संचारकःमि विगेन नं कभर म्ये कासाय्

पोहेंलागा षष्ठी ११३८/येँ

रेडियो उपत्यकाया लोकंव्हाःगु ज्याझ्वः लखतं लाक्कया न्ह्याकामि, संचारकःमि विगेन तुलाधरं थःत छम्ह बांलाःम्ह म्येहालामि कथं न्ह्यःने हःगु दु ।

संचारकःमि तुलाधरं नं बुदिंया भिंतुना कभर म्ये कासाय् ब्वति कासें थःत म्येहालामिया रुपं न्ह्यःने हःगु खः । थौंकन्हय् बुदिंया म्येया कभर म्ये कासाया चर्चा जुयाच्वंगु इलय् तुलाधरं नं थुकी ब्वति काःगु खः ।

तुलाधरं बुदिंया म्येयात कभर यासें भिडियो म्ये कासा पेजय् शेयर यायेधुंकूगु दु । थुकिया लिसें थौं सुथय् ११ताः इलय् पोष्ट जूगु तुलाधरया म्येया भिडियो १२घौ दुने हे ३द्वलं मयाक्क भ्यूज नं दयेधुंकल ।

नापनापं ‘सुलाः सुलाः जक स्वयाः’ धइगु म्ये हालाः छगू इलय् लोकं व्हाःम्ह म्येहालामि वीरेन्द्रमान शाक्यं नं थुगु कासाय् थःगु भिडियो दुतिनाः ब्वति कयादीधुंकल । झीगु.कम लिसे खँ ल्हासें म्येहालामि शाक्यं कासा त्याकेगु स्वयां नेवाः संगीत ख्यलय् छगू न्हूगु कथंया ज्या न्ह्याःगुलिं उकी छपा अप्पा तने कथं जक थम्हं म्ये पोष्ट यानागु धयादिल ।

थुगु न्यूज तयार जुतल्लेया दुने म्ये कासाया पेजय् थःगु म्ये पोष्ट यानाः ३५म्हेसिनं कासाय् ब्वति कायेधुंकूगु दु । भ्यूजया ल्याखं मन्जिल शाक्यया भिडियो २३१११ भ्यूजलिसें न्ह्यःने दुसा सुमन मानन्धरया भिडियो २३०२८ भ्यूजलिसें ल्यू लानाच्वंगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.