रोसिका निरौलां त्याकल स्वक्वःगु टिन प्रिन्सेज डिभाया उपाधी

११३८ बछलागा  षष्ठी/येँ

इभेन्ट म्यानेजमेन्ट ख्यलय् न्ह्यःने लाना वयाच्वंगु रेडियन्ट इभेन्ट म्यानेजमेन्टया ग्वसालय् वंगु शनिबाः राष्ट्रिय नाचघर जमलय् ८ क्वःगु लिटिल प्रिन्स एन्ड प्रिन्सेज व स्वक्वःगु टिन प्रिन्सेज डिभा छगू भब्य ज्याझ्वः यासें क्वचाःगु दु ।

स्वक्वःगु टिन प्रिन्सेज डिभा २०१८य् रोसिका निरौलां उपाधीया लिसें बेस्ट ड्रेसया सिरपाः तकं त्याकेत ताःलात । १३दँनिसें १५दँ पुचलय् जूगु टिन प्रिन्सेज डिभा २०१८ धेंधें बल्लाखय् महिमा बज्राचार्य ल्यूया लिसें बेस्ट ट्यालेन्टया अवार्ड, अथे हे आइसा राई लियांल्यू लायेत ताःलात । मुक्कं १०म्ह कासामिपिनिगु ब्वति दुगु टिन प्रिन्सेज डिभा २०१८य् कासामिपिन्त फोटोजेनिक, ब्यूटिफुल स्माइल, इनर्जेटिक लिसेंया थीथी विधाय् नं सिरपाः लःल्हाःगु खः ।

उगु हे दिनय् अन हे जूगु मेगु ज्याझ्वलय् च्याक्वःगु लिटिल प्रिन्स एन्ड प्रिन्सेज २०१८ नं जूगु खः । थुगुसीया लिटिल प्रिन्सेजया उपाधी धाःसा सुप्रिया महर्जनं त्याकूगु दु । अथे हे लिटिल प्रिन्सया उपाधी नमन मित्तलं त्याकल ।

लिटिल प्रिन्स एन्ड प्रिन्सेजया च्याक्वःगु संस्करणय् लिटिल प्रिन्सेजपाखे प्राप्या पोखरेल ल्यू व प्राश्ना गिरी लियांल्यू लायेत ताःलात । अथे हे लिटिल प्रिन्सपाखे सुसान्त सुवेदी ल्यूजेनिस श्रेष्ठ लियांल्यू लात ।

धेंधें बल्लाखय् बेस्ट ट्यालेन्टया लिसें बेस्ट ड्रेसया सिरपाः धाःसा प्राप्तिका तामाङं त्याकल । व हे कथं, कासामिपिन्त बेस्ट फोटोजेनिक, इनर्जेटिक, डिसिप्लिन, चार्मिङ, बेस्ट वाल्क, भ्यूअर्स च्वाइस लिसेंया थीथी २२ विधाय् नं सिरपाः लःल्हाःगु खः । धेंधें बल्लाखय् ९दँ निसें १२दँ तक्कया मचातय्गु ब्वति दुगु खः ।

डाइरेक्टर फैजुया धापू कथं मस्तय्त शैक्षिक ज्ञानया लिसें थी थी ख्यःया जानकारी बिया वन धाःसा थःगु ब्यक्तित्वयात अझ धिसिलाके फइगु व किताबी ज्ञानया लिसें देशय् दुनेया नापं देशंपिनेया नं आपालं खँत सिइकेगु ह्वता चुलाइगु लिसें थःके सुलाच्वंगु प्रतिभा न्ह्यब्वयेगु नितिं नं थ्व बांलागु लँपु जुवंगु दु । थुगु ज्याझ्वलय् त्यापिन्सं नेपालं पिने वनाः आः याकनं हे जुइत्यंगु थी थी धेंधें बल्लाखय् ब्वति कायेत वनीगु जानकारी बियादिल । मस्तय् नितिं ग्वसाः ग्वःयागु थुगु ज्याझ्वलं थःगु प्रतिभा अन्तर्राष्ट्रिय स्तरय् तकं न्ह्यब्वये खनीग धैगु मस्तय् नितिं सकरात्मक पला जुयाबिइगु खँ बांलागु पक्ष खः धयादिल ।

संकिपा अभिनेता लिसें निर्माता नवल खड्का, म्येहालामि पुन्यम प्रधान, समीर हमाल, सिताराम पोखरेल, पत्रकार निलिमा श्रेष्ठ मास्के, पुनम भट्ट दुथ्याःगु निर्णायक मण्डलं त्याकामि ल्यःगु खः । रेडियन्ट इभेन्ट म्यानेजमेन्टया निर्देशक लिसें इन्टरनेशनल कोरीयोग्राफर राज फैंजुं कोरीयोग्राफी याःगु खःसा ड्रेस डिजाइनिङ श्रीसा वैदार फैजु व एसम्याम बुटिकया एनी तण्डुकारं याःगु खः ।

बुखँ  विराजकाजी राजाेपाध्याय

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: