःपाखें कि कर्पिनीगु पाखें ?

 

बिगत ५ वर्षनिसें नुगलय् वयाःच्वंगु छता खँ थन न्ह्यब्वयाच्वना।

हरेक दँय् ऋषिपञ्चमिया दिनस टेकु दुबातय् गाडि, मोटरसाइकल वा धाय् छु नं कथंया सवारी साधनया प्रवेशयात बर्जित याइ। थ्व खनेवं जिगु न्ह्यपुइ छगू न्ह्यसः वइ – छुं जुया थ्व ऋषिपञ्चमि धाःगु झी नेवाःतेगु नखः जूगु खःसा थथे लँ हे पनाः वा धाये अस्थाइ रुपं नाकाबंन्दी थें याइला ? थःगु हे छें वनेत नं २/३ किलोमिटर चाहिला वनेमाःगु अवस्था वइला ?

facemeu.com

जिगु न्ह्यपुं लिसः बिल – अवस्य नं थथे जुइमखु । सुयात नं मतलब दइ मखु । लँ पना भक्तजन तय्त अपुइमा वा लँ मपना लँय जुइपिन्त अपुइमा ।

अले हाकनं मेगु न्ह्यसः वल– छु सरकारं हे उमिगु खँय् पर्व जूगु जुया भक्तजनपिनिगु ध्यानय् तया व लँ बन्द याःगु खःला ?

लिसः वल खय्नं फु । वा उकिया व्यवस्थापन याइपिन्सं हे भक्तजनतय्गु भीडभाड यक्व जुइ धकाः न्ह्यः हे ट्राफिक व्यवस्था याइपिन्त पत्र बियातःगु जुइफु ।

अथे हे खःसा झीगु साःपारू, उपाकु वनेगु दिनस छाय् ट्राफिक व्यवस्थापन झुर जुइ । ट्राफिक विभागयात जात्राया रुटयाःगु पत्र छाय् मब्यूगु जुइ । यदि ब्यूगु खःसा झीगु जात्रापात्राय् जक छाय् थथे सवारी साधनत ल्यू ल्यू न्ह्यःन्ह्यः वइगु जुइ । व दिनस सवारी साधनयात छाय् मपनीगु जुइ  ?

अथेहे इन्द्र जात्रायाःगु दिनस द्यः सालेगु इलय् हे मोटर गाडि व मोटरसाइकल व हे लँपुई छाय् ग्वाःग्वाः दइगु जुइ । ऋषिपञ्चमिबलय् थें लँ छाय् मपनीगु जुइ । इन्द्रजात्रा व्यवस्थापन समितिं थुकियाःगु लिस बिइफइला थें ।

अले रथ सालिगु छन्हू न्ह्यः जक सतक भिंकेगुया मतलब छु खः थें । व्यवस्थापन समितियागु ज्या छु खः जम्मा कुमारी द्यःयात जक स्वयेगु खःला ? इन्द्रजात्रा व्यवस्थापन समिति धाय्धुंकाःला जम्मां इन्द्रजात्राया व्यवस्था यायेमाःगु मखुला ? चाहे व लँ दयेकेगु जुइमा, चाहे व ट्राफिक व्यवस्थापन यायेगु जुइमा, वा धाये व लँय्च्वंगु तारया व्यवस्थापन ।

 

– अर्विन्द्रमान सिं

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.