विश्वकप कासाय् थौं तेहरो भिडन्त

११३८ तछलाथ्व चतुर्दशी

थौं नं लिग चरणया प्यंगू कासा जुइ । थौंया कासा लिग चरणया अन्तिम कासा कथं समूह ई या स्वीजरल्याण्ड व कोस्टारिका, सर्विया व ब्राजिल दथुइ ११ः४५ ताःइलय् जुइगु खःसा समूह एफ् या मेक्सिको व स्वीडेन, दक्षिणकोरिया व जर्मनी दथुइ ७ः४५ ताःइलय् जुइ ।

विश्वकप फुटबल उपाधिया रक्षा अभियानय् दुगु जर्मनी टिमय् थुगुसिइ पूर्णता मदु अथेसां थ्व टिमया विशेषता धइगु अन्त तकं हार मानय् मयायेगु खुबी दुगु टिम खः । गुगु गुणं हाकन छक्वः फुटबलया ख्यलय् राज याइ या मयाई धाये फुगु अवस्था मदु ।न्हापांगु कासाय् मेक्सिकोनाप १–० गोलं बुइ धुंकाः स्वीडेननापया कासाय् नं जर्मनी न्हापाला ल्यूने हे लाःगु खः ।

किपा गुगल

थुगु कासाय् जेरोमीं ह्याउँगु कार्डया दर्शन नं याःगु खः । स्वीडेनविरुद्धया कासाय् कासां लिहाँ वनेमालिगु स्थिति नं खनेदुगु खः । अथेसां जर्मनीया टिम एकता, बुत धैगु मनस्थितिइ मवयेगु व अन्तिम इलय् तकं हारेमचायेगु बानीं यानाः कासाया इन्जुरी टाइमय् क्रुजं याःगु गोलया सहायता हे नकआउट चरणया दावेदार कथं न्ह्यःने वःगु खः । आः सन् १९३८ धुंकाः डिफेन्डर च्याम्पियन टिम न्हापांगु चरणं विदा जुगु घटनायात लिसा मकायेकेगु खसां जर्मनीं बुधबाः दक्षिण कोरियायात म्होितं  नं निगू गोल अन्तरं बुकेमाः ।

किपा गुगल

जर्मनीया टिमय् छुं छुं कमजोरी खने दया वःगु दु । युलियन ड्राक्सलर व थोमस मुलरं थःगु उपस्थिति क्यने फयाच्वंगु मदु । जेरोमी बोयटेङ व एन्टोनिया रोडिगडर नं कासाया इलय् ख्यलय् हथायचाःगु खनेदु । अथेखसां स्वीडेनविरुद्धया कासाय् त्यागुलिं फिफा वरीयताया ५७ औँ थासय् दुम्ह दक्षिण कोरियालिसे उच्च मनोबल कथं म्हितिगु जुइ । विश्वकपय् जर्मनीं सन् १९९४ व २००२ लय् दक्षिण कोरियायात बुके धुंकुगु दु ।

टिम जर्मनी थौं असफल जुल धाःसा प्रशिक्षक योचिम लोउया तःधंगु आलोचना जुइफु । पुलांपिं कासामितयेत थःगु न्हापांगु छनौटय् तःसानिसें थुकियाबारे तःधंगु बहस जुयाच्वंगु दु । स्वीडेनविरुद्ध मेसुज ओजिल व सामी खडेरियाया थासय् मार्को रेयुस, जोनास हेक्टर, सेवेस्टियन रुडी व रुडिगर थेजापिं न्हूपिं कासामिपिन्त म्हितेगु ह्वःता ब्यूगुलिं टिम जर्मनी दुने फरक खनेदुगु दु । आः परिवर्तित जर्मनी सन्तुलित टिम खनेदुगु दु ।

लेरोई सानेया सट्टा टिमय् दुहांवम्ह २२ दँया बायर्न लिभरकुसेनया विन्गर युलिन ब्रान्ट नं प्रभावशाली खनेदुगु द । सुरुया निगू कासाय् स्थापन्न कासामिया रुपय् कासाय् दुहाँ वया थःगु चिं त्वतुगु दु । आः थौं जुइगु कासाय् दक्षिण कोरियाविरुद्ध ब्रान्टयात झिंछम्ह दुने लातधाःसा आश्चर्यचकित जुइमाःगु अवस्था मदु ।

दक्षिण कोरियाया नकआउटय् थ्यनिगु गणितीय सम्भावना दु व नं म्हो जक । कप्तान कि सुङ योङ घाइते जुगुलिं थ्व टिमया समस्या अझ तच्वःगु दु । सुङ योङ स्वान्सीया मिडफिल्डर व कोरियापाखें १०४ कासा म्हितेधुंकुम्ह छम्ह अनुभवी कासामि खः । बुधबाः जर्मनी बुत धाःसा व मेक्सिकों स्वीडेनयात बुकल धाःसा दक्षिण कोरिया नं नकआउट चरणय् थ्यनेफु ।

