“व मिसा” 

११३८ चौलागा नवमी /येँ

रमेश मानन्धर
कालिमाती, येँ
   व मिसा जिगु नुगलय् खुरुखुरु दुहाँ वल । गथे लःयात लँ म्वां, लः थः स्वयमं हे लँ दयेका वनि, व मिसा नं जिगु नुगलय् दुहाँ वल । म्हःमसिउ वयात जिं । निघौ हे मजाःनि जिं व मिसायात खंगु । लँ दथुई बसय् थाहां वःम्ह व मिसा । संजोग, वहे थासय् जि नापं च्वना वःम्ह मनू व बसय् थाहां वःथाय् हे कुहां वंगु । सित खालि जुगु कारण व मिसा जि नाप हे सिटय् च्वं वल । मेगु सिट न खालि मदुगु हे खः ।
   न तिमिलाथें थी वया ख्वाः, न मूसःगु अय्लाः थें वयागु मिखा । जितः न वयागु तिमिला ख्वालं साःगु खः, न त मुसःगु अय्लाः थेंज्याःगु वयागु मिखां हे साःगु खः । साधारण हल्का वाउँगु सुतिया लं सुरुवाः अले साल्लुगु व हे रंगया स्वीटर फिनातःम्ह व । जिं अन्दाज यानागु व २०दँ अप्वःला दइ हे मखु, बरु कम हे जुई । ख्वालय् छुं कथंया कृतिम समाः यानातःगु मदु । प्राकृतिक स्वरुप । बांला । हिसि दु । तुयु नं मखु । हाकु नं मजु । तर जितः जिगु नुगलं धाल, तसकं हे बांलाःम्ह खः न्हां व मिसा ।’
   घौछिं मयाय् धुंकल व मिसां बसय् जिनापं च्वनाः यात्रा यानाःगु । तर जि नतुसुतु मदुनि व मिसानाप । न थाय् सिउ । न बाय् सिउ । न नां हे सिउ । बस दिकल । च्या(नास्ता यायेगु नापं फ्रेस जुइत । चीधंगु बस्ति जक दु अन । अथे हे १५–२०गु चीचिधंगु पसः दु । बस दिकूथाय् स्वकालँ जुयाच्वन । जिपिं वनाच्वनागु लँया खवपाखे पहाड दुसा, जवय् १०–१५ मिटर ति क्वय् निर्मल खुसि न्हयानाच्ंगु दु । व हे थासं निसें जवपाखे मोड कयाः मेगु गाँमय् वनिगु लँ दु । जि नं छगु होटलय् दुहां वना ध्याक्वय् लाक्क च्वंगु मेचय् फ्यतुवना । झ्यालं पिने खुसि, अले जवपाखे वना च्वंगु लँ बाँलक खने दु । च्याया अर्डर यानाः झ्यालं पिनेया लु स्वया । मोवाइलया क्यामरां फोटो छपाः निपाः न कया । क्वय् खुसिइ मिस्त वसः हियाच्वंपिं नापं मस्त म्वःल्हुयाच्वंगु खनेदु ।
   जिगु मिखा चाःहिहिउं जवपाखे वनाच्वंगु लँ पाखे जूवन । जि झसंग वन, व लँय् छम्ह मिसा वनाच्वंगु खन । जिं मिखां तिफ्याना स्वया, व व हे मिसा खः, बसय् जि नाप च्वना वःम्ह । तुरन्त बिचाः वल, सायद व मिसाया छेँ उखे गामय् पाखे जुई । आः जिगु मिखा मेथाय् वनिगु खँ हे मंत । मिखां खने दतले व मिसायात स्वयाच्वनेगु बिचाः मनय् वल । व मिसा छकः पतिकं लिफः लिफः स्वयाः न्हयाःवना च्वंन । अबलय् लाक्क अनं छगः ट्याक्टर थुखेपाखेेंं वन । ट्याक्टर न्हयाःगु स्वयेबलय् लँ भचा अप्वः हे स्यनाच्वँ थे ताल । लँ स्यनाः गाः हे गाः जुया च्वँथें च्वं । ट्याक्टर थःपाखें तापाय् धुंका क्वखायातःगु ब्याग ल्हातय् कयाः ब्याग चाय्काः फ्यतुल व मिसा । काचाकाचां जवगु ल्हाः नं संका च्वन । जिं थःगु मोवाइलं जूम याना स्वयाः । जितः वं क्वकिचां लँ म्हुयाच्वंगु थें ताल । लँय् दुगु गाःयात अप्वः तःगाः याना च्वं थे ताल । व मिसां हाकन ब्यागय् ल्हाः दुछ्वया ब्यागं प्वः छप्वः लिकात । व प्वः गालय् तया धू व चां काचाकाचा ल्हाकल । न्यागू मिनेत न मबिउ जुई व मिसा थःगु ज्या सिधयेका लिहां तुं वल ।
 
