fbpx

वाङमय शताब्दी पुरुष सत्यमोहन जोशी १०० दँ क्यनीगु – दच्छियंक थी थी ज्याझ्वः जुइगु

रेखा शाक्य / झीगु सम्वादादाता

ने सं ११३९ चाैलागाः दशमी

वाङमय शताब्दी पुरुष सत्यमोहन जोशीं थ्वहे वइगु बैशाख ३० गते १०० दँया बुन्हि हने  तयेत्यंगु दु । थुगु हे अवसरय् यल महानगरपालिकां दच्छियंकं थी थी ज्याझ्वः यानाः जन्मशताब्दी हनेत्यंनागु खँ थौं जुगु पत्रकार सम्मेलनय् जानकारी ब्यूगु खः ।

यलया छम्ह सामान्य कुलय् जन्म जुयाः नं नेपाःया म्हसिका च्वन्ह्याकेत राष्ट्रया भाषा, कला, साहित्य व संस्र्कतिया लिसें मूर्त अमूर्त सम्पदायाज्ञाता जुयाः नेपाः देय्या न्हाय् हलिंन्यंक धस्वाकेत अनवरत रुपं यानाच्वनादिगु वय्कःया ज्वः मदुगु योगदानयात कदर यासें थःपिन्सं थुकथंया दच्छियंकया ज्याझ्वःया ग्वसाः ग्वःसें नश्वर शरीर मदये धुंकाः गुणगान यायेगुया परम्परायात त्वाः थलेत, म्वाःसु दनीबलय् हे हनेगु परम्पराया शुरुवात यायेकथं महानगरपालिकां थुकथंया ग्वसाः ग्वयागु खँ थौंया मू पाहाँ यल महानगरपालिकाया मेयर भाजु चिरीबाबु महर्जनजुं धयादिल ।

किपा रेखा शाक्य

थुगु ज्याझ्वःया नितिं मेयर महर्जनया संयोजकत्वय् १११ सदस्यीय समिति गठन याःगु दु । उगु समितिइ राष्ट्रियसभाया सांसदपिं, प्रतिनिधिसभाया सांसदपिं, प्रदेशसभाया सांसदपिं, येँ महानगरपालिकाया मयेरया लिसें जःखः नगरपालिकाया मेयरपिन्त नं दुथ्याकागु खँ न्ह्यथना दिल ।

वाङमय शताब्दी पुरुष सत्यमोहन जोशी जन्मशताब्दी महोत्सव ज्याझ्वःया व्यवस्थापन मूल समितिया माघ २५ गते च्वंगु बैठकं ज्या ताःलाकेत यल महानगरपालिका वडा नं ३ या वडा नायः श्रीगोपाल महर्जनया संयोजकत्वय् जन्मशताब्दी महोत्सवया कार्यसम्पादन समिति तकं नीस्वंगु दु ।

जोशीया जन्मदिं कुन्हु यल मंगलबजारं लगंख्यः, जाह्वलाख्यः जुयाः पुच्वःया महानगरया प्रांगणय् महामहिम राष्ट्रपतिया मू पाहांसुइ विशेष ज्याझ्वः जुइगु धाःगु दु । लिसें उगु हे न्हि कुन्हु ही दान ज्याझ्वः, सनिलय् मतः च्याकेगुया लिसें यल महानगरपालिकाया दक्वं वडाय् दुपिं १०० दँ क्यंपिं जेष्ठ नागरिकयात सम्मान यायेगु व स्थानीय सरकारया अधिकारयात छ्यला बैशाख ३० गते दक्वं यलया ज्याकुथिइ सार्वजनिक बिदा यायेगु तकं ग्वसाः ग्वःगु दु ।

अथेहे दच्छियंकया ज्याझ्वः धलः कथं नेपाः भारतया परापूर्व कालंनिसेंया दौत्य सम्बन्ध दूगु अशोक सम्राटया म्ह्याय चारुमतिया ब्याली क्यनेगु , सेतो चैत्य नांया सफू अंगेजीभाषं व चारुमति सफू नेपाली भाषं प्रकाशित यायेगु, ब्वनेकुथिइ जोशीया जीवनी दुथ्याकेत पहल यायेगु, वेभसाइटय् वय्कःनाप स्वापू दुगु सकतां जानकारी दुतिनेगु, थी थी पत्रपत्रिकाय् जन्म महोत्सवया झ्वलय् लेख, रचनाया लिसें जूगु ज्याझ्वःया सामग्री प्रकाशित यायेत आह्वान यायेगु, नेपाःया स्थानीय तहयात जोशीया जन्मोत्सवया लसताय् थी थी ज्याझ्वःयायेत इनाप यायेगु, जोशीया किपाः दूगु ब्यानर सगरमाथाया च्वकाय् ब्वयेकिगु, हुलाक टिकट प्रकाशन यायेगु, नेपाः सरकारनापं समन्वय यानाः जोशीया किपाः सहितया वहःया २,५०० या १००० थान, १,००० या २,००० थान, १०० या ५,००० थान मुद्रा निष्कासन यायेत प्रकृयाय् वनेगु, जोशीयात सिलु दर्शन याकेगु, न्हियान्हिथंया ज्याखँयात कयाः अडियो व भिडियो दयेकेगु, भण्डाक्यबः वय्कःया ल्हातं सिलान्यास याकेगु, जोशीया झ्वाताः यलमहानगरया लागा दुने पार्क दयेकाः वय्कःया नामं नामाकरण यायेगु, वाङमयया लागाय् च्वछाय्बहःगु योगदान यानादिपिन्त सत्यमोहन सम्मान पदक बिइगु, जोशीजुं अरनिकोया बारे च्वयादिगु कृति व लेखयात संरक्षण यायेगु व नेपाल आर्ट ग्यालरी न्ह्यब्वयेगु, जगमरु पुखुलिइ (पिम्बहाः पुखू) मल्लकालीन संगीत सांस्कृतिक सनिल यायेगु, जोशी प्रतिष्ठान एवं अध्ययन केन्द्र स्थापना याये मनदुपिंनाप सहलह ब्याकेगु, यल महानगरपालिकाया स्मारिका अन्तर्गत वाङमय पुरुषया स्मारिका सफू प्रकाशन यायेगु, वय्कःया अनेक लागाया योगदानयात कयाः विवेचना यायेगु व वय्कःया तिरीया समेत जीवन भोगाइ, अनुभव व वैवाहिक जीवनया बारे अनुभवया अडियो भिडियो मुनेगु आदि इत्यादि यानाः मुक्कं २० गु बुंदाया धलः पत्रकार सम्मेलनय् वइगु बैशाख ३० गतेनिसें २०७७ या बैशाख ३० तकया ज्याझ्वः कथं सार्वजनिक याःगु खः ।

किपा रेखा शाक्य

थौंया पत्रकार सम्मेलनय् उपमेयर गीता सत्यालया नं उपस्थिति दुगु खः । पत्रकारपिन्सं न्यंगु न्ह्यसःया लिसः मेयर, उपमेयर व ज्याझ्वःया संयोजक श्रीगोपालजुं बियादिगु खः ।

Leave a Reply

Your email address will not be published. Required fields are marked *