‘समतामूलक समृद्धि संघीय समाजवादिया एजेन्डा ’

११३८ थिंलाथ्व एकादशि

संघीय समाजवादि फोरम नेपाल क्षेत्र नम्बर ७ (१) चुनाव प्रचार समितिं थौं येँय् छगू पत्रकार सम्मेलन यासें समतामूलक समृद्धि थःगु मू एजेन्डा जूगु घोषणा याःगु दु ।

पत्रकार सम्मेलनय् न्वःवासें ससफो नेपालया सह अध्यक्ष राजेन्द्र श्रेष्ठं थःपिनिगु समृद्धिया मुद्दा धयागु सम्पन्न, पूँजीपति वर्गया नितिं जक मखसें उत्पीडित, ल्यूने लाःगु वर्गया नितिं तकं खःगु स्पष्ट यानादिल । उद्योगपति, पूँजिपतिं ततःधंगु महल थनेगु अले गरीव जनतायात धाःसा पुनेगु वसःया तकं समस्या जुइगु अवस्थायात न्हकेगु हे थःपिनिगु मुद्दा खःगु सह अध्यक्ष लिसें प्रतिनिधि सभापाखे ससफो नेपाल समानुपातिक उम्मेदवार श्रेष्ठं स्पष्ट यानादिल ।

लिसें नेपाःयात न्यादँया दुने उर्जाय् आत्मनिर्भर दयेकेगु, कुल गार्हस्थ उत्पादन निदुगलं मयाक्क थकायेगु, प्रतिव्यक्ति आय निदुगं थ्यंकेगु अले २५दँ दुने थनया स्थानीय श्रोत जल, जमिन, जडिबुटि व जनशक्तिया सदुपयोग यानाः देय्‌यात विकसित मूलुकया तगिमय् थ्यंकेगु थःपिनिगु योजना नं श्रेष्ठं घोषणा यानादिल ।

उगु हे ज्याझ्वलय् न्वःवासें येँ क्षेत्र नम्बर ७ (१) प्रदेश सभापाखे ससफो नेपालया प्रत्यक्ष उम्मेदवार श्यामकृष्ण प्रजापतिं विकासया नामय् जूगु गैरन्यायिक सडक विस्तारं पिडित स्थानीय वासिन्दाया पुनस्र्थापना लिसें थनया भाषिक, सांस्कृतिक सम्पदाया संरक्षणय् थःपिं क्रियाशिल दुगु व जुयां तुं च्वनेगु धयादिल ।

पहुँच दुपिन्त ततःधंगु अपराध यानाः नं कानून मथीगु, जनतां कर पुलेगु नितिं तकं घुस नकेमाःगु कथंया भ्रष्टाचारं लिप्त जुयाच्वंगु थनया प्रशासनया भ्रष्टाचार मुक्त, सुशासन युक्त प्रशासनया रुपय् हिलावनेगु थःपिनिगु योजना दुगु नं प्रजापतिं जानकारी बियादिल ।

कंक्रिटया जंगलया रुपय् हिला वनाच्वंगु नेपाःगाःयात सांस्कृतिक शहरया रुपं विकास यानाः थनया पर्यटकिय सम्भावना लिसें मेमेगु स्थानीय श्रोत साधनयात छ्यलाः थनया स्थानीयया जीवनस्तर थकायेगु थःपिनिगु योजना दुगु नं प्रजापतिं घोषणा यानादिल ।

उगु हे ज्याझ्वलय् ससफो नेपालपाखें प्रदेश सभाया समानुपातिक उम्मेदवार शेषनारायण महर्जन, प्रतिनिधि सभापाखे क्षेत्र नम्बर ७ (१)य् प्रत्यक्ष उम्मेदवार ज्ञानेन्द्र मोहन श्रेष्ठ, ससफो नेपालया केन्द्रिय सल्लाहाकार डा. महेशमान श्रेष्ठं नेपाःया सांस्कृतिक, ऐतिहासिक, समाुदायिक पहिचान स्थापित यायेत संघीय समाजवादि फोरम नेपाल क्रियाशिल जुयां तुं च्वनीगु धयादिल ।

‘संघीय समाजवादि जक हे सच्चा लोकतान्त्रिक पार्टिं खः’

पत्रकार सम्मेलनय् पत्रकारतलिसे खँ ल्हासें संघीय समाजवादि फोरम नेपालया सह अध्यक्ष राजेन्द्र श्रेष्ठं वर्तमान राजनैतीक घटनाक्रमं नेपाःया सच्चा लोकतान्त्रिक पार्टि संघीय समाजवादि फोरम नेपाल जक खःगु प्रमाणित जूगु धयादीगु दु ।

सह अध्यक्ष श्रेष्ठं प्रदेश सभा व प्रतिनिधि सभाया निर्वाचनया झ्वलय् तःधंगु दलपिन्सं गठबन्धन व तालमेलया नामय् याःगु ज्याखं थुगु शक्तित लोकतन्त्र, धर्म निरपेक्षता, गणतन्त्र विरोधी खः धकाः प्रमाणित याःगु धयादिल ।

सत्ताय् वनेगु लालसाय् राजतन्त्र हिन्दू राष्ट्र अले एकात्मक शासन व्यवस्थाया पक्षधरलिसे तालमेल याःवनाच्वंगु पार्टि गुकथं लोकतान्त्रिक जुइफइ धइगु सह अध्यक्ष श्रेष्ठया न्ह्यसः खः ।

लोकतान्त्रिक गठबन्धन धायेकाच्वंपिन्सं लोकतान्त्रिक चरित्र नं क्यनेमफूगु व वाम गठबन्धनं नं बाम चरित्र क्यनेमफूगु श्रेष्ठया धापू खः । संघीयता, गणतन्त्र, धर्म निरपेक्षताया वकालत याइगु पार्टि संघीय समाजवादि जक खःगु नं श्रेष्ठं दावी यानादिल ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: