ल्वँहहिति मू हालेवं मन्द फल्चा म्वाइला थें हला ?

११३८ बछलागा  दशमी/येँ

रेखा शाक्य

येँ महानगरपालिका १६ वडाय् लाःगु पुलांगु नांजाःगु कपर्दार भोटु पांडें दयेका थकूगु धकाः धयावयाच्वंगु पकनाज्वःया दुवातय् च्वंगु मन्द फल्चा (सोह्रखुट्टे पाटी) उगु इलय् थःगु छगू म्वासू ब्वया च्वंगु खः । वंगु २०७१ साल माघ फागुणपाखे थुनेगु ज्या जूगु खः । उबले नं सामाजिक सञ्जालय् थुकिया किपाः ब्वया । अापालं मनूतय्सं थःथःगु नुगः खँया लिसें थुकिया महत्वयात कयाः नुगः खँ प्वंकल । तर अफसाेच आपालं जागरुक संस्था व स्थानीयवासीपिनिगु विरोधया बावजुद थुनाः उकीया नामोनिशान तकं मदयेका ब्यूगु खः ।

किपा-रेखा शाक्य

सतक विस्तारया झ्वलय् उपत्यका विकास प्राधिकरणं नयाँ बजाःया पाःचाय् सिथय् लाःगु ऐतिहासिक मन्द फल्चां (सोह्रखुट्टे पाटी) यानाः गाडी जाम जूगु त्वहः तयाः विकासया नामय् विनाश यासें नेपाःया सम्पदा व धरोहरयात मदयेकेगु कुतः जुल । उगु इलय् चां चां हे उपत्यका प्राधिकरणं थथे मन्द फल्चा (सोह्रखुट्टे पाटी) न्हंकाः, चीकाः लँ तब्या याःगु खः । स्थानीय बासिन्दापिन्सं विरोध नं यानाः वयाच्वंगु खः ।

आः वया हाकनं छकः व हे मन्द फल्चाया खँ सामाजिक सञ्जालय् थाय् कयाच्वंगु दु । सरोकारयालिसें स्थानीय जनचेतना दुपिं व सम्पदाप्रेमीपि‌ं हाकनं छक्वः जुरुजारुं दनेगु कुतः जूगु दु ।

यादवलाल कायस्थया फेसबुक पाखें

खतुं स्वनिगलय् जक मखु वया जःखःया आपालं थासय् च्वंगु संस्कृति व परम्परायात म्वाका च्वंगु सम्पदा व धरोहरयात चिइकेगु ज्‍या जुयाच्वंगु जगजाहेर खँ खः । अथे खःयानं झी सदां हालेगु जक हे जुयाच्वन । थज्यागु सम्पदा नष्ट यायेगुलि राज्यापाखें हे एैतिहासिक धरोहर सिमा, पाटी पौवा, व  देगः थुनाच्वंगु दु तर झीसँ उकियात बचे यायेफयाच्वंगु मदु । गुबले गुबले झीसँ थुकियात बचेयायेमाः धाल झीत विकास विरोधी धकाः थःगु न्हाय् ध्यनाः सर्ग स्वये न्ह्यापिन्स झीत विरोधी धकाः संज्ञा बिइगु यानाच्वन ।

इलं हानं छक्वः मन्द फल्चायात कया सः थ्वयेकेत संकेत विउगु दु । आः झी संस्कृति प्रेमी सम्पदा प्रेमीयालिसें जनप्रतिनिधिया भूमिका गथे जुइमाल । उबले याये मफूगु खँय् झीसँ आः गथे यानाः सः थ्वयेके माल धइगु खँय् बिचाः यायेगु र्इ वःगु दु ।

थौंकन्हे थ्वयाच्वंगु सः कथं उगु मन्द फल्चा अन हे लागाय् दूगु ल्वहँहिति दूगु थासय् उकियात न्हंकाः दयेकेत्यंगुलिं स्थानीयबासीलिसें संस्कृति सम्पदाह्यःमिपिन्सं विरोध यानाच्वंगु खः । थुकिया नितिं सिर्जु प्रधानया लिसें सम्पदाप्रेमीपिं वडाय् वनाः पुलांगु रिकर्डया किपाः स्वयेगुया लिसें अनया जानकारी मुना हःगु खः ।

