सम्पदा संरक्षणया नितिं फुक्कं जनप्रतिनिधि तयार दु

११३८ बछलाथ्व त्रयाेदशी/येँ

येँ महानगरपालिकाया मेयर भाजु विद्यासुन्दर शाक्यं झीगु सम्पदां जाःगु थ्वः स्वनिगः अले थ्व झीगु सम्पदा संरक्षण यायेत न्ह्याब्लें नं झी अग्रसर जुइमाः अले झीगु सम्पदा ल्यंकेगु ÷ भिंकेगु ज्याय् झी अग्रसर मजूसा सू जुइ धकाः धयादीगु दु ।

विष्णुमति खुसिसिथय् वडा नं १९ य् अवस्थित कंगः द्यःया यट्खावाहाःया न्ह्यःने वडा नं. २४ य् लानाच्वंंगु द्यःछेँ पुनःनिर्माण क्वचाःगु लसताय् जूगु ज्याझ्वलय् मू पाहाँ भाजु शाक्यं सम्पदाया संरक्षणया नितिं फुक्कं जनप्रतिनीधिपिं तयार दुगु खँ कनादील ।

त्वाः पाखें वडाध्यक्षपिं, प्रदेशसरकारपाखें प्रदेशया दुजःपिं, केन्द्र सरकारपाखें प्रतिनीधिसभाया दुजःपिं अले नगरपालिकापाखें वय्कः स्वयम् तयार नं न्ह्याबलें न्ह्यःने दइगु खँ कनादीसें थ्व फुक्क त्वाः त्वाःया सम्पदात म्वाकातयेगु नितिं, भिंकेगु नितिं हरेक नागरिक नं तयार जुयादीमाल धकाः थःगु नुगः खँ प्वंकेगु झ्वलय् कनादील ।

कंगः द्यःछेँ उलेज्याझ्वलय् हनुमानढोका दरवार क्षेत्र संरक्षण कार्यक्रमया नायः भाजु उदय पसखलजुं बांलागु भिंगु ज्या याइपिन्त न्ह्याबलें भगवानं साथ बी धकाः धयादिल । ‘५५ लाखया टेण्डरपाखें पुनःनिर्माण जूगु उगु द्यःछेँ ठेकेदारं ठेकेदारी कथं जक दयेकूगु व ल्यं दनीगु मेगु छगु भाग झीसं झीगु हे कथं देय्केगु जुइ ।’ पसखलपाखें बचं बियादील । झीसं १० % ल्हापं तय्गु अले ल्यँ दनीगु धेवा हनुमानढोकाय् दुहां वइपिं पर्यटकयात काइगु धेवापाखें तयेगु जुइ धकाः हनुमानढोका दरवार क्षेत्र संरक्षण कार्यक्रमया नायः भाजु उदय पसखलं धयादील ।

ज्याझ्वलय् २४ वडाया वडा नायः भाजु बालकृष्ण श्रेठं ल्यं दनीगु द्यःछेँ दनेत थःगु वडा माःगु ग्वाहाली यायेगु बचं बियादील ।

अथेहे ज्याझ्वलय् पाहाँ कथं झायादीम्ह क्षेत्र नं. ८ या प्रदेससभाया दुजः भाजु राजेश श्रेष्ठं थः थ्व थासय् छम्ह वडासदस्यया हैसियतं ५४ सालय् ज्या यायेधुनम्ह खः धाःसें सम्पदा संरक्षण रहर वा करं जक मखु आः झीसं थुकियात आर्थिक रुप नं कयाः यंकेमाःगु खः कनादील ।

येँ महानगरपालिका, हनुमानढोका दरवार क्षेत्र संरक्षण कार्यक्रमया ग्वाहालीं पुनःनिर्माण जूगु कंगःअजिमाया द्यःछेँया उलेज्याझ्वः कंगः अजिमा खलः मू समितिया ग्वसालय जूगु खः ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: