शहितपिन्त लुमंकुसें सहिद दिवस हन

११३८ सिल्लाथ्व चतुर्दशी/येँ

देश व जनताया नितिं थःगु जीवनया बलिदान बियाः सहिद जूपिं सहिदपिन्त लुमंकुसें थौं देय्‌न्यंक सहिद दिवस हनाच्वंगु दु ।

थौंया दिनय् तत्कालीन इलय् जहाँनिया राणाशासन विरुद्धय् सः तःपिं प्यम्ह सहिद शुक्रराज शास्त्री (जोशी), धर्मभक्त माथेमा, दशरथ चन्द व गङ्गालाल श्रेष्ठयात लुमंकुसें सहिद दिवस हनेगु याइ । ।

उगु इलय् शुक्रराजं नेपाल प्रजा परिषद् पार्टि स्थापना यानाः राणाशासन विरुद्ध अभियान न्ह्याकूगु खः । थुगु हे पार्टिपाखें राणाशासन विरुद्ध क्रान्ति यायेत मेपिन्त तकं प्रेरीत याःगु खः ।

राणा शासनया विरोधय् सः तःगु हे हुनिं विसं १९९७ माघ १० गते शुक्रराज शास्त्रीयात येँया टेकुइ दुगु क्वंसिमाय् यख्खाना स्यानाब्यूगु खः । व धुंकाः माघ १३य् सिफलय् धर्मभक्त माथेमायात यख्खाःगु खः ।

दशरथ चन्द व गंगालालयात धाःसा माघ १५या दिनय् शोभा भगवतीइ गोलिं कयेकाः स्यानाब्यूगु खः।

निरंकुश राणाशासन विरुद्ध सः ल्ह्वनाः थःगु जीवन तकं बलिदान बियाः देश व जनताया नितिं प्रजातन्त्र हयेत व हे प्यम्ह सहिदपिन्सं ब्यूगु योगदानयात लुमंकुसें सहिद दिवस हनेगु याःगु खः । थौं सहिद दिवसया झ्वलय् देयन्यंक थीथी कथंया ज्याझ्वःत यानाच्वंगु दु ।

लिपांंगु इलय् राज्यं हरेक घटना, दुर्घटनाया मृतकपिन्त तकं सहिद घोषणा यानाः धात्थेंया सहिदपिनिगु अपमान यात धइगु कुंखिना जनमानसय् अप्वयावंगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.