लगला सप्तमी कुन्हुया न्हि तःजिक हन ।

११३८ सिल्लाथ्व सप्तमी

दँयदसं पोहेलाथ्व पुन्हिनिसें न्ह्यानाच्वंगु लच्छितकया सक्वया माधवनारायणया धलं दनेगु झ्वलय् थौं लगला सप्तमी कुन्हुया न्हि तःजिक हन । धलं दनेगु झ्वलय् थौंया दिंयात महत्वपूर्णगु न्हि कथं कायेगु याइ । थौंया न्हियात धकाः छन्हु न्ह्यः हे चान्हे सावातय्सं सक्व देय्या दुवा दुवातय् नाग, विष्णु, त्रिशुलया किपाः च्वयेगु ज्या यागु खः ।

लगला सप्तमी कुन्हु व्रतालुपिं सहस्रधाराया नापं दुंदनाच्वंगु । किपा रेखा शाक्य

थथे यायेगु धैगु सप्तमी दिंया जात्राया नितिं त्रिशुलया सुचिनिति यायेगु खः । सप्तमी कुन्हु न्हापां द्यः म्वल्हुके धुनेवं सक्वया मिस्तयेसं थः छेँजःपिं सकसिया नामय् मत चुइकेगु ज्या यागु खः । थथे मत चुइकेगु धैगु छेँजःपिनि भिं उसाँय्या च्यूतालं मत च्याका ल्वय्यात नं चुइका छ्वयेगु धैगु जनविश्वास खः ।

लगला सप्तमी कुन्हु व्रतालुपिं सहस्रधाराया नापं दुंदनाच्वंगु । किपा रेखा शाक्य

न्हिथं थें धलं दने धुंकाः दे चाहिलेगु ज्या यात । मेगु दिंनय् मिजं व्रतालुपिन्सं दुंदनेगु धकाः थः गन तक न्ह्याः अन तक जक दुंदनेगु याइगु खःसा थ्व दिं कुन्हु सक्वया दे हे चाहुगु खः । मिसापिं व्रतालुपिं नं थ्व दिं कुन्हु विशेषकथं झः झः धायेक दोपत्ता पर्सि वा ह््याउँगु बांबालाःगु वसतं पुनाः दे चाहुगु खः ।

लगला सप्तमी कुन्हु माधवनारायणयात खतय् तया जात्रा यानाच्वंगु । किपा रेखा शाक्य

थ्व दिं कुन्हु द्यः कुबिइम्ह व कजि नं सहस्रधारा ज्वना दे चाहुले माःगु परम्परा दुसा सावांतय्सं भजन हाला शंख पुया तिंछुं थाना वनेगु याइ ।
थुकथं सकलें ब्रतालु मिसात व मिजंपिं म्हः दाना सहस्रधाराया कलश ज्वना सक्वया दे चाहुला १०८ थाय् जल छाःया थौंया न्हिया सकतां ज्या क्वचायेगु खः । थ्व हे न्हि कुन्हु न्हिनय् माधवनारायण यात खतय् तया दे नं चाहुकल ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.