श्रावण २६या न्हियात राष्ट्रिय नृत्य दिवस घाेषणा याइगु

 

११३८ गुँला थ्वः दुतिया/येँ

व‌ंगु श्रावण २६ गते छगू ज्याझ्वःयासें राष्ट्रिय नृत्य दिवस हनेगु ज्या जुल । उगु हे ज्याझ्वलय् थःगु नुगः खँ तय्गु झ्वलय् संस्कृति, पर्यटन तथा नागरीक उड्डयनमन्त्री रविन्द्र अधिकारीं वइगु २०७६ श्रावण २६या न्हियात राष्ट्रिय नृत्य दिवसया रुपय् राज्यं घोषणा याइगु प्रतिवद्धता व्यक्त यानादिगु दु । उगु दिनय् राष्ट्रिय नृत्य दिवस हनेगु तर दिवसया नामय् विदा बिया वा कया मखसें उत्सवया कथं हनेगु जुइ धयादिगु दु ।

आर्थिक रुपं सवल जुइवं कला व संस्कृतिनं उतिकं धनी जुइ यःयां जक जुइमफइगु खँय् बः बियादिसें नेपाः छगू थःगु हे मौलिक संस्कृति व कलां जाःगु देय् जुगुलिं थुगु नृत्यया विविध कला व पक्षयात संरक्षण, सम्बद्र्धन, प्रवद्र्धन याना हे नं झीसँ आर्थिक रुपं सवल जुइगु लँपु मालेमाः मन्त्री अधिकारीं धयादिल ।

ग्वसाखलःया पाखें नृत्य निर्देशक संघ नेपाःया नितिं कार्यवाहक अध्यक्ष संजय शर्मा राजोपाध्यायं कलाकारयात सदां न्ह्याइपुकेगु व देशया तिसाया रुपय् जक लिकुंकेगु प्रवृतियात याकनं हे हिलेमाःगु बिचाः प्वंकादिल । कला व कलाकारिता क्षेत्रयात राज्यया पाँचौ अंगको रुपय् परिभाषित यायेमाःगु तकं वय्कलं माग यानादिगु दु । व हे झ्वलय् निक्वःगु राष्ट्रिय नृत्य महोत्सवया संयोजक प्रदिप श्रेष्ठजुं संघया विगत व आगामी ज्याया रुपरेखा न्ह्यःब्वयादिगु खः ।

नृत्य निर्देशक संघ नेपालया थी थी शाखाया साथै नृत्य सम्वद्ध थी थी संस्थाया लिसें नृत्यप्रेमीपिं सकलें र्याली ब्वतिकयादीगु खः । ज्याझ्वलय् बनेपाया ऐतिहासिक राजारानी प्याखंया ब्वः न्हापांगु खुसिइ मञ्चय् न्ह्यब्वःयेगु ज्या नं जुल सा काभ्रेया चामुण्डा खैजेडी भजन पुचः,नृत्य निर्देशक संघ यल शाखाया लाइभ धिमेलिसेें धिमे प्याखं न्ह्यब्वःगु खः ।

उगु हे झ्वलय् भारतया प्रख्यात रियालिटि शो डान्स प्लस २ स ब्वति कयाझाःपिं wild ripperz crew  पाखें थःपिनिगु नृत्य नं प्रस्तुत याःगु खःसा उगु पुचःयात ग्वसाखलकं सम्मान नं याःगु खः ।

बुखँ विराजकाजी राजाेपाध्याय

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.