   जिगु मिखा आश्चर्यं चाःगु चालं । म्हुतुं छुं शब्द पिहां मवः । जिगु कल्पनां जिगु हे म्हः क्वानावल । क्वाःलःखं लूम्ह थें म्ह छम्हं चःति चःति जुल । छु व हे जुइत्यंगु खःला ? जिगु कल्पना जिगु हे ल्हाः फ्याराफ्यारां खात । दनेत स्वया, दने मफु । म्ह छम्हं सुपर ग्लु नं तिकातःथें । जिगु मिखा व थासं मेथाय् स्वयेगु आंट नं मंत । सिंग्वंथे जुयाः स्वयाच्वना । मन भाराभारा मिनाच्वन ।
     “यः मा….” जि थारान्हुल । जिगु ल्हातय् ख्वाउँक वःगुलिं । व सिबे नं जि झन थारान्हुल, जिगु न्हयःने व हे मिसा फ्यतुनाच्वंगु खना । व मिसां जिगु ल्हाः थिउगु जुयाच्वन । व मिसाया ल्हाः ख्वाउँसे च्वं । सायद नकतिनि ल्हाः सिला वःगुलिं जुइ । व मिसाया ल्हाः प्या हे प्याःनी । जि लाटा थें जुयाच्वन । म्हुतुं छगु शब्द पिहां मवः । व मिसां जिगु न्हयःने तयातःगु च्या गिलास क्यनाः जितः त्वनेत भाय् यात । जिं आज्ञाकारी मचांथें च्या गिलास कयाः म्हुतुई दिका । जिगु मिखा धाःसा व मिसाया ख्वालय् छकः, पिने सतकय् गन व मिसां सामान ल्हाका थकुगु खः, अन वनाच्वन । व मिसां न जितः छकः, पिने सतकय् छकः स्वयाच्वन । जिं न स्वयाच्वना । जिगु शंका यथार्थय् जुईत्यंगु थें तायावल । अबाय्त नापं च्वनाः, उलि मछि जुईधुंकाः न जिं वयात न्यने मफु, छं अन छु तयावयागु धकाः । मिखा मिखा जक ल्वाना च्वन ।
 