समूह एफ आः तक खुल्ला हे खः । निगु कासा त्याकाः न्हाप लानाच्वम्ह मेक्सिकोया नं नकआउटय् वनिगु पक्का मजुनी । जर्मनी व स्वीडेन ३–३ या ल्याः दु । थौं जर्मनी, स्वीडेन व मेक्सिको दथुइ सु नकआउटय् वनिगु धकाः तेहोरो भिडन्त जुइ ।

विश्वकप कासाया उपाधिया प्रमुख दावेदारया रुपय् कयातःम्ह ब्राजिलियाली टिमं सुरुया निगू कासाय् थःगु क्षमता अनुसार म्हिते मफुत ।
भाग्यवश बुधबार सर्वियाविरुद्ध म्हितुगु इलय् ब्राजिलयात न्ह्यःने वनेत बराबरी नं पर्याप्त जुइ । ब्राजिलं न्हापांगु कासाय् स्विट्जरयान्डलिसे १–१ गोलं बारबरीइ म्हितुगु खः ।

अनलिपा कोस्टारिकाविरुद्ध २–० गोलं त्याःगु कासाय् निगुलिं गोल इन्जुरी इलय् जक वःगु खः । अझ नेमार व फिलिप काउन्टिनहो म्हासुगु कार्डया कारवाहीइलय् लाःगुलिं थुपिं निम्हसिनं सर्वियाविरुद्ध सावधानीपूर्वक म्हितेमाःगु खनेदु । अथेहे तुं , टिमय् चोटया समस्या नं दु । कोस्टारिकाविरुद्धया कासाय् डग्लस कोस्टा घाइते जुगु दु । डानिलो नं दुरुस्त जुइधुंकुगु मदुनि । उकिं विलियनं सर्वियाविरुद्ध शुरुइ हे म्हितिगु लक्षण दु । पाउलिन्हो नं मिडफिल्डय् बिचाः याःकथं प्रभावकारी जुइक म्हितेफुगु मदुनि ।

ब्राजिलया नितिं काउटनोलिसे जूगु गोलया लय धाःसा प्लस प्वााइन्ट कथं मानेयायेमाः । विश्वकपय् ब्राजिलं याःगु स्वंगू मध्येय् निगू गोल काउन्टिनाया नामय् दु । वं न्हापाया १० गू कासाय् ९गू गोल याःगु दु । उगु अवधिइ नेमारया खाताय् ५ गू गोल जक दुगु खः ।

सर्वियाया टिम बांलागु व बल्लागु टिम खः । तर स्विट्जरल्यान्डलिसे २–१ गोलं बुइधुंकाः ब्राजिलविरुद्ध म्हितुगु इलय् सर्विया दबाबय् लायेफु । सर्वियां न्हापांगु कासाय् कोस्टारिकायात १–० गोलं बुकुगु खः ।

समूह इलय् कोस्टारिकालिसेंया लिपांगु कासाय् म्हितुगु इलय् स्विट्जरल्यानड जित सहित नकआउट चरणय् थ्यनिम्ह दावेदार टिमया रुपय् म्हितिगु जुइ । वंगु प्यंगु विश्वकपय् स्वक्वःगु खुसिइ समूह चरण पार यायेगु दाउलय् दु स्विट्जरल्यान्ड ।

स्विट्जरल्यान्डया नितिं बारबरी जक जुसां वं न्ह्याःवनेत बांलागु ह्वता जुइ । कोस्टारिका सुरुया निगू कासाय् बुइधुंकाः कासापाखें विदा जुइधुंकुगु दु । स्विट्जरल्यान्डया चिन्ताया विषय धइगु वया स्वम्ह कासामि ग्रानिट जाका, जरर्डा सकिरी व कप्तान स्टेफन लिख्सटाइनरयात आः फिफां अनुसन्धान यानाच्वंगु खः । थुपिं स्वम्हेसित सर्वियाविरुद्धया कासाय् राजनीतिपाखें अप्रिप्रेरित विभिन्न हाउभाउ याःगु आरोप दु ।

जाका व सकिरी निम्हसियां कोसोभोनाप स्वानाच्वंगु अल्बानियालिसें स्वापू दु । सोभियतलिसेंया पूर्व राज्य सन् २००८ य् स्वतन्त्र जूगु खः । तर सर्वियां उकियात मान्यता ब्यूगु मदुनि ।

फिफाया अनुशासन कमिटीं थुपिं स्वम्ह कासामियात निगू कासाया नितिं प्रतिबन्धित याये फू । सर्वियाविरुद्धया कासाय् जाका व सकिरीं गोल याःगु खः । अनलिपा निम्हसिनं निगः छ्यं इमाया हाउभाउसहित लय्ताःगु खः । गुगु अल्बानियाया राष्ट्रिय प्रतीक खः ।

प्यदँ न्ह्यः सनसनीपूर्ण कासाया प्रतिभा क्यनाः क्वाटरफाइनलय् थ्यंम्ह कोस्टारिकां थ्वपालय् स्विट्जरल्यान्डलिसे प्रतिष्ठाया नितिं म्हितिगु जुइ ।

किपा गुगल
किपा गुगल

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.