fbpx

सक्वया म्हासु ख्वाः माजु क्वहाँ बिज्यात  

रेखा शाक्य/ झीगु सम्वाददाता

ने सं ११३९ चाैलागाः पारु

सक्वया म्हासुख्वाः माजुयात म्हिगः गुँविहारं स्थानियवासी व थी थी बाजंखलत वनाः  खतय् तया सक्वया पाः लाःगु छेँ सुनटाेलय्  बिज्याकल ।

दँयदसँ चौलाथ्व पुन्हिनिसें न्ह्याइगु थुगु जात्रा द्यः कुहाँ बिज्यायेवं ८ न्हु चा व ९ न्हु न्हि तक न्ह्याइगु खः ।  म्हिगः म्हासुख्वाः माजुया लिसें चिभाः द्यः सिंघलि व ब्यांघलियात नं पाला छेँय् बिज्याकुगु खः ।  द्यःपिं प्यन्हु तक पाला छेँय् हे च्वना बिज्याइ । थथे सक्वःया म्हासु ख्वाः माजु सक्वया पाला छेँय् बिज्याकेगु यात द्यः कुहाँ बिज्याइगु नं धायेगु याः । म्हासुख्वाः माजु कुहाँ बिज्याइगु न्हि कुन्हु येँया २२ धाः हितिइ नं मेला जुइगु खः ।

म्हिगः द्यः कुहाँ बिज्यासां थाैं निन्हुया न्हियात शुन्यया रुपय् काइसा स्वन्हुया न्हि कुन्हु छेँ छेँय् थःथितिपिन्त सःता भ्वय् नयेगु चलन दु । अथेहे स्वन्हुया न्हि तृतीया कुन्हु  सत्ययुगया प्रादुर्भाव जूगु दिं कथं श्री उग्रतारा बज्रयाेगिनी मां स्वयम्भु चैत्य सिंघलि व ब्यांघलिया लिसें बसुन्धरा देवीया नं मू जात्रा बस्तीइ जुइ ।

किपा जीवन श्रेष्ठया फेसबुकपाखें
किपा जीवन श्रेष्ठया फेसबुकपाखें

परापूर्वकालय् वंघल सिमाया हःपाखें वःगु मधुरस त्वंकाः लालनपालन याना ब्वलंका शंखपुरया जुजु दयेकुम्ह शंखदेवयात श्री म्हासुख्वाः माजुं दच्छिया छक्वः दर्शन बिया जुजुया लिसें सकल जनताया कल्याण व उद्धार याये धकाः बियातःगु बचं पूवंके कथं थुकथं मू जात्रा यानावयाच्वंगु खँ इतिहासय् उल्लेख जुयाच्वंगु दु ।

वंगु चाैलागाः अष्टमी कुन्हु विधिवत रुपं ग्वदां तःसें द्यःपिन्त जात्राया नितिं ब्वंगु खः ।

चौलागा चौथिइ कुन्हु  देशय् च्वंपिं स्थानीय् मनूतसें भुज्या वनेगु धकाः पुजाः वनी . चौलागा पञ्चमी कुन्हु धु‌ं भुज्या धकाः वां जाकी लिकाइ . व हे दिं कुन्हु दरबारं पुजा हइ . चौलागा पञ्चमी कुन्हु बौपा बिइगु धकाः अकालं सीपिनीगु नामय् शान्ति जुइमाः धकाः पिशाचपिन्त भ्वय् नकी ।

चौलागा षष्ठीइ होम व पुजायानाः दक्वं द्यःपिं गुँच्वये द्यगलय् हे थहाँ बिज्याइगुलिं हाकनं खटय् तयाः बाजागाजा नापं थाना जात्रा याइ ।  थुगु न्हि कुन्हु नं चिभाःया खः व म्हासुख्वाः माजुया खःयात (बज्रजोगिनी) काेलागाल धइगु थासय्  च्वये क्वये यायां प्याखं हुइकेगु चलन दु । अथे प्याखं हुइकेगुयात बरेक्वब्वाइगु वा द्यः प्याखं हुइकेगु धायेगु चलन दु  ।थ्व प्याखं हुइकेगु नितिं शहरी लागा व जंगलया लागाया सिमाना मपुलि कथं दथुलाक लाःगु लागाय् च्वना याइगु खः ।  चौलागा नवमी व दशमीया न्हि कुन्हु बिचा पुजा धकाः दरबारं व सर्वसाधारणया पाखें गुँच्वय्  देगलय् वना पुजा वनेगु परम्परा थौं तक नं दनि ।

किपा जीवन श्रेष्ठया फेसबुकपाखें

किपा जीवन श्रेष्ठया फेसबुकपाखें
किपा जीवन श्रेष्ठया फेसबुकपाखें

Leave a Reply

Your email address will not be published. Required fields are marked *