सफू ब्वज्याया चिखि फ्यनेयालिसें स्वंगू सफूया उलेज्या

११३८ चौलाथ्व त्रयाेदशी/येँ

झीगु स‌ंवाददाता 

हलिं नेवाः मुनाया लसताय्  नेपालभाषा एकेडेमीया ग्वसालय् सफू ब्वज्याया चिखि फ्यनेगु ज्या जूगु दु ।   मू पाहाँ हलिं नेवाः दबूया नायः सिजन श्रेष्ठं थौं छगू ज्याझ्वःया दथुइ उगु सफू ब्वज्याया चिखि फ्यनादीगु खः ।

किपा-रेखा शाक्य

सफू ब्वज्या मुक्कं स्वन्हू तक न्ह्याइगु खँ सफू ब्वज्याया कजि विजयरत्न असंबरें जानकारी बियादिगु दु । हलिं नेवाः मुनाया लसताय् देशय् दुने च्वंपिं व देशंपिने च्वंपिंं निन्हू यंकं छथासं मुनिगु जुगुलिं उगु हे लसताय् विदेशय् च्वंपिं नेवाःतय् दथुइ पिकाक व च्वमिया सफू थ्यनेमाः धइगु आज्जु ज्वनाः सफू ब्वज्या यानागु खँया जानकारी बियादिल ।

किपा-रेखा शाक्य

थौं बिहिवाः सनिलं निसें आः वइगु शनिबाः तक न्ह्याइगु सफू ब्वज्याय् नेपालभाषां पिहाँ वयाच्वंगु थी थी विषयया सफूया स्टलत दु ।

किपा-रेखा शाक्य

सफू ब्वज्याया चिखि फ्यने सिबें न्ह्यः पाहाँ भाजु सिजनजुं कुत पिकाकःया पिथनाय् महाकवि सिद्धिदास महाजुया निगू सफू “सर्व कर्म ““सकतां मां”लिसें मदुम्ह राम शेखर नकर्मीया “जुजु धौ” सफूया उलेज्या यानादीगु खः ।

किपा-रेखा शाक्य

मू पाहाँ सिजनजुं नुगः खँ तयेगु झ्वलय्  “नेपाः दुने ला सफू पिदना च्वंगु दु, ब्वना च्वंगु नं दु तर देशं पिने च्वंपिं नेवाःतय् दथुइ नं झीगु सफू थ्यंकेया नितिं मचाबाखंया लिसें साहित्यया व अन्य विधाया सफूयात नं छगू धुंकाः मेगु यानाः अंग्रेजी भाषं अनुवाद यानाः नं पिकाये माःगु थौंया ईया माग खः धयादिल ।”  हलिं नेवाः मुना सदां थुगु ज्याझ्वलय् सहकार्य यायेत तयार दुगु खँ नं कनादिल ।

किपा-रेखा शाक्य

नेपालभाषा एकेदेमीया ग्वसालय् जूगु ज्याझ्वलय् नेपालभाषा एकेदेमीया चान्सलर चित्तरञ्जन नेपाली, नेपालभाषा एकेडेमीया उपकुलपति यज्ञरत्न धाख्वाः, सदस्य सचिव मल्ल के सुन्दर, भाषासेवी लक्ष्मीदास मानन्धर, समाजसेवी हितकरवीर सिं कंसाकार, प्रा. प्रेमशान्ति तुलाधर, डा पुष्पराज राजकर्णिकार, चन्द्रमान बज्राचार्य, नेपालभाषा विभागया सृजना श्रेष्ठ प्रधान, निसें कयाः भाषिक ख्यः व साहित्यिक ख्यःया व्यक्तित्वपिनिगु उपस्थिति दूगु खः ।

किपा-रेखा शाक्य

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.