‘समृद्धिया यात्राय् मिसात नं न्ह्याःवनेमाः’ – उपमेयर खड्गी

११३९ थिंलाथ्व नवमी / येँ

येँ महानगरपालिकाया उपमेयर हरिप्रभा खड्गीं देय्या समृद्धिया यात्राय् मिसात नं सशक्त रुपं न्ह्याःवनेमाःगु धयादीगु दु । गुण व्युटिसियन ट्रेनिङ सेन्टर तीनकुने कचाया उलेज्या यासें उपमेयर खड्गीं सीप सयेकाः मिसात नं थःगु तुतिइ दने फयेकेमाःगुलिइ बः बियादिल ।

उपमेयर खड्गीं आः मिसात छेँया भुथुलिइ जक लिकुना च्वनेमज्यूगु धयादिल । ‘थौंया मिसाय्सं छेँया भुथू जक मखु, देय्यात नं कःघायेफु’ उपमेयर खड्गीया धापू खः, ‘देय्यात समृद्धिपाखे न्ह्याकायंकेत मिसातय्गु भूमिका नं महत्वपूर्ण जू धइगु खँ प्रमाणित यानाः क्यनाबीमाः । आः मिसातय्सं सीप सयेकाः आर्थिक ख्यलय् नं सशक्त जुइमाः ।’

गुण ब्युटिसियन ट्रेनिङ सेन्टरया न्ह्याकामि गुणकेशरी ताम्राकारं मिसा तःकेहेँपिन्त थःगु तुतिइ दनेफुम्ह दयेकेगु हे थःगु मू आज्जु खःगु धयादिल । थम्हं ट्रेनिङ सेन्टरया शुरुवात व्यापार वा नाफाया आज्जुं मखसें मिसातय्गु उत्थानया आज्जुं यानागु ताम्राकारया धापू खः । थ्व हे आज्जु कथं थम्हं छगू दशक न्ह्यः ट्रेनिङ सेन्टर न्ह्याकागु व थुकियात अझ तब्याक्क न्ह्यःने यंकेत एकेडमिया अवधारणाय् तीनकुने कचा नं न्ह्याकागु वय्कलं जानकारी बियादिल ।

‘थौं नं यक्व तःकेहेँपिन्सं आर्थिक, सामाजिक समस्या फया हे च्वंगु दु, सीप ल्हातय् दत धाःसा थःगु हे तुतिइ दनेफइ, थःगु हे जन्मभूमिइ च्वनाः छुं यायेफइ’ ताम्राकारया धापू खः । निगः प्यंगः धेबा अप्वः लबः नयेत थुगु ख्यलय् विकृती अप्वयावंगु धासें थःथाय् तालीम काःवइपिं मिसापिन्त थुगु कथंया विकृती न्हंकाः गुणस्तरीय सेवाया लागिं थम्हं प्रोत्साहित यायेगु यानागु ताम्राकारं जानकारी बियादिल ।

गुण व्युटिसियन ट्रेनिङ सेन्टरं थःगगु झिक्वःगु वार्षिकोत्सवया लसताय् तीनुकने कचाया शुरुवात याःगु खः । न्हापा ट्रेनिङ सेन्टरपाखें हेयर कटिङ, व्युटिसियनया लिसें व्युटि प्रोडक्टया बारे नं तालीम बिया वयाच्वंगु खःसा आः तीनकुने कचापाखें तालीमया लिसें हेयर कटिङ, मेकओभर लिसेंयासेवा नं बीगु सेन्टरं न्ह्यथंगु दु । छगू दशक न्ह्यः यलया प्याःपुखुलिं न्ह्याःगु सेन्टर लिपा वनाः महापालं न्ह्यानाच्वंगु खःसा आः तीनकुने कचायात एकेडमिया अवधारणाय् न्ह्याकेत्यनागु सेन्टरया न्ह्याकामि ताम्राकारं धयादीगु दु ।

झीगु डट कम

झीगु नितिं झीगु सञ्चार

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.