fbpx

सम्यक दान पर्व – ख्वपया थथुबही भुइख्यलय् तःजिक हन

ने स‌ं ११३९ पाेहेलाथ्व नवमी/ख्वप

लिच्छविकालीन सम्यक दान पर्व, बौद्ध धर्मालम्वीया तसकं महत्वपूर्णगु नखः वा पर्वया रुपय् हनावयाच्वंगु सम्यक दान पर्व ख्वपय् थथुबहीया भुइख्यलय् तःजिक हन ।

घ्यः चाकु सन्हूया अवसरय् दँय्दसं हनावया च्वंगु सम्यकदान पर्व बौद्ध धर्मालम्वीतय् नितिं ऐतिहासिक एवं सांस्कृतिक रुपं हनिगु छगू मौलिक पर्व नं खः ।

सम्यक दानया नितिं ख्वपया प्रसन्नशील महाविहार, साकोथा, चतुब्रम्ह महाविहार, गोल्मढी मंगल धर्मदीप विहार, इटाछेँ जयकीर्ति महाविहार (थथुबही) व भार्वाचो बौद्ध समकृत विहारया दिपंकर यानाः न्याम्ह दिपंकर बुद्धपिन्त प्रसन्नशील महाविहारया क्वाचपालद्यः, सम्यकदान दाताया कुलदेवता, थासंद्यः (सुवर्ण चैत्य) प्यम्ह लुँया द्यः व प्रसन्नशील महाविहारया स्थविर आजु, गुणकीर्तिमहाविहारया उपाध्यायगुरुजुया लिसें मूलपुरोहित गुरुजुपिन्त ख्वपया इटाछेँय् च्वंगु जयकीर्ति महाविहार थथुबहीस्थित भुइख्यलय् ब्वनेगु याइ ।

थुगुसीया सम्यक दान पर्वया पाः अष्टमान बज्रार्चायजुया खः । थुगु सकतां ज्या  सम्यक महादान व्यवस्थापन समितिया ग्वसालय् जूगु खँ ख्वपया रवि किरण बज्राचार्यजुं झीगु डटकमयात जानकारी बियादिगु खः ।

सम्यक दानया झ्वलय् चाय् सइगु अन्नया लिसें सकतां कथंया बूव फलफूल व मह्रीचह्री नं दान याइगु खः । नापनापं वा, जाकि, हाम्वः ग्वारा नं द्यःयात छायेगु याइ । अथेहे सम्यक भोजनय् सहभागी गृहस्थ भिक्षु बज्रार्चाय व शाक्य वर्गयात वा, जाकि, हाम्वः ग्वारा व ध्यबा दक्षिणा बिइ ।

किपाः रेखा शाक्य

सम्यक दानपर्व भगवान गौतम बुद्धया पालंनिसें न्ह्याना वःगु विश्वास यानातःसां ऐतिहासिक प्रमाणया रुपय् लिच्छविकालीन धार्मिक जुजु वृषदेवया पालं शुरु जूगु खः । येँ सांस्कृतिक सम्यक दान पर्व १२ दँया छक्वः स्वयम्भुया भुइख्यलय् जुइगु खःसा यलया नागबहालय् ५ दँय् छक्वः जुइगु याइ । तर ख्वपय् धाःसा दँय्दसं माघ सन्हू कुन्हु नियमित रुपं न्ह्याना च्वंगु दु ।

ख्वपय् सम्यक भोजन दान पर्व ने सं ७८७ सालय् ख्वपया चतुब्रम्ह महाविहारया बज्रार्चाय जयरत्नं थापना याना थकुगु खः । वय्कलं सम्यक दान ग्वसाः ग्वःगु ख्वपया इटाछेँस्थित थथुबही (जयकीर्ति महाविहार) उगु इलय् जीर्ण जूगुलिं जयरत्नं जिर्णोद्वार याःगु इतिहासया पन्नाय् उल्लेख दु । जयरत्न धुंकाः वय्कःया कायपिं जयमुनि, जयधर्म, जयचन्द्र व छय् पूर्णराजं भब्य कथं सम्यक दानपर्व आयोजना यानाः सुवर्ण दीपंकर स्थापना याःगु खः ।

किपाः रेखा शाक्य

थौंया सम्यक दान पर्वय् सकल दिपंकरयात दान धर्म यायेत येँ यल ख्वपया लिसें अन्य थाय्यापिं धर्मावलम्वीपिं नं अन वःगु खः ।

Leave a Reply

Your email address will not be published. Required fields are marked *