लुभूया जात्रा क्वचाल

११३८ बछलाथ्व एकादशी/लूभु

याेगेश श्रेष्ठ, लूभु

स्वनिगःया विभिन्न नेवाः जातिया पुलांगु बस्तीत मध्यय् छगू पुलांगु बस्ती लुभू नं खः । थ्व बस्ती गबलय् शुरु जुल धका, सुना नं आः तक दसी बियाः धाये मफुसां, थ्व बस्ती तच्वकं पुलांगु खः धैगु सिइदु । लुभू देय ८५० २४” देशान्तर व २७० ३९” येत्ता (उत्तर) अक्षांशय लाः ।

ने.सं. ७०६ या ताम्रपत्रय् नं येँ याम्ह जुजु शिवसिंह मल्लया कान्छाम्ह काय् हरिहर सिंह मल्ल यलय् राज प्रतिनिधि जुयाः राजकाज चलय् याःबलय् थःगु सन्तानयात रक्षा यायम्ह धकाः लुभूग्राम दयेकाः पशुपति महाद्यःयात  ताम्रपत्र छायातःगु धकाः देवमाला वंशावली च्वया तःगु दु ।

लुभू देशय् वैशाख बछलाथ्व् अक्षय तृतीया कुन्हुनिसें एकादशी तक श्रीमहालक्ष्मी, श्री महाभैरव व आकाशभैरवया जात्रा नखः हरिहरसिंहमल्लं चलय याःगु ख ।

किपाः याेगेश श्रेष्ठ

अक्षय तृतीया दिंल्या या छन्हु न्ह्यः सकल लूभुवासीपिनि छ्वय्लाभु न्यायकि । बहनीसिया इलय् श्री महालक्ष्मी–महाभैरब देगया द्योछें दुपीं सकल मूर्तितयत तिसाः ज्वलं तिका झःझः धायकिगु याइ ।

अक्षया तृतीया कुन्हु मूःलाछि (भगवती लाछि) सफा याना तइ तःगु छज्वः खतय् मू थकाली व गुथिपालत मिलेजुया भन्सालीया आज्ञा कथं “गंगामहारानीयो हुकुम” धया सिँहासनय तयातःपिं मूर्तित थकालीपिन्सं लिकायका पाःपाः यानाः पित हयाः न्हापागू खतय् गणेश, महालक्ष्मी, कुमार व मेगु खतय् गणेश, महाभैरव, कुमारी द्यःया मूर्तित विराजयमान यायेगु ज्या पुवंकि ।

किपाः याेगेश श्रेष्ठ

व दिंल्या कुन्हु लाछि जखः स्थानीयपिन्सं पूजा यायेगु ज्या याइ, कन्हय कुन्हु द्यःखः ल्ह्वनाः धसी ट्वालय खः थ्यंकी । ट्वालय जखःया बासिन्दापिन्सं नं  पुजा यायेगु ज्या न्ह्याकी  । अथेहे बहनीसिया इलय् द्यःपिन्त थःछें यंकेगु कथं वन्ता (पूर्व) देख्यलय् दुगु महालक्ष्मी–महाभैरव देगले मूर्ति प्रतिस्थापन याना पूजा याइ ।

किपाः याेगेश श्रेष्ठ

पुजा सीधय धुंका मूर्तियात खतय् तयाः क्वय् सतलय् (गोभ्राटेश्वर महाद्यः देग) हया याः न्याकेगु याइ । थन लिपाः भोद्यो (आकाश भैरवः) या खः नं अन हे हइ ।

किपाः याेगेश श्रेष्ठ

स्वन्हुया दिंल्या कुन्हु द्यःखःयात दक्षिण स्वकाः च्वये धोखासीइ (हाल बसपार्क) तयेगु याइ, अन लिपा चाःहिका त्वालय् दुत हइसा प्यन्हु कुन्हु नासः (उमा महेश्वर द्यो) ट्वालय थ्यनी । न्यान्हु कुन्हु तगः टुँ थ्यंका याः न्यायेकि । खुन्हुया दिंल्या कुन्हु क्वय्लाछिः थ्यनी नापं सुथय् याः न्याकेगु याइ ।

किपाः याेगेश श्रेष्ठ

सनीलया इलय् सरकारी पुजा काःसें जात्रा झःझः धायेक न्ह्याकी । न्ह्ययन्हु दुकुन्हु क्वय् धोखासी ट्वालय द्यःखः थ्यनी । च्यान्हु कुन्हु मूःलाछि (भगवती लाछि) थ्यनकि सकल लुभू ट्वावासी पिनिगु पूजा क्वचाइ ।

किपाः याेगेश श्रेष्ठ

अन लिपाः द्यःखःयात मूःलाछि च्वंगु भगवती देगया ल्युने तयाः गङ्गा महारानीया  कोत छें पाखें  जुइगु पुजा सिधलक कि भोद्यो (आकाश भैरव) याइत च्वय धोखासी वाय यंकिइ । अन लिपाः खःयात महालक्ष्मी–महाभैरव मूःदेगया जवः कूंलय तया स्वां क्वकाये मज्यूगु पुजा न्ह्याकिइ ।

किपाः याेगेश श्रेष्ठ

कन्हे कुन्हु खःयात देश चाःहिका मूः देगया मूःलुखाया न्ह्यःने दिका मूःथकाली नकिं पाखें नेवाः तजिलजि व संस्कार कथं म्ह्याय् वा भौ दुकायगु रीत कथं थकालिपिन्सं पालांपा द्यःया मूर्ति लिकया न्हापायागु थाय् हे  पलिस्था याइ । जात्राया इलय् बाजागाजायालिसें स्थानीयवासीया लिसें जात्राप्रेमीपिनि नं उलि हे सहभागिता दइ ।  अले थ्व दँया जात्रा विधिवत रुपं  क्वचागु जुइ  ।

किपाः याेगेश श्रेष्ठ
किपाः याेगेश श्रेष्ठ

 

2 thoughts on “लुभूया जात्रा क्वचाल

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.