सकारात्मक सोचया न्ह्यलुवाः कर्ण शाक्य श्रीघः विहारया थाय्पा जुल

पर्यटन व्यवसायीया रुपय् नांजाम्ह उद्यमी कर्ण शाक्यया म्हसीका छुं दँ न्ह्यवःनिसें सकारात्मक सोचया न्ह्यलुवाःया रुपय् नं न्ह्योने लाना वया च्वंगु खःसा छुं ई न्ह्यःतिनि वय्कया कुतलय् कर्ण सकारात्मक सोच अभियान देय्न्यंक्क न्ह्याना वया च्वंगु दु । थथे पर्यटन व्यवसायी व सकारात्मक सोच अभियानया न्ह्यलुवाः कथंजक सकसिनं म्हसिया वया च्वंम्ह कर्ण शाक्य धइम्ह शाक्य कुल पुत्रजक मखसे श्रीघः विहारया नामं नांजागु बहाः श्री शान्तिघट बज्रधातु चैत्य महाविहार संघ परिवारया कुल पुत्र नं खः धइगु आपासिनं मसिउ ।
बौद्ध धर्मय् संघ धइगु बुद्धं धर्म अर्थात मध्यम मार्गया उद्घोषया रुपय् स्थापना याना बिज्यागु धका धयातःगु दुसाः वहे संघया व्यवस्था कथं बुद्धया महापरिनिर्वाण लिपा आः तक नं विश्वय् बुद्ध धर्म व बौद्ध संस्कृति व्यापकता कया वया च्वंगु दु । अले बुद्ध धर्म व संस्कृतिया धइगु विहार खः । गुकीयात झीसं बहाःबहीया रुपय् खना वया च्वनागु दुसा वहे बहाःबहीया थाय्पा जुइगुयात स्थराभिषेक याय्गु कथं कया वया च्वंगु दु । अज्यागु तःजिगु पदय् आसन ग्रहण याय्गु विधियात महास्थरावीर गद्दी आरोहण एवं महास्थराभिषेक अले छत्राभिषेक धका नं धाइ धका लुम्बिनी विश्व विद्यालयया उप कुलपति एवं नेपाल परम्परागत बौद्ध धर्म संघया नायः प्रा. डा. नरेशमान बज्राचार्यं धयाबिज्यागु दुसाः थज्यागु तःजिगु अभिषेकया ह्वःताः कर्ण शाक्ययात चूलागु दु ।
थुकथं तःजिगु अभिषेक लुइगु अर्थात थाय्पा लुइगु ज्याः श्री शान्तिघट बज्रधातु चैत्य महाविहार संघ श्रीघः बहालय्  सम्पन्न जूगु खः । अले श्रीघः विहारया थाय्पा कथं कर्ण शाक्य जुया बिज्यागु दु ।ं शुक्रबार श्रीघः बहाःया न्याम्ह थकालीया नापनापं गुरुजुपिन्सं वसपोलयात अभिषेक याना बिज्यागु खःसा अभिषेक लिपा देय् चाहिकूगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.