श्रमजीवी पत्रकार ऐन लागू यायेगु माग – मेट्राे एफ एमया पत्रकारतय्सं ज्ञापन पौ लःल्हात 

https://www.facebook.com/rajendra.manandhar.7906

झीगु संवाददाता

ने सं ११३९ थिंलागाः  एकादशी

येँ महानगरपालिकां न्ह्याका वयाच्वंगु मेट्राे एफ एम ९४.६  मेगाहर्जया पत्रकारपिन्सं श्रमजीवी पत्रकार ऐन कार्यान्वयन यायेत माग याना ज्ञापन पौ लःल्हाःगु दु ।

मंगलवाः नेपाल पत्रकार महासंघ मेट्राे एफ एम प्रतिष्ठान शाखाया संस्थापक नायः श्रीकृष्ण महर्जनं उगु कथंया ज्ञापन पौ महानगरपालिकाया सूचना प्रविधि विभागया प्रमुखयात लःल्हाःगु खः । पत्रकार नापं ज्याझ्वः न्ह्याकामिपिन्सं मंकाः कथं ल्हाःचिं तया ज्ञापन पौ लःल्हायेगु ज्या महानगरपालिकाया विभागया ज्याकू राष्ट्रिय सभागृह लागाय् हे लःल्हाःगु खः ।

किपाः गुहालि श्री कृष्ण महर्जन

मेट्राे एफ एम स्थापना कालंनिसें  निरन्तर रुपं ज्या याना वयाच्वंपिं पत्रकार व ज्याझ्वः न्ह्याकामिपिं आः तक नं करारय् लानाच्वंंगु अवस्थाय् श्रमजीवी पत्रकार ऐन कथंं स्थायी यायेमाःगु माग याना अथे ज्ञापन पौ लःल्हाःगु खः । ज्ञापन पौ लःल्हानाकासें विभागिय प्रमुख राज्य प्रकाश प्रधानांगं थःम्हं फुगु कथंया कुतः यायेगु नापं पत्रकार व संचारकःमितय्गु मागयात सम्बन्धित थासय् तक थ्यंका बिइ धकाः बचं बियादीगु खः ।

मेट्राे एफ एमय् नीछम्ह पत्रकार ज्याझ्वः न्ह्याकामिपि ज्या यानाच्वंगु दु । येँ महानगरपालिका स्वयं हे स्थानीय सरकार जूगु अवस्थाय् सरकारं हे दयेकूगु श्रमजीवी पत्रकार ऐन लागू याना पत्रकारपिन्त स्थायी यायेमाःगु पत्रकारतय्गु माग खः ।

लमुंकेबहःजू स्थायी यायेमाःगु माग याना पत्रकारपिन्सं इलय् ब्यलय् आन्दोलन नं याना वयाच्वंगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.