संस्कृतिविद् बलदेव जुजुया लुमन्तिइ श्रद्धान्जली

 

११३८ गुँला थ्वः द्वादशी/येँ

संस्कृतिविद् स्व. वलदेव जुजुयात लुमंकुसें वंगु शनिवाः येँय् छगू श्रद्धान्जली सभा जुल । राजोपाध्याय समाजं नेपाली संस्कृति क्षेत्रय् संस्कृतिविद् या नामं म्हसिउम्ह समाजया सल्लाहकारयालिसें आजीवन दुजः जुजयात लुमंका थुकथं श्रद्धान्जली सभा याःगु खः ।

ज्याझ्वलय् प्राध्यापन क्षेत्रय् स्व. जुजुया सहकर्मी नेपालभाषाया स्यनामि राजा शाक्यं संस्कृति क्षेत्रया विविध पक्षय् बलदेव जुजुया प्रगतिशील विचाःयात कयाः व्याख्या यानादिल । गुलिसिनं वय्कःया लेख, कृतियात कल्पना तकं धायेगु याःगु खःसां व हे कल्पना अनुसन्धानया नितिं न्हापांगु पलाः जूवंगु खँय् बः बियादिल ।

अथेहे नेवाः देय् दबूया नायः नरेश ताम्रकारं नेवाः सभ्यता संस्कार व संस्कृतिया सुक्ष्म अध्ययन यायेगु खःसा वय्कःया कृति व लेखया अध्ययन यायेमाःगु कनादिल । थम्हं नं वय्कःया कृतिपाखें आपालं खँ सिइकागु लुमंकादिल ।

नेपालभाषा मंकाः खलःया सचिव नरेशबीर शाक्यं समाजय् प्रचलित संस्कृतियात न्हियान्हिथंया जीवननाप स्वाःना व्याख्यायासें संस्कृतियात स्वयेगु पहलय् हिउपाः हःगु धयादिल । नेवाः समाजय् बौद्ध समाजय् बज्राचार्य व सनातनी समाजय् राजोपाध्याय गुरु पुरोहितया रुपय् दुगु चर्चायासें शाक्यं बज्राचार्यपिन्सं नं च्वसा न्ह्याका च्वंगु दुसां राजोपाध्यायलय् धाःसा म्हो हे अध्ययन अनुसन्धान व लेखन क्षेत्रय् खनेदुगु खँ धयादिल । व हे ल्याखय् नं च्वमिपिं मध्यय् मदुम्ह बलदेव जुजुया लेखन विशिष्ट शैलीया दुगु शाक्यं कनादिल ।

राजोपाध्याय समाजया अध्यक्ष अमरराज शर्मा राजोपाध्यायं मदुम्ह जुजुं यक्वसित शिक्षा बिया जीवनया सहि अर्थ थुइकेगुलि यक्व योगदान बिउगु खँ कनादिल । वय्कःया शिक्षा व मार्गनिर्देशनं यक्वसिनं अध्ययन, अनुसन्धान क्षेत्रय् सफल जुइधुंकुगु तकं खँ कनादिल ।

ज्याझ्वलय् मदुम्ह जुजुया योगदानया खँ प्वंकेगु झ्वलय् राजोपाध्याय समाजया उपाध्यक्ष संजय शर्मा राजोपाध्यायं वय्कः छम्ह सँस्कृतिविद् जक मखसें संगीतविद् तकं जुगु खँ कनादिल । विभिन्न राग, तालया ज्ञातातकं खःम्ह जुजु संगीतया लागाय् नं विभिन्न सम्मानपाखें सम्मानित सम्मानित जुइधुंकुगु धयादिल ।

संस्कृतिविद् जुजुया वंगु श्रावण ९ गते बुधबार चान्हय् १२ः३० बजे मदुगु खः । वय्कःयात अल्जाइमर डिजिज ल्वय् जुगु खः । स्व. जुजुया संस्कृति सम्बन्धि नेपाःया तान्त्रिक द्यः व तान्त्रिक पूजा, कान्तिपुर, येँ देयया वंघःत्वाः व आजुद्यः, नेवाः संस्कार व उकिया विधि, मृत्यु संस्कार नेवाः संस्कृति कथं लगायतया विश्लेषणात्मक सफूत प्रकाशित जुइधुंकुगु दु । वय्कः राजोपाध्याय समाजया सल्लाहकारया लिसें वैदीक प्रतिष्ठानया संस्थापक अध्यक्ष समेत खः । वय्कलं सरस्वती क्याम्पसय् क्याम्पस प्रमुख जुया ज्या यानादी धुंकुगु दु ।

बुखँ विराजकाजी राजाेपाध्याय

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.