राष्ट्र बैंकं पुनरकर्जा नविकरण मयायेगु नीति हयेवं ऋणकर्ता समस्याय्

११३८ तछला थ्व सप्तमी/यल

लच्छिया थ्यंमथ्यं २५द्वः सांवा ब्याज बैंकय् बुझे यायेगु कथं संझौता जुगुलिइ आः राज्यं बैंकया नीतिइ हिउपाः हयेवं दबल हे पुलेमालिगु जुल थ्व जिमिसं गथेयाना पुलेफइ ? २० वडाया पिडित अमित राज शाक्यया थ्व न्ह्यसः प्रतिनिधिकथं भुखाचं पिडितपिनिगु मंकाः न्ह्यसः जुयाब्यूगु दु ।

किपाः राजेश बज्राचार्य

राज्यं भुखाचं पिडितपिनिगु नितिं धकाः स्वनिगः दुने २५ लाख तकया ऋण सुविधा घोषणाय् न्हापांगु दँय् ग्रेस अवधि जुइकथं ऋण अविधि कमसेकम नं ५ दँनिसें १० दँ तकया ई ब्यूगुया लिधंसाय् ऋणकर्तापिन्सं बैंकय् ध्यबा काःगु खः ।

यलया दुने लाःगाया बस्ती भुखाचंपिडितपिन्सं बैंकय् काःगु ऋणया २ प्रतिशत ब्याजं आवासीय पुनः निर्माण याःगु दच्छि मफुइवं राज्यं थःगु खँ हिइकाः बैंकया नीतिइ हे हिउपाः वःगु धकाः पुनरकर्जाया नविकरण मजुइगु लिसें ब्याजदर नं अप्वयेकीगु खँ न्ह्यःने वःगु दु ।

राष्ट्रिय युवा महासंघ यलं सहजीकरणया भूमिकाय् भुखाचं पिडितपिन्त पुनःनिर्माण ज्याय् सम्बन्धित नीति दयेकेगुलिइ गुहाली यायेगु तातुनां यल महानगरपालिकाया ग्वसालय् वंगु मंगलबार वडा नं ११,१२,१६,१९ व २० या स्थानीय समस्याय् लानाच्वंपिं ऋणदातापिनिगु समस्या न्यनेगु ज्याझ्वःया ग्वसाः ग्वःगु खः ।

उगु हे ज्याझ्वलय् समस्यां पिडितपिन्सं थःपिन्त राज्यं धोखा बियाः थःपिनिगु छेँ बुँ लिलाम यानाः सुकुम्वासी दयेकेत स्वःगु द्वपं ब्यूगु दु । लिसें जनप्रतिनिधि व स्थानीय निकायपाखें थःपिन्ति गुहाली यायेत स्थानीयवासीपिन्सं इनाप नं यानादिगु दु ।

ज्याझ्वलय् प्राइम बैंकया शाखाया प्रबन्धक राजु महर्जनजुं समस्याय् लाना च्वंपिनिगु नितिं बैंकं बियागु कर्जा प्रवाहया कारण बैंक स्वयम समस्याय् लावंगु खँ धाःगु दु । यल लागाया आपालं बस्ती दुनेया छेँ बैकं बिइगु मापदण्ड दुने मलाःसां स्थलगत निरीक्षण व अमिगु कमाइया आधारय् बैकं ४० म्ह स्वयां अप्वः भुखाचंपिडितपिन्त २ प्रतिशत ब्याजदरं कर्जा प्रवाह यानागु खँ न्ह्यथनादिल ।

किपाः राजेश बज्राचार्य

ब्याज अप्वयेकेगु विकल्प थःपिंन्के नं मदुगु धाःसें संशोधित राष्ट्रबैंक ऐनय् अप्वःयाना १ वर्षया नितिं पुनरकर्जा नविकरण याये फइगु उल्लेख दु, ऐन संशोधन मजूतलय् थःपिन्सं नं थुगु समस्याया समाधान यायेमफइगु तथ्य खँ धयादिल । कर्जा कयातःपिनिगु हित व समस्या समाधानया नितिं नीतिगत तहलय् दबाब बिइगु बाहेक मेगु लँपु मदुगु व थःपिं नं पिडितया नाप‌ दनेगु जुइ धकाः भलसा बियादिल ।

राज्यं ५ दँ निसें १० दँ तकया अवधिइ कर्जाप्रवाहया घोषणा यानाः कार्यान्वयनया नितिं कम से कम बजेटय् सम्बोधन मजूगु खँय् यल उद्योग वाणिज्य संघया पूर्वं अध्यक्ष अजरमान जोशीजुं आपत्ति प्वंकादिल । बजेट सम्बोेधनय् गल्तीबस थुगु बुँदा त्वःफिउगु खःसा थुकियात संशोधन याये माःगु व थुकिया नितिं स्थानीय तह, जनप्रतिनिधि व संसाद सकलें जाना दबाब बिइमाःगु बिचाः न्ह्यःने हयादिल ।

किपाः राजेश बज्राचार्य

ज्याझ्वःया मू पाहाँ यलया उपप्रमुख गीता सत्यालजुं भुखाचं पिडितपिनिगु सवालय् महानगरपालिकाया भूमिकाया लागा चिधं यानातःगु जानकारी ब्यूसें दीर्घकालीन समाधानया नितिं स्थानीय तहपाखें हे पूर्ण रुपं जिम्मेवार कायेमाःगु बिचाः प्वंकादिल । लिसें महानगरया ध्यान अति क्षतिग्रस्त हरिसिद्धि, बुंगमती, खोकनाय् हे केन्द्रित जुयाच्वंगु जुइगुलिं स्ववासी समस्यालिसें बैक समस्याया सम्बोधन यायेत प्राधिकरणया ईकाइ लगायत सरोकारपिनिगु बैठक आयोजना यासें केन्द्रय् दबाब बिइत थः सदां नापं दइ धकाः प्रतिवद्धता प्वंकादिल ।

१६ वडाया वडा नायः निर्मलरत्न शाक्यया नायःसुइ न्ह्याःगु उगु ज्याझ्वलय् विपद व्यवस्थापन शाखाया अधिकृत हरिशचन्द्र लामिछाने, प्राधिकरण अन्तर्गत जिल्ला आवस पुनःनिर्माण परियोजना (ईएचआरपि) प्रतिनिधिण, नेपाल इन्भेष्टमेन्ट बैंकया प्रतिनिधि बिद्या श्रेष्ठजुं विद्यमान समस्यात, सम्बन्धित उपलब्ध नीतिगत व्यवस्थाबारे सहभागीपिन्त थुइका ब्यूगु खः ।

नापनापं १९ वडाया नायः विनोद ताम्राकार, वडा नं ११ या वडा दुजः आपुल महर्जनया लिसें अन्य व्यक्तित्वपाखें पिडितया हकय् न्ह्यःने वनेत थःपिं तयार दुगु धाःगु दु ।

बुखँ व किपाः राजेश बज्राचार्य

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.