यादवलाल कायस्थया फेसबुक पाखें

वंगु बुधवाः १६ वडाया ज्याकुथिइ वनाः वडा ज्याकुथिइ मन्द फल्चा (सोह्रखुट्टे पाटी) निर्माण यायेगु झ्वलय् नेवाःतय्गु इतिहास दूगु ल्वहँहिति न्हंकाः मन्द फल्चा (सोह्रखुट्टे पाटी) दयेके दइमखु धकाः विरोध याःगु खः ।

१६ वडाया वडाध्यक्ष मुकुन्द रिजालं थथे विरोध याःवःपिं स्थानीय बासिन्दापिन्त मन्द फल्चा सोह्रखुट्टे पाटी उगु हे थासय् दयेकेगु धकाः अडान काःगु खःसा वडा ज्याकुथिइ विरोध याःवःपिन्सं थ्व खँयात कयाः तच्वकं प्रतिवाद यायेवं लिपा वडाध्यक्ष रिजालं सहलह ब्याकाः ज्या यायेगु बचं बियादीगु खः ।

संस्कृति, सम्पदाया संरक्षण अभियन्ताकर्ता यादवलाल कायस्थं मन्द फल्चा (सोह्रखुट्टे पाटी) न्हापा गुगु थासय् खः, उगु हे थासय् दयेकेमाःगु अडान कयाच्य्वंगु दुसा वडा ज्याकुथिं मन्द फल्चा (सोह्रखुट्टे पाटी) न्हापा गन दूगु खः, अन मदयेकुसे नयाँबजारं पकनाज्वः वनेगु लँपु प्रहरी प्रभाग सोह्रखुट्टे ज्याकू नापं लाःगु ल्वहँहिति दुथाय् दयेकेगु धयाच्वंगु दु । उकिं सम्पदा संरक्षण अभियानय् न्ह्यानाच्वंपिं पासापिन्सं व स्थानीयं विरोध यानाच्वंगु दु ।

स्थानीय तहया चुनावलिपा १६ वडाय् जननिर्वाचित प्रतिनिधिपिं वयेधुंकाः मन्द फचा (सोह्रखुट्टे पाटी) दयेकेगु नितिं आवश्यक बजेटया लिसें योजना ला न्ह्यःने हल, तर न्हापा गुगु थासय् दूगु खः उगु थासय् मदयेकूगुलिं थथे विरोध जूगु खः ।

थ्वहे विषययात कयाः बुधवाः स्थानीय बासिन्दालिसें संस्कृति सम्पदाह्यःमिपिं वडा ज्याकुथि वनाः विरोध याःगु खः । थ्वयांलिपा येँ महानगरपालिका सम्पदा विभागय् वनाः थुगु योजना तत्काल दिकेत उजुरी तःगु नं दु ।

यादवलाल कायस्थया फेसबुक पाखें

तर दुखःया खँ म्हिगः सकसियां नापं सहलह यानाः ज्या न्ह्याकेगु खः धकाः धाम्ह वडा अध्यक्ष मुकुण्ड रिजालं चां चां हे डोजर हयाः उगु एेतिहासिक व पुरातात्विक महत्वं जाःगु कलात्मक ल्वँहहितिया अस्तित्वयात न्हंकाः ज्या न्ह्याकूगु दु ।

थुगु विषययात कयाः महानगरपालिकाया मेयर विद्यासुन्दर शाक्यया ध्यानाकर्षण यायेत थौं न्हिनसिया १ बजे वय्कःया कार्यकक्ष नापलाना जानकारी बिउवनेगु ग्वसाः ग्वःगु दु । नापं सकसितं अन झायेत इनाप नं याःगु दु ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.