fbpx

लुभुइ महालक्ष्मी – महाभैरव जात्रा क्वचाल (१२ पाः किपाः सहित)

रेखा शाक्य । झीगु सम्वाददाता

वैशाख शुक्ल अक्षय तृतीयानिसें एकादशी तक महालक्ष्मी व महाभैरवया जात्रा लुभुइ जूगु खः । अक्षय तृतीया कुन्हुया दिंयात लुभूवासीपिन्सं मू जात्रा कथं हनेगु याइ ।

किपा रेखा शाक्य

छगू खतय् गणेश, महालक्ष्मी व कुमार दइसा मेगु खतय् गणेश, महाभैरव  व कुमारीया मूर्ति प्रतिस्थापन याना तइ । थुगु हे जात्राया झ्वलय् आकाशभैरवयात नं खतय् तयाः जात्रा याःगु खः । धिमे, धाः व न्यासी बाजाया तालय् जात्रा झः झः धाःगु खः ।

किपा रेखा शाक्य
किपा रेखा शाक्य

बछलाथ्व दितीया कुन्हु सकल लूभुवासीपिनि छ्वय्लाभु यासें श्री महालक्ष्मी–महाभैरवया जात्रा विधिवत रुपं शुरु जूगु खः । अक्षय तृतीया कुन्हु मूःलाछिइ मू थकाली व गुथिपालत मिलेजुया भन्सालीया आज्ञा कथं “गंगामहारानीयो हुकुम” धयाः निगू खतय् प्रतिस्थापन यानातःपिं सकलें द्यःपिन्त लाछि जखः स्थानीयपिन्सं पुजा याःगु खः । “गंगामहारानीयो हुकुम” मकायेकं छुं हे पुजाः शुरु मजुइगु स्थानीयया धापू दु ।

किपा रेखा शाक्य

तन्हु तक जुइगु लुभुया जात्रा जुइगु लँपु धइगु थी थी त्वालय्या नापं लुभु देय्या सापारुं चाहिलिगु लँपुइ हे द्यः खःयात चाहिके माःगु परम्परा खः । जात्राया लिपांगु न्हि कुन्हु खःयात देश चाःहिका मूः  देगः अर्थात महालक्ष्मी देगःया मूःलुखाया न्ह्यःने दिकाः मूःथकाली नकिं पाखें नेवाः तजिलजि व संस्कार कथं म्ह्याय् वा भौ दुकायगु रीत कथं थकालिपिन्सं पालांपा द्यःया मूर्ति खतं लिकाःगु खः । अन्तय् सकल द्यःया प्रतिमूर्तियात वसपोल पिनिगु आसनय् हे विराजमान याका बिज्यासें  थ्व दँया जात्रा विधिवत रुपं क्वचायेकूगु खः  ।

किपा रेखा शाक्य

यलय् बुंगद्यःया रथयात्रा सालिगु छन्हू न्ह्यः न्ह्याइगु लुभुया जात्रा यलया थतित्वालय् नैंक्यालं लुइगु दिं क्वचाल कि लुभुया नं जात्रा विधिवत क्वचाइगु खः । यलया बुंगद्यःया रथया न्ह्यःनेया जवःगु घःचाःया प्रतिक कथं कया तःम्ह भैरव हे लुभुयाम्ह रण्डकुण्ड भैरव खः धइगु जनविश्वास दु ।

किपा रेखा शाक्य

लुभुया स्थानीयवासी योगेश श्रेष्ठं थ्व पंक्तिकारयात कनादिगु किंवदन्ती कथं न्हापा न्हापा मनकामना मांयात नापलाय्त चान्हय् बुङ्ग वंम्ह भैरव लिहांवयेगु इलय् सुथ जूगुलिं सकसिनं म्हसिका काइ धकाः बुङ्गय् हे च्वना बिज्यागु जुयाच्वन । थ्व सकतां खँ सिइकाः लुभुवासीपिं भैरवयात लिहां बिज्याके धकाः वंगु बखतय् बुङ्गद्यवं आः भैरव लिहां बिज्याइ मखु बरु जिगु जात्राया इलय् हे लुभुइ नं भैरवया खः जात्रा याः धकाः आज्ञा बिया बिज्यागु जुयाच्वन ।

व हे किंवदन्तीकथं सुरु जूगु लुभू जात्रा थौं तक नं दँय्दसं बुंग द्यःया लिसें हे लुभुइ महालक्ष्मी व महाभैरवया जात्रा व हे दिं कुन्हु निसें न्ह्याना च्वंगु दु ।

किपा रेखा शाक्य

थुगु जात्राया बारे थी थी विश्वास व अनुमान कथ‌ं देवमाला वंशावली महालक्ष्मी महाभैरव मन्दिरया स्थापनायात कयाः उल्लेख याना तःगु दु । यलया जुजु हरिहरसिंह देवं थः सन्ततियात सुःख प्राप्त जुइमाः धकाः पीठ हे थापना यानाः महालक्ष्मी महाभैरवया न‌ं थापना यानाः बछलाथ्वः तृतीयानिसें दशमी तक ८ न्हु जात्रा न्ह्याकुगु खँ देवमाला वंशावली नं उल्लेखित दुसा नेपाल संवत् ७०६ वा ७०७ निसे‌ं जात्रा न्ह्याःगु धकाः न‌ं धाः । वंशावली ८ न्हु तक जक धकाः उल्लेखित जुया च्वंसां वर्तमान अवस्थाय् जात्रा एकादशी तक हे खःयात देय् चाहुइकाः न्ह्याना च्वंगु दु ।

किपा रेखा शाक्य

किपा रेखा शाक्य
किपा रेखा शाक्य

Leave a Reply

Your email address will not be published. Required fields are marked *