विश्वया हे छगू ‘हेरिटेज ट्रेक- विश्व सम्पदा दिवसया संदर्भय्

११३८ बछलाथ्व पारु/येँ

झीगु संवाददाता

विश्व सम्पदाय् सूचिकृत हनुमानध्वाखानिसें स्वयम्भू तक या २ दशमलव २ किलोमिटरया ‘हेरिटेज ट्रेक’ या थपु यायेया नितिं स्थानीयया पहलय् थी थी ज्याखँ जुयाच्वंगु दु । विश्व सम्पदा उत्सव मूल समारोह समितिपाखें ‘हेरिटेज ट्रेक’ या थपुया नितिं सुचुकुचु, सचेतना, सम्पदा संरक्षण, चित्रकला, साइकल यात्रा, पदयात्रा, कला कार्यशाला लगायतया छगू वाःया नितिं थी थी  ज्याखँ न्ह्यानाच्वंगु दु । अन्तर्राष्ट्रिय सम्पदा दिवसया सन्दर्भयात कया ऐतिहासिक सम्पदा यात्रा यानाच्वनागु खँ मूल समारोह समितिया सचिव डिल्लीरत्न तुलाधरं जानकारी बियादीगु खः । समितिया सचिव डिल्लीरत्न तुलाधरं प्राचीन इलय् निर्माण जुगु कलात्मक शैलीया देगः, चित्रकला, तत्कालीन सभ्यता व सम्पन्नतायात संरक्षण व प्रवर्द्धन  यायेफुसा स्थानीयवासीयात र्आथिक रुपय् तकं भर दइगु खँ धयादिल ।

किपा- सुरेम देसारया फेसबुक पाखें साभार

वय्कःया धापू कथं, ऐतिहासिक–साँस्कृतिक महत्वया थुगु सम्पदा पदयात्रा विश्वय् हे नमूना कथं जुइगु खँ दु । सोमबार ‘हेरिटेज ट्रेक’य् सच्छिम्ह मल्याक ब्वनामिपिन्सं पदयात्रा यागु खः । पदयात्रा यायेगु झ्वलय् उगु लागाय् लाःगु २० गू स्वयां अप्वः मठ, मन्दिर, कला, संस्कृतिया जानकारी मुनेगु ज्या याःगु खः ।

किपा- सुरेम देसारया फेसबुक पाखें साभार

येँ महानगरपालिका व युनेस्कोया गुहालीं न्ह्याना च्वंगु थुगु अभियानय् महानगरपालिकाया खुगू वडा व प्यम्ह सांसदपिनिगु सक्रियताय् जुयाच्वंगु खः । मूल समारोह समितिया संयोजक महानगरपालिकाया प्रमुख विद्या सुन्दर शाक्य जुयादी ।

पदमार्गय् भित्ते चित्रलेखन तकं जुयाच्वंगु दु । वादे कला पुचः व ललितकला क्याम्पसया ब्वनामिपिन्सं पदमार्गय् भित्ते चित्रलेखन यानाच्वंगु खः ।

किपा- सुरेम देसारया फेसबुक पाखें साभार

पदमार्ग मरुगणेद्यः , काष्ठमण्डप, मरुहिति, सन्तानेश्वर महाद्यः, मरुबही, बञ्जाहिति, न्यत, लोकेश्वर गल्ली, भुरुङ्खेल, डल्लु चौतारा, भुइखेल जुया स्वयम्भू लागाय् तक वंगु खः ।

किपा- सुरेम देसारया फेसबुक पाखें साभार

सोमबारया यात्राय् सांसद जीवनराम श्रेष्ठं मध्यकालनिसेंया सम्पदां बिलिबिलि जुयाच्वंगु उगु लागायात सम्पदा मार्गया रूपय् विकास यानाः न्हूगु पर्यटकीय गन्तव्य स्थल धकाः म्हसिका बिया हलिंन्यंकेगु तातुना खः धकाः धयादिल ।

किपा- सुरेम देसारया फेसबुक पाखें साभार

येँ महानगरपालिका वडा नं १५, १८ व २० या वडाध्यक्ष क्रमशः ईश्वरमान डंगोल, न्हुछे डंगोल व राजेन्द्र मानन्धरं संस्कृति, परम्परा व सम्पदाया मर्मतया लिसें संरक्षण यायेगुलिइ थःपिनिगु सदां साथ दइगु बचं बियादिल । लुमंके बहः जु थ्वहे वैशाख ५ गते अन्तर्राष्ट्रिय सम्पदा दिवस तःजिक हनेत्यंगु दु ।

किपा- सुरेम देसारया फेसबुक पाखें साभार

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.