लहना वाः पौ न्यादँ बुदिं क्यंगु लसताय् खुम्ह व्यक्तित्वयात सम्मान यात

११३८ बछलाथ्व तृतीया/येँ

झीगु संवाददाता

नेपालभाषाया “लहना वाःपौ” न्यादँ क्यंगु लसताय् म्हिगः छगू ज्याझ्वः यानाः थी थी ख्यःया खुम्ह व्यक्तित्वयात हंगु दु  ।

किपा-शरण ज्यापू हरि

उगु हे ज्याझ्वलय् लहना सुर–सम्मान सिरपाः–कलाकार आर्यन नकःमियात, लहना धर्ममोती सिरपाः नेपाल टेलिभिजनया पत्रकार शोभा श्रेष्ठयात, लहना पञ्चवीर सिरपाः नेवाः न्ह्यलुवाः डा. महेश मान श्रेष्ठयात, लहना मोहिनी सिरपाः मेट्रो एफएमया पत्रकार उदेन न्हूसायमियात, लहना न्यू जेनिथ पत्रकार सिरपाः कान्तिपुर न्हिपौया पत्रकार प्रशान्त मालीयात, लहना केशव कृष्ण वदन मातृभाष सिरपाः रेडियो नेपालया पत्रकार रचना श्रेष्ठ यात व्यवस्थापक पुचः जुजुमान महर्जन नृपेन्द्रलाल श्रेष्ठ सुरेन्द्र भक्त श्रेष्ठया लिसें मू पाहाँपाखें सम्मानपत्रया लिसें नगद नं  लःल्हाःगु खः ।  उगु हे ज्याझ्वलय् प्रहरी महानिरिक्षक सर्वेन्द्र खनाल , डब्लु एन ओ या नायः सिजन श्रेष्ठ, संस्थापक नायः बाल गोपाल श्रेष्ठ, न्वकू दया रत्न शाक्य, व धुँ देय् प्रडक्सनया पुचःयात नं सम्मान याःगु खः ।

किपा-शरण ज्यापू हरि

मूपाहाँ शताब्दी पुरुष सत्यमोहन जोशीं  नेपालभाषा ख्यःया नितिं जीवन पानावंपिं हस्तीपिन्त लुमंकुसे वय्कःपिं थुगु ज्याझ्वःलय् दुथ्याःगु खःसा अतिकं लय्ताइगु खँ कनादिल । अथेहे ज्याझ्वलय् सम्मानित जुयादीपिन्सं नं थःथःगु नुगः खँ तयेगु झ्वलय् लहना वाः पाैया पुचःयात भिंतुना नं बियादीगु खः ।

म्हिग जुगु ज्याझ्वलय् जगमोहन वामि, यज्ञ रत्न धाख्वाः, गोल्डेन भ्वाइस कथं नां जाःम्ह बरिष्ठ गायक प्रेम ध्वज प्रधान, पञ्चवीर सिं तुलाधर, सूर बहादुर श्रेष्ठ, मोहिनी श्रेष्ठ, राजु महर्जन, केशब लाल श्रेष्ठ, मणि शाक्य, किपू नगरपालिका प्रमुख रमेश महर्जन, तीर्थराम डंगोल, लक्ष्मीदास मानन्धर राजेश शाक्य, रत्न बेहोशी, शाक्य सुरेन लगायतया थी थी भाषा ख्यःया लिसें साहित्यीक ख्यः व पत्रकारपिसं ब्वति कयादीगु खः ।

ज्याझ्वलय् लहना वाःपौयात बिज्ञापन बियाः, च्वसूत बियाः, बुखँत बियाः थीथी कथं ग्वाहालि यानादीपिं संघ–संस्था व व्यक्तित्वपिन्त कदर स्वरुप हनाबना यासें मतिनाया चिं लःल्हाःगु खः ।
अथेहे ज्याझ्वलय्  राेजी डंगाेल रीता महर्जन पाखें म्ये न्यंका दीगु खःसा कृपा मुनिकार पाखें कुमारी चर्या प्याखं सविता पुतुवार रविना श्रेष्ठ इन्दु शाही हुलाप्याखं हुलादीगु खःसा समयबजि पुचः पाखें  प्रहसन न्ह्यब्वयादीगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.