राष्ट्रिय नृत्य दिवस घोषणा यायेत माग
११३८ सिल्लागा अष्टमी/येँ
नृत्य ख्यलय् सक्रिय नृत्य निर्देशकपिन्सं श्रावण २६ गतेया दिंयात राष्ट्रिय नृत्य दिवसया रुपं घोषणा यायेत माग याःगु दु ।
नृत्य निर्देशकपिनिगु कुसा संगठन नृत्य निर्देशक संघ नेपालया पुचलं थौं सूचना तथा संचारमन्त्री मोहनबहादुर बस्नेतयात नापलानाः श्रावण २६या दिंयात राष्ट्रिय नृत्य दिवस कथं घोषणा यायेत माग याःगु खः ।
नृत्य निर्देशक संघपाखें ज्ञापन पौ लःल्हासें संघया नायः भुवन श्रेष्ठं संघ गठन याःगु दिं श्रावण २६ यात नृत्य दिवस घोषणा यायेमाःगु माग न्ह्यःने तयादीगु खः । नृत्य निर्देशकपिं संगठित जूगु दिं कथं उगु दिंयात राष्ट्रिय नृत्य दिवसया रुपय् राज्यं मान्यता बीमाःगु नायः श्रेष्ठं धयादिल ।
संघपाखें खँ तयेगु झ्वलय् नायः श्रेष्ठं धकिं ल्यूने च्वनाः श्रृजनात्मक ज्या यानावःपिं नृत्य निर्देशकपिन्सं राज्यया न्ह्यःने थःगु खँ तयेमफुबलय् ल्यूने लानाच्वंगु धासें राज्यं नृत्य निर्देशकपिन्त न्ह्यःने वयेत उचित वातावरण दयेकाबीमाःगु धयादिल ।
राज्यं कलाकारीता ख्यःयात राज्यया न्यागूगु अंग कथं परिभाषित यायेमाःगु माग नं श्रेष्ठं संचारमन्त्रीया न्ह्यःने तयादिल ।
लिसलय् संचारमन्त्री बस्नेतं नृत्य निर्देशकपिनिगु माग मन्त्रीपरिषदय् यंकेगु व थम्हं फक्व थुकिया सम्वोधन यायेगु आश्वासन बियादीगु खः ।
संचारमन्त्री बस्नेतयात नापलायेत संघपाखें नायः श्रेष्ठलिसें न्वकू संजय शर्मा राजोपाध्याय, मू छ्यान्जे नृपध्वज खत्री, ल्यू छ्यान्जे रवि राना मगर, दांभरिं भावना कार्की, ल्यू दांभरिं शारदा सोती शर्मालिसें केन्द्रिय दुजःपिनिगु पुचः मन्त्री क्वाटरय् थ्यंगु खः ।