विमान दुर्घटनाय् सीपिं ४९ थ्यन

११३८ चिल्लागा दशमी/येँ

थौं येँस्थित अन्तर्राष्ट्रिय विमानस्थलय् जूगु यूएस बंगला एयरलाइन्सया विमान दुर्घटनाय् मुक्कं २२ नेपालीलिसें ४९ सीगु दु ।

सीपिंलय् २२ नेपाली, २२ बंगलादेशी नागरिक व छम्ह चिनियाँ नागरिक लाःगु दु । चालक दलया प्यम्ह दुजः नं दुर्घटनाय् सीगु दु ।

दुर्घटनाय् नेपाली नागरिक शिला बजगाईं, अल्जिना बराल, चारु बराल, सोबिन्द्रसिंह बोहरा, प्रवीण चित्रकार, सजना देवकोटा, ज्ञानीकुमारी गुरुङ, श्रेया झा, पूर्णिमा लोहनी, मिली महर्जन, निगा महर्जन, सञ्जय महर्जन, प्रसन्न पाण्डे, हरिशङ्कर पौडेल, सञ्जय पौडेल, कृष्णकुमार सहनी, आश्ना शाक्य, एञ्जिला श्रेष्ठ, सरुना श्रेष्ठ, डा बालकृष्ण थापा, श्वेता थापा व अवधेशकुमार यादव मदुगु खः ।

दुघर्टनाय् २२ घाःपाः मध्ये छुंया अवस्था गम्भीर धाःगु दु । घाःपाः मध्ये ११ नेपाली दु । ९ वंगलादेशी, छम्ह माल्दिभ्सया नागरिक दुसा छम्हेसिया राष्ट्रियता सीमदुनि ।

घाःपाः जूपिं नेपाली नागरिक मध्ये केशव पाण्डेयात वासः यायेत मेडिसिटी अस्पताल नख्खुइ यंकूगु दुसा दिनेश हुमागाईँयात न्यूरो अस्पताल बाँसबारीइ, ग्रान्डी अस्पताल तोखाय् दयाराम ताम्राकार, किशोर त्रिपाठी, हरिप्रसाद सुवेदी, विनोद पौडेलयात वासः यानाच्वंगु दु ।
अथे हे नर्भिक अस्पताल थापाथलीइ वसन्त बोहरा, आशिष रञ्जित, सनम शाक्ययात वासः यानाच्वंगु दु । व हे कथं, केएमसी सिनामंगलय् प्रिन्सी धामी, सबिना व्यञ्जनकारयात वासः यानाच्वंगु दु ।

बंगलादेशया राजधानी ढाकां येँय् वःगु विमान अवतरणया झ्वलय् दुर्घटना जूगु खः । दुर्घटना जूगु ७६ सीट क्षमताया विमानय् २८ मिसा व २ मचातलिसें ६७ यात्रुत गयावःगु दुगु खः । उकी ३३ नेपाली दुगु खः ।

विमानय् मालदिभ्स व चीनया नं छम्ह छम्ह गयावःगु दुगु खः । मेपिं बंगलादेशी नागरिक दुगु खः । चालक दलया ४ दुजः दुगु खः ।

दुर्घटना धुंकाः प्रधानमन्त्री केपी शर्मा ओलीलिसें मन्त्रीपिं दुर्घटनास्थल वनाः उद्धार व घटनाबारे न्यनेकने याःगु खः । प्रधानमन्त्रीलिसें गृहमन्त्री रामबहादुर थापा बादल, रक्षामन्त्री ईश्वर पोखरेल, उद्योगमन्त्री मातृकाप्रसाद यादव नं घटनास्थल थ्यंगु खः ।

थौं हे मन्त्रिपरिषद् बैठक च्वनाः घटनाबारे छानविन यायेत पूर्वसचिवया नेतृत्वय् जाँचबुँच आयोग गठन नं याःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.