संगीतकार मनराजा नकर्मी याकः सनिल -०७५ थ्वहे माघ ५ गते

ने सं ११३९ पाेहेलाथ्व पंचमी

छम्ह तबला बादकयालिसें संगीतकारकथं म्हसिउम्ह  मनराजा नकर्मीया याकः सनिल -०७५ थ्वहे वइगु माघ ५ गते नेपाल प्रज्ञा प्रतिष्ठानया दबलिइ जुइ त्यंगु दु ।

किपाः रेखा शाक्य

थःगु सृजनाय् सदां थःत समर्पित यानादिम्ह मां भाषाया अले खस भाषाया आपालं सांगीतिक विकासया नितिं थःत पानादिम्ह सर्जकयात छक्वः सकसिगु न्ह्यःने दबलि हे थनाः वय्कःया कलायात ब्वयेगु स्वयेगु अले न्यनेगु तातुनायात साकार रुप बिइत नेपाल मण्डल टेलिभिजनया ग्वसालय् ज्याझ्वः यायेत्यनागु  जानकारी थाैं छगू पत्रकार सम्मेलन यासें बियादीगु खः ।

न्हिनसिया ३ बजे न्ह्याइगु उगु याकः सनिलय् दिनेशराज रेग्मीया संयाेजकत्वय् २० म्ह वाद्यवादकयालिसें प्रस्तुति क्यने ज्या जुइत्यंगु दु । उगु ज्याझ्वलय् जनकवि दुर्गालाल श्रेष्ठ, भीमबहादुर नकर्मी ,डा रामविक्रम सिँजापति, डा कृष्णहरी बराल, नातिबज्र, केशवराज राजभण्डारी, सुरेन्द्र राना, सुरेश कुमार कार्की, डा दीर्घसिंह बम, आनन्दरत्न बज्राचार्य, डा सुनलाल थापा, हेमन्त विवश, राजकुमार श्रेष्ठ, निर्मलरत्न शाक्य, रमेश गाउँले, देवदत्त भट्ट व तुलसी महर्जनया च्वसां पिज्वःगु म्येय् ख्यालिजुजु मदनकृष्ण श्रेष्ठ, संगीता प्रधान, कुन्ती माेक्तान, धनबहादुर गाेपाली, जुजुकाजी रंजित, स्वयम्भूराज शाक्य, निशा देसार, टिका प्रसाइ, संगीता थापा शाक्य, यम बराल, आनन्द कार्की, विश्व नेपाली, दिपक लिम्बु ,सन्ताेष लामा, रमना श्रेष्ठ, रत्न शाेभा महर्जन, रामचन्द्र काफ्ले, सरीता शाही, मेनुका पाैडेल व प्रकाश तिमिल्सिनाया सलय् थ्वइगु जूगु दु ।

लिसें संगीतकार नकर्मीया लाेकंह्वाःगु म्येय् वय्कःया म्ह्याय् मय्जु नकिं आशिष्मा नकर्मीया लिसें मेपिं कलाकारपिन्सं हुलाप्याखं नं क्यनीगु ग्वसाः दु ।

पत्रकारपिन्सं न्यनादिगु न्ह्यसःया लिसः बिइगु झ्वलय् थुगु याकः सनिलं वःगु ध्यबां गायन व संगीत क्षेत्रय् थःपिन्त समर्पित यानाच्वपिनिगु नितिं छगू काेष दयेकेगु खँ धाःगु दु । गुगु ध्यबां वय्कःपिन्त माःगु कथंया गुहाली यायेगु जुइ धयादिल । अथेहे नकर्मी थें जाःपिं छम्ह साधकया थुकथं याकः सनिल न्हापा हे जुइमाःगु खः तर झीथाय् मिखां खंपिं व लिक्क लाःपिन्त सिरपाः व सम्मान इना बिइगु अले लाइफटाइम अचिभमेन्ट थें जाःगु सम्मान नं मनूया बेहाेशी पन थ्यंका बिइगु अवधारणा हे गलत जूगु धकाः संकिपा समिक्षक प्रकाश साय्मिजुं थुकिइ सकसिनं वाः चाय्केत बः बियादिल ।

संगीतया ख्यलय् म्येहालामिया नां बय्बय् जूसां छपू म्ये न्यने बहःगु जुइकेत ल्यूने च्वना ज्यायाइपिं वाद्यवादकया ज्वः मदुगु याेगदान दइगु खँ ल्वमंके मज्यू धाःसें थुगु याकः सनिल अज्यापिं ल्यूने च्वना ज्या यानाच्वंपिन्त न्ह्यःने हयेगु छगू धिसिलाःगु माध्यम खः धयादिल ।  ख्यालिजुजु मदनकृष्णं ज्या सुथां लाय्माः धकाः भिंतुना बिसें थःम्ह नं म्ये छपू हालेत्यनागु खँ कनादिल ।

१३ दँया इलय् हे  रेडियाे नेपालय् शास्त्रीय संगीतय् थःगु हुनर क्यनादि धुंकूम्ह मनराजा थाैंकन्हे रेडियाे नेपालय् मू संगीत संयाेजक पदय् च्वना ज्या यानाच्वनादिगु दु । वय्कलं थुकथं थःगु पलाः संगीत ख्यलय् न्ह्याका च्वना दिगु नं स्वंगु दशकं मल्याये धुंकल ।

तबला वादनय् गाेल्ड मेडलिष्ट वय्कलं संगीत महर्षी नातिकाजी सम्मान २०७५ Maritorious Service Glory Award Soka Association Singapore – 2003, नेपालभाषाय् सर्वाेकृष्ट संगीतकारया रुपय्   Page3 Peoples Choice Award पाखें नं सम्मानित जुइ धुंकूगु दु ।

वय्कःया संगीतय् आपालं म्ये हालामि कलाकार भाजु मय्जुपिन्सं म्ये हाला दी धुंकूगु दु । अथेहे हजाराैं म्येय् वय्कलं थःगु कला तबलाया कलाकारिताय् दुथ्याका दीधुंकूगु दु ।

नेपाली भाषाया १३ गू म्येया संग्रह, नेपालभाषाया ९ म्येया संग्रह, ३ गू धूनया संग्रह, ८ गू संकिपातय् वय्कःया कलाकारिता अले सृजनाया रस्वादन न्यनामिपिन्सं कयादि धुंकूगु दु ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.