   ५–७ मिनेट लिपा तापाकं खनेदत व लं वँचुगु मोटर छगः थुखे पाखे वयाच्वंगु । व खनेवं व मिसाया ख्वाःया भाव हिल । छगु विजयया भाव खनेदत । कटु मुस्कान ह्वल व मिसाया कोमल ख्वालय् । जिगु मिखा व मिसाया ख्वालय् जुवन ।  तुरन्त व मिसाया ख्वाःया भाव हिल । व मिसां मिखां हे मि पिहां वइथें जुइक तम्वलं व मोटरयात स्वयाच्वन । जिं नं पिने स्वया । उखें वयाच्वंगु मोटर उगु गाः सिबें १० मिटर ति न्हयःने हे थःगु साइड कायाः दिकल । उबलय् हे थुखे पाखें छगः डोजर उखेपाखे वनाच्वंगु खनेदत । सायद व डोजर वःगु खनाः हे उखें वःगु मोटरं साइड बीत दिकुगु जुइमा ।
   “उफ् ……!” धका थःगु कपा थम्हेसिनं हे दाया क्वसवल व मिसा ।
   “ढ्वाङ……….ग… !” मूगु सः नापनापं जि जुरुक्क दना । न्हाच सुपरग्लुनं तिकातःगु सिँग्वं थे जुयाच्वंम्ह जिके हाकनं गन फुर्ति वल जिं मसिल । अपाय्सकं बल्लाःगु, अपाय्मछि ग्वःगु, अज्याःगु झ््यातुगुु डोजर ढ्वाङग सः नापं भ्वँ ब्वः थें ब्वःगु, अले हाकन च्वं क्वय् बँय् बस्वाःबलय् हाकन छकः तसलं ड्याम्म्म्म्म सः वल । थुकिया लिसे लिसे टुक्रा टुक्रा छरेजुगु डोजरया पाटा, धुफ्वः दंगु अले ढ्वाङग, ड्याम्म्म्म्म सः लिपा मनूतय् चिल्लाय् दंगु सःलं कोलाहल जुल । जि धाःसा लातां केरा स्वःथें गुबलें न्हयःने च्वंम्ह व मिसायात गुबलें पिने सतकय् मिखा ब्वयाच्वना । न्हाच दिकूगु वँचुगु मोटर पुलिसतय्गु जुयाच्वंन । पुलिसत मोटरं पिहां वयाः व हःताः जुगु थासय् तुरन्त घेरे यानाः थःगु ज्या न्हयाकल । जिं थुल, व मिसाया टार्गेट पुलिसया मोटर खः । तर हःतालय् लात छगः डोजर ।
   “भलादमीपिनिगु बिश्वासघाती ज्यां यानाः जिमिगु ल्हातय् ज्याभःया थासय् बम ज्वनाः छेँ न पिहाँ वयेमाःगु विवसता दु । सहिदया कोखं न्हूगु युग जन्मे याये माःगु दु । मृत्यु नापनापं युग जन्मे जुई, बुद्ध जन्मे जुइ । क्रान्ति बिना थन शान्ति वइमखु ।” उलि धयाः टेवुलय् च्वंगु ब्याग कयाः सरासर होटलं पिहां वन व मिसा । जि धाःसा झ्वाता थें थिंग दनाः स्वयाच्वना, गुबलें झ्यालं पिने, गुबलें होटलया व मूलुखा, गनं व मिसा पिहां वन ।
 
   चित्कार व अर्तनादया सः ज्वनाः मनुत व हःताः जूथाय् ब्वाँय् वनाः स्वः वनाच्वन । पुलिसतय्सं हःताः जूथाय् घेरे यानातःगु दु । जिगु मिखा सतक क्वय् खुसीइ जू वन । गन न्हाच तक दुपिं मिस्त, मस्त छम्ह हे मदयेधुंकल । ओहो छम्ह मिसा दनि खनि । अरे व मिसा ला ? तुरन्त गनं अन थ्यंगु व मिसा ? व मिसां जिथाय् स्वया च्वंगु थें ताल । खः वं जित हे स्वःगु खः । स्वःगु जक मखु जितः स्वयाः ल्हाःभाय् नं यानाहल । बाईबाई यायेगु पहलं । जिगु ल्हाः नं छाय् खः मचायेक हे बाई बाई याये थें सन । नापं जिगु नुगलं व मिसायात धयाच्वन छंगु क्रान्तिया कोखं याकनं हे बुद्ध छम्ह जन्मे जुइमा ।
   “झ्वाम्म !” खुसिइ तिंन्हुल व मिसा । जि झसंग वन । जिगु म्हगस चबुत । जि जुरुक्क दनाः फ्यतुना । मिखा चाय्काः स्वया । क्वथाय् सुं मदु । व मिसा दइगु ला ख हे मखुत । म्हगसय् वम्ह व मिसायात छकः लुमंका । निपा मिखा निपा ल्हातं तिसिना । हाकनं छकः व मिसा व व म्हगस छकः लुमंका । अले जिगु म्हुतुं मचायेक हे शब्द पिहां वल “हे भगवान व मिसाया कोखं क्रान्तिया बुद्ध छम्ह याकनं जन्म जुइमा, व बुद्धं देशय् याकनं शान्ति हय्फयेमा, मुक्तिया लँ माले फयेमा । जिगु प्रार्थना द,ु छुं हे मजुइमा व मिसायात ।”
(ने.सं.११३७ सिल्लाचह्रे)
ने.सं. ११३७ चिल्लागा द्धदशी २०७३ चैत्र १२ गते शनिवा ख्वपय् जुगु विरात साहित्य ज्याझ्वःलय् ब्वनागु बाखं ।

One thought on ““व मिसा” 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.