विश्वकप कासाय् न्हापां रुस व सउदी अरब लिसें चर्चाय् वःगु खँ

११३८ तछलाथ्व पारु

प्रजीत शाक्य 

विश्वकप फुटबल कासा स्वयेत पियाच्वंपिनिगु मनंतुना थनिनिसें पूवनेत्यंगु दु । मस्कोया लुजिन्की रंगशालालय् ग्वसाखलः रुसं उद्घाटन कासाय् सउदी अरबया सामना याइगु जूगु दु । उगु हे रंगशालाय् कासाया फाइनल कासा नं म्हितकिगु जुइ ।

किपाः गुगल पाखें

रुस व सउदी अरबविरुद्धया उद्घाटन कासां धाःसा विश्वया ध्यान सालेफइगु खनेमदु । छाय्धाःसां थुगु विश्वकपय् दकलय् क्वय्या ल्याखय् लाःपिं निगू टिमया दथुइ थ्व न्हापांगु कासा जुइत्यंगु खः । विश्वकपय् रुस दकलय् क्वय्या ल्याखय् लाःगु टिम खः । फिफाया ल्याखय् ७० गू थासय् लानाच्वंगु रुस ग्वसाखलःया नातां जक विश्वकप म्हितेत ताःलागु खः । सउदी नं फिफाया ल्याखय् ६७ गू ल्याखय् लानाच्वंगु दु ।

 

विश्वकप फुटबल कासाय् ग्वसाखलः रुसयात ड्रपाखें तःधंगु ग्याःचिकु दु । विश्वकप फुटबल कासाय् ग्वसाखलः हे दकलय् न्हापांगु चरणं पिहाँवःगु इतिहासय् आः तक छक्वः हे जक जूगु दु ।  सन् २०१० य् ग्वसाखलः दक्षिण अफ्रिका न्हापांगु चरणं हे पिनेलाःगु खः । रुस हाकनं व हे इतिहास दोहरे जुइधकाः ग्यानाच्वंगु दु । विश्वकप २०१८ या ड्र धाःसा रुसं मनंतुंगु कथं हे जूगु दु । थःगु पुचलय् ए टिमय् इजिप्ट व पूर्व विजेता उरुग्वे नं दु । रुसं थःगु हे छेँया मैदानय् समूह चरण पार याइगु अप्वः सम्भावना दु ।

किपाः गुगल पाखें

थुकिया नितिं रुसं दकलय् न्हापां सउदी अरबयात चिइके मालिगु जुइ । तर रुस धाःसा थःगु धारय् मदु । रुसं न्हापायागु न्हय्गु कासाय् त्याके फूगु मदुनी । सउदी अरब नं स्वंगू कासानिसें त्याइगु लँपुइ थ्यंगु मदु । तर नं १२ दँ लिपा न्हापांगु ख्यलय् विश्वकप म्हितेत्यंगु सउदी अरबयात धाःसा त्वफिके माःगु कथंया छुं चिं मदु । लिपांगु अभ्यास कासाय् विश्व विजेता जर्मनीविरुद्ध २–१ अंकं बूगु कासाय् बांलागु प्रदर्शनं एसियाली राष्ट्र सउदी अरब थःगु उच्च मनोबलय् रुसविरुद्ध म्हितेत्यंगु दु ।

स्यनामिपिं दथुइ ल्वापू

हुँवा एन्टोनियो पिजी व स्टानिस्लाभ चेर्चेसोभ फरक व्यक्तित्व व फरक रणनीति नालिपिं स्यनामिपिं खः । सउदी अरबया स्यनामि पिजीं सन् २०१६ य् चिलीयात  अमेरिकाया उपाधि कायेत सफल दयेका ब्यूगु खः ।  उगु कासाय् पिजीं विपक्षीयात लगातार आक्रमण यायेगु रणनीति दयेकूगु खः । तर वय्कःया व हे रणनीतिइ सउदी अरब संघर्षरत खनेदूगु दु । मू खँ विश्वकपय् चयन जुइ धुंकाः सउदी अरबयात उगु रणनीतिइ थःपिन्त अभ्यस्त यायेत हे थाकुगु दु ।

रुस टिमया जिम्मा कयाच्वनादिम्ह चेर्चेसोभ धाःसा रक्षात्मक कासाय् विश्वास याइम्ह स्यनामि खः । तर कासा मैदान पिने धाःसा वय्कःया व्यक्तित्व आक्रमक दु । थौंकन्हे थःगु टिमया बांमलागु म्हितिगु पहःयात कयाः ग्यानाच्वंम्ह रुसी समर्थकपिन्त छुं सन्देश धकाः सञ्चारमाध्यमं न्यंगु न्ह्यसलय् स्यनामि चेर्चेसोभं थः सकसितं भलसा बिया जुइम्ह मनोचिकित्सक मखु धइगु लिसः ब्यूगु खः ।

रुसी टिमय् घाःपाया समस्या

विश्वकप फुटबलया तयारीया झ्वलय् रुसयात कासामिपिन्त लाःगु घाःपालं तसकं हे दुख ब्यूगु खः । फरवार्ड अलेक्जयान्दर कोकोरिन व डिफेन्दरद्वय् जर्जी जिकिया व भिक्को भासि पुलिया घाःपालं आःतकं समस्याय् लानाच्वंगु दनि । गुकिं याना स्यनामि चेर्चेसोभं लिपांगु इलय् थःगु रणनीति हिइकेत बाध्य जुल । स्यनामि चेर्चेसोभं अष्ट्रियाविरुद्धया अभ्यास कासाय् थःपिनि प्यम्ह कासामि डिफेन्स तयेगु स्वभावयात हिला लिउने स्वम्ह व छम्ह विन्गर तया कासा म्हितकूगु खः । तर रुस १–० या अंकं बुत । अझ रुसं छक्वः हे विपक्षीया गोलपोस्टय् प्रहार याये मफया झन अप्वः चिन्तित जूगु दु ।

अनुभवी टिम

रुस व सउदी अरब निगूलिं टिमया कासामिपिनि औसत उमेर २९ दँ या दु । गुगु कासाय् सर्वाधिक औसतय् लानाच्वंगु दु । यद्यपि निगूलिं टिमया निम्ह कासामिं सच्छि स्वयां अप्वः अन्तराििष्ट्रय कासाय् म्हितृधुंकुपिं खः । रुसी टिमय् कप्तान व गोरक्षक इगो अकिनफिभलिसें १०५ अन्तर्राष्ट्रिय कासय् म्हितुगु अनुभव दु । ३८ दँ या प्रमुख डिफेन्डर सर्जी इगनासेभा नं राष्ट्रिय टिमया जर्सीइ १२१ कासा म्हितेधुंकूगु दु । सउदी अरबया लागि आसामा हसबीं १३५ व मिडफिल्डर तजर अल जसिमं १३२ क्याप त्याके धुंकूगु दु ।

डोपिंगया छायाँ

ओलम्पिक्सय् डोपिंग काण्डय् बांमलाक लाःगु दु रुस । गुकिं यानाः रुसं वंगु दँय् शीतकालीन ओलम्पिक्स म्हितेगु पाखें प्रतिबन्धित जुल । रुसया कासामिं ओलोम्पिक्सय् ध्वाँय् क्वसं प्रतिस्प्रर्धा यायेत बाध्य जुल । रुसयात विश्वकप फुटबलया ग्वसाखलः हे मयाइगुु सम्भावना तकं जुल । रुसया विश्वकपया न्हापांगु टिमय् लाःम्ह रुस्लान काम्बोलोभायात डोपिंगय् लाना फिफां अनुसन्धान यानाच्वंगु दनी । गुगुया खँ समाधान जुइधुंकूगु दुसां फिफां पाखें आधिकारिक रुपं पिने हःगु मदुनि